Feniċi

Minn Wikipedija, l-enċiklopedija l-ħielsa
Aqbeż lejn: navigazzjoni, fittex

Il-Feniċi kienu poplu mill-Lvant Nofsani, min-naħat ta' fuq ta' fejn illum hemm l-Art Imqaddsa, qalb il-pjanuri tax-xatt tal-Libanu u s-Sirja tal-lum il-ġurnata.

Iċ-ċiviltà Feniċja kienet waħda bbażata fuq il-kummerċ marittimu li tferrxet tul il-Baħar Mediterran fl-ewwel millenju QK. Anki jekk in-nies ta' dak ir-reġjuni kienu jsejħu lilhom infushom Kanaaniti, l-isem Feniċi ntiret mill-Griegi, li kienu jsejħulhom Phoiniki - Φοινίκη (Phoiníkē); il-kelma Griega għal Feniċi kienet sinonimu ta' kulur vjola fl-aħmar, bil-Grieg φοινίξ (phoinix), minħabba l-fatt li l-Feniċi kienu jikkummerċjaw żebgħa ta' dan il-kulur. Din iż-żebgħa kienet tintuża fil-kummerċ tat-tessuti, u kienet mfittxija ħafna.

Il-Feniċi baqgħu jkattru r-rotot kummerċjali tagħhom u kienu jwaqqfu kolonji bħala portijiet matul il-vjaġġi tagħhom, bħal Kartaġni, Lilybaeum, Spanja, u Malta.

Il-Feniċi kienu jitkellmu bil-lingwa tagħhom, il-Feniċju, iktar tard imsejjħa Puniku mir-Rumani, minħabba li l-kelma għall-vjola bil-Latin kienet Puniceus. Anki jekk il-Feniċi kellhom deklin qawwi, xorta baqgħu ħajjin fil-popli ta' madwar il-Mediterran, per eżempju Santu Wistin mhux talli kien jikteb b'riferenzi lejn kotba Feniċi, iżda kien jitkellem speċi ta' Puniku hu wkoll, u kien isejħilha il-lingwa tagħna.