Liverpool FC
Minn Wikipedija, l-enċiklopedija l-ħielsa
| Fundazzjoni | 15 ta' Marzu 1892 | |||
|---|---|---|---|---|
| Stadju | Anfield Liverpool Ingilterra (Kapaċità: 45,362) |
|||
| Ċermen |  Tom Hicks u George Gillett |
|||
| Kowċ |  Rafael Benítez |
|||
| Kampjonat | Premier League | |||
|
||||
“ Għaliex għandi nibdel l-iskwadra? Liverpool hi l-aqwa skwadra mhux biss tal-Ingilterra, imma tad-dinja ”
—Bruce Grobbelaar, gowler ta' Liverpool, 1984
Liverpool Football Club hu klabb tal-futbol Ingliż, li hu bbażat f'Liverpool, Merseyside, u li jilgħab fil-Premier League; huma storikament l-aktar tim ta' suċċess fl-istorja tal-futbol Ingliż; huma rebħu aktar trofej minn kull klabb ieħor Ingliż. Liverpool rebħu l-aktar titli tal-kampjonat Ingliż bi tmintax, bl-aħħar suċċess jasal fl-1990. Liverpool rebħu ħames Champions League, li hu rekord fl-Ingilterra. AC Milan u Real Madrid biss għandhom titli aktar minn Liverpool. Huma kellhom ukoll suċċess f'aktar kompetizzjonijiet. Liverpool huma wieħed mill-fundaturi tal-G-14.
Liverpool ilhom jilagħbu f'Anfield mill-bidu tagħhom fl-1892. Madanakollu, pjanijiet qed isiru biex isir xogħol biex il-grawnd jikber għal kapaċità ta' 60,000 persuna (u possibilment anki għal 80,000 persuna skont il-pjanijiet) fis-sajf tal-2010 ħdejn Stanley Park, u li se jkun investit mill-propjetarji Amerikani tal-klabb, Tom Hicks u George Gillett.
Liverpool għandhom rivalità kbira mat-tim ta' Everton, minħabba li dawn iż-żewġ klabbs huma mill-istess belt. Il-partita bejn dawn it-tnejn tkun waħda mistennija u tissejjaħ id-derby ta' Merseyside. Huma għandhom rivalità kbira mat-tim ta' Manchester United minħabba li huma huma l-aktar żewġ timijiet b'suċċessi fl-Ingilterra. Il-benjamini tal-klabb kienu involuti f'żewġ traġedji kbar. Fi Stadju Heysel, 39 benjamin ta' Juventus mietu wara li ħajt waqa wara problemi mill-folla fil-finali tat-Tazza taċ-Ċampjins (Champions League) tal-1985. Fl-1989 f'Hillborough, 96 benjamin ta' Liverpool tilfu ħajjithom minħabba l-folla l-kbira li kien hemm.
Werrej |
[editja] Storja
[editja] Fundazzjoni
L-istorja ta' Liverpool hi legata mal-avvenimenti ta' Anfield, il-grawnd tal-klabb. Oriġinarjament, il-grawnd kien użat minn Everton, klabb professjonali ieħor ta' Liverpool, li ġie fundat fl-1878 u kien fost il-fundaturi tal-Football League. Meta Everton raw li r-rata tal-kera kienet għolja, huma ddeċidew li jittrasferixxu għal Goodison Park. Meta ra hekk, Jack Houlding li kien joffri kuntratti ta' kera għal dan il-grawnd, iddeċieda li jiffonda klabb ġdid tal-futbol li rreġistrah taħt l-isem ta' Everton FC and Athletic Ground plc, abbrevjat f'Everton Athletic; però l-Kunsill tal-Futbol (il-kap tal-Football League) ma aċċettax l-iskrizzjoni tal-klabb il-ġdid taħt dak l-isem[1][2] u, b'konsegwenza t'hekk, fil-15 ta' Marzu 1892, l-iskwadra riformata saret taħt l-isem ta' Liverpool Association Football Club, u wara Liverpool Football Club.
L-ewwel president tal-klabb kien John McKenna u l-ewwel att bħala kowċ kien l-akkwist ta' tlettax-il plejer professjonista mill-Iskozja. Liverpool ma daħlux mill-ewwel fil-Football League; dan sar fis-sena ta' wara, u fl-istaġun 1893–94 huma daħlu fit-Tieni Diviżjoni.[1] Fl-aħħar ta' staġun mingħajr telfa,[3] l-iskwadra rebħet il-kampjonat u kienet promossa għall-Ewwel Diviżjoni. Fl-1901 wasal il-mument tal-ewwel minn tmintax-il titlu ta' ċampjin tal-Ingilterra. L-1914 kienet is-sena tal-ewwel finali tat-Tazza Ingliża, li tilfuha 1–0 kontra Burnley.[4]
[editja] Wara l-gwerra
It-titlu mirbuħ fl-1947, jidher li kien ta dawl ġdid lill-klabb, imma dan iż-żmien tajjeb ma tantx dam. Serje ta' fallimenti fil-kampjonat ġabu lil Liverpool aktar l-isfel, sakemm fl-1954 sfaw relegati fit-Tieni Diviżjoni wara 61 sena fis-serje massima. Huma damu sebgħa snin fit-Tieni Diviżjoni u dan kien fost l-iktar mument iswed fl-istorja tal-klabb, bit-tim barra mill-aqwa diviżjoni għal numru ta' snin u b'telfa kbira ta' 9–1 kontra Birmingham City f'Diċembru 1954, kif ukoll l-eliminazzjoni fil-kwarti tal-finali tat-Tazza Ingliża 1957 minn Southend United. L-unika konsolazzjoni kienet ir-rebħa ta' 4–0 kontra ċ-ċittadini rivali Everton matul it-Tazza Ingliża 1954–55.
[editja] L-era ta' Shankly
Fl-1959 l-Iskoċċiż Billa Shankly kien imsemmi biex jieħu f'idejh Liverpool, fejn l-iskwadra kienet għadha ġejja minn żmien ħażin. Bħal ma ġara qabel, Shankly biex jibda' beda b'ġenerazzjoni ta' żgħażagħ Skoċċiżi.[5] Wieħed mill-aktar famużi kien ċertament Ian St. John, fejn sar mal-ewwel l-favorit tal-pubblika ta' Anfield wara li skorja tripletta kontra Everton fid-debutt bil-flokk aħmar, minkejja t-telfa ta' 4–3 ta' Liverpool. Fi tliet staġuni, Shankly irnexxielu jġib lil Liverpool fl-Ewwel Diviżjoni u bena l-bażi tas-suċċessi futuri: fl-1963–64 wasal is-sitt titlu ta' ċampjins tal-Ingilterra, l-ewwel fi sbatax-il sena, u s-sena ta' wara Liverpool waslu sas-semi-finali tat-Tazza taċ-Ċampjins.
Fl-1965 kienet is-sena tal-konkwista tal-ewwel Tazza Ingliża, wara li rebħu f'Wembley lil Leeds United 2–1. L-istaġun ta' wara (1966) wasal is-seba' titlu Ingliż, fejn finalment reġgħu poġġew lil Liverpool bħala fost l-aqwa tal-pajjiż, u t-tielet Charity Shield konsekuttiva. Kienu ħmistax, is-snin ta' Bill Shankly taħt il-gwida ta' Liverpool: qabel ma rtira (1974) ħalla lill-klabb fid-dominju kontinentali. Shankly reġa' kabbar is-sens ta' kburija fost il-benjamini ta' Anfield.
[editja] Il-konkwista tal-Ewropa
Il-post ta' Shankly bħala kowċ kien il-viċi tiegħu Bob Paisley, li kien l-assistent ta' Shankly matul il-ħmistax-il sena ta' gwida tal-iskwadra.[6] Paisley jibqa' mfakkar bħala wieħed mill-kowċis b'suċċessi fl-istorja tal-futbol. Paisley kellu skwadra formata u li jagħtu ċerta sigurtà, bħall-gowler Clemence, id-difensuri Neal u Alan Kennedy, il-midfielders Case, Hughes u McDermott, l-attakkanti Ray Kennedy, Toshack, u fuq kollox il-klassi ta' Kevin Keegan, wieħed mill-aqwa talenti tal-futbol Ingliż.
Wara li kisbu t-titlu nazzjonali u t-Tazza UEFA (it-tieni f'erba' snin) fl-1976, il-Liverpool waslu f'Ruma għall-finali tat-Tazza taċ-Ċampjins kontra il-Borussia Mönchengladbach, li kienet diġà megħluba fit-Tazza UEFA fl-1972. Ir-"Reds" rebħu 3–1 u ġew onorati bħala ċampjins tal-Ewropa għall-ewwel darba, suċċess li rreplikkaw fis-sena ta' wara fil-finali f'Wembley kontra l-Belġjani ta' Clube Brugge.
Keegan, wara dawn is-suċċessi, telaq lil Liverpool fl-1977 biex mar jilgħab fil-Ġermanja ma' Hamburger, u l-post tiegħu kien meħud minn Kenny Dalgish u l-iskwadra kompliet bis-suċċessi: sal-1983, is-sena tal-irtirar, Paisley rebaħ għal darb'oħra t-Tazza taċ-Ċampjins (f'Pariġi fl-1981 kontra Real Madrid), tliet titli nazzjonali, tliet League Cups konsekuttivi u Super Cup Ewropeja. Paisley ħalla lil Liverpool bħala l-aqwa klabb fl-Ingilterra u fl-Ewropa.
[editja] Il-wasla ta' Joe Fagan
Anki ma' Fagan, il-Liverpool baqgħu jirbħu: fl-1984 wasal il-ħmistax-il titlu nazzjonali, u fuq kollox, ir-raba' Tazza taċ-Ċampjins, li ntrebħet għal darb'oħra fi Stadio Olimpico ta' Ruma, din id-darba kontra l-iskwadra li kienet qed tilgħab ġewwa darha, ir-Roma: wara li Ray Clemence telaq, Liverpool fdaw il-fiduċja tagħhom f'gowler Afrikan, iż-Żimbabwjan Bruce Grobbelaar. Għall-ewwel darba fl-istorja, il-finali tat-Tazza taċ-Ċampjins kienet deċiża bl-għoti tal-penalties (wara li l-partita spiċċat 1–1 wara l-ħin normali, b'gowls ta' Neal u Pruzzo), u f'dak il-mument kien determinanti l'atteġġjament tad-daħk ta' Grobbelaar, li nduna li Conti u Grazziani se jiżbaljaw u b'hekk Liverpool rebħu dan it-titlu Ewropew biex xejjru din it-tazza fl-Ingilterra għar-raba' darba fi tmien staġuni.
Sfortunatament għal Liverpool, is-suċċessi fil-kamp internazzjonali kienu jikkorrispondu ma problemi tal-benjamini kemm fl-Ingilterra u anki madwar l-Ewropa. Proprju l-esperjenza ta' Brussell kienet tagħti suġġeriment lill-UEFA biex ma tilgħabx finali Ewropeja fi grawnd qadim u insigur bħal dak ta' Heysel, imma minkejja l-avviżi l-finali saret fil-belt Belġjana. Fit-Tazza taċ-Ċampjins 1984–85, il-Liverpool laħqu għal darb'oħra l-finali kontra t-tim Taljan ta' Juventus. L-inċidenti li ġraw qabel il-logħba ġabu l-mewt ta' 39 persuna, fosthom benjamini Taljani, Franċiżi, Belġjani u Irlandiżi.[7] B'konsegwenza t'hekk, it-timijiet Ingliżi ġew sospiżi għal ħames snin mill-kompetizzjonijiet Ewropej, fejn għal Liverpool din is-sospiża kienet ta' sitt staġuni. Paisley irtira wara din il-logħba u għall-kronaka din il-logħba spiċċat b'telfa ta' 1–0 għat-tim Ingliż b'gowl skurjat minn Platini permezz ta' penalty.
F'dak il-mument diffiċli, Kenny Dalglish ħa l-inkarigu ta' plejer-kowċ:[8] minkejja li l-iskwadra kienet barra mill-Ewropa, fil-kamp nazzjonali kienet għadha l-aqwa, u rebħet tliet kampjonati, fl-1986, fl-1988 u fl-1990 (sa issal-aħħar wieħed mirbuħ). Is-suċċessi domestiċi, però waqfu wara diżastru ieħor, din id-darba f'Hillsborough Stadium, f'Sheffield, fejn b'kawża ta' żbalji fl-organizazzjoni u loġistiċi, 96 persuna sfaw maqtula.[9]
Biex jiggwida l-klabb, wara Dalglish, żewġ glorji oħra tar-"Reds": l-ewwel Ronnie Moran u wara Graeme Souness, li t-tnejn kienu ċampjins tal-Ewropa f'Ruma fl-1984. Fl-ewwel daħla fl-Ewropa waslu sal-kwarti tal-finali tat-Tazza UEFA 1991–92 kontra l-Genoa. It-Tazza Ingliża fl-1992 u r-rebħ tal-League Cup fl-1995 reġgħu poġġew fuq saqajn lil Liverpool. Taħt il-gwida ta' Roy Evans (1991–1998) u wara ta' Gérard Houllier (mill-1998), reġa' poġġa lill-klabb fir-ribalta.
[editja] Millenju l-ġdid
Il-fatt li l-gwida tal-klabb marret f'idejn kowċ Franċiż ġabet xi ftit ta' xettiċiżmu. Gérard Houllier, li kien iddikjara li Liverpool kien it-tim favorit tiegħu meta kien żgħir, kellu l-kapaċità li jadatta l-plejers tiegħu għall-istil tekniku tiegħu, u b'hekk kellu suċċess mill-ewwel. Ingaġġat għall-ewwel biex jkun ma' Roy Evans bħala kowċ tar-"Reds", il-kowċ Ingliż ma ttollerax ħafna li jkun hemm tmexxija teknika doppja u fl-1999 Evans ħalla lil Houllier waħda biex jiggwida l-iskwadra.
L-isplużjoni ta' Houllier kienet fl-istaġun 2000–01: spiċċa t-tielet fil-fażi tal-gruppi taċ-Champions League u b'hekk Liverpool ġew diretti għat-Tazza UEFA. L-iskwadra bdiet mixja bil-mod imma waħda sigura għall-finali, fejn fost il-vittmi kien hemm Roma, megħluba 2–0 ġewwa darhom b'doppjetta tat-talent Michael Owen, u Barcelona. Il-finali kontra l-Deportivo Alavés intrebħet 5–4 bil-golden goal u, f'Settembru tal-istess sena, waslet ukoll is-Super Cup Ewropeja kontra ċ-ċampjins kontinentali tal-Bayern Munich, li għalqet it-tripletta staġonali li parti minnha kien hemm ukoll il-League Cup.
Is-sena ta' wara Liverpool spiċċaw it-tieni fil-Premier League, fi tmiem ta' staġun iebes fejn ra lil Houllier operat f'qalbu wara attakk tal-qalb waqt il-logħba kontra Leeds United. L-iskwadra, taħt il-viċi tiegħu Phil Thompson, ma laħaqx l-aspettattivi. Fl-2003 waslet titlu tal-League Cup ieħor imma fl-2004, wara perjodu ta' turbolenza u l-ebda ftehim mal-benjamini, Houllier u Liverpool iddeċidew li jisseparaw.[10]
[editja] Gwida Spanjola
Rafael Benítez wasal minn Valencia biex ħa post Gérard Houllier, fejn l-Ispanjol kien għadu kemm rebaħ La Liga għat-tieni darba u t-Tazza UEFA. Liverpool spiċċaw fil-ħames post fil-kampjonat. L-istaġun però kellu tmiem sorpriż hekk kif Liverpool rebħu l-ħames Champions League ġewwa Istanbul. Wara li eliminaw lill-favoriti Juventus fil-kwarti tal-finali, huma rebħu lir-rivali tagħhom Chelsea fis-semi-finali, b'gowl kontroversjali skurjat minn Luis Garcia. Ħafna ripetizzjonijiet tal-gowl ma ġabux konklużjoni jekk il-ballun qabiżx il-linja jew le. Liverpool iltaqgħu kontra l-favoriti Italja AC Milan fil-finali. Liverpool, marru minn taħt 3–0 sal-ewwel taqsima, imma fit-tieni taqsima għamlu rimonta kbira fejn irnexxielhom jiskorjaw tliet gowls biex il-partita spiċċat fil-ħin miżjud. Liverpool ħarġu rebbieħa fil-penalties grazzi għall-gowler Jerzy Dudek.
Ir-rebħ taċ-Champions League assigura li Steven Gerrard kien se jibqa' ma' Liverpool, wara li kien hemm għajdut li kien se jingħaqad ma' Chelsea jew Real Madrid.
Alavolja kienu ċ-ċampjins preżenti, Liverpool kienu qed jirriskjaw li ma jiddefendux t-titlu tagħhom. Il-UEFA kienet tħalli l-massimu ta' erba' timijiet li jgħaddu għaċ-Champions League mill-Ingilterra. Fl-2004–05, ħames timijiet Ingliżi kkwalifikaw għall-kompetizzjoniji skont il-gwida tal-UEFA: Chelsea, Arsenal, Manchester United u Everton, li spiċċaw fl-ewwel erba' postijiet tal-Premier League, u Liverpool li kienu rebħu l-kompetizzjoni. Id-deċiżjoni waqgħet fuq il-Football Association. L-FA għażlet li teskludi lil Liverpool. Dan il-każ kien solvut mill-UEFA hekk kif din poġġiet lil Liverpool għall-ewwel rawnds tal-kwalfikazzjonijiet tal-edizzjoni 2005–06. Il-UEFA ikkrejat post awtomatiku għar-rebbieħ preċedenti taċ-Champions League u t-Tazza UEFA.
Wara li għaddew mill-fażi tal-kwalifikazzjoni u anki mill-fażi tal-gruppi, id-difiża tat-titlu ta' Liverpool spiċċat meta f'Marzu 2006, huma spiċċaw barra meta tilfu bl-iskor ta' 3–0 kontra t-tim Portugiż ta' SL Benfica.
Bħala rebbieħa tal-kompetizzjoni tal-2005, Liverpool lagħbu kontra CSKA Moscow fis-Super Cup Ewropeja u rebħu 3–1 wara l-ħin miżjud. Bħala ċampjins tal-Ewropa huma kellhom id-dritt li jipparteċipaw fit-Tazza tad-Dinja għall-Klabbs li saret fil-Ġappun. Liverpool iltaqgħu fil-finali kontra São Paulo u tilfu b'gowl ta' Mineiro. Fil-partita tliet gowls minn Liverpool kienu mħassra.
Wara li bdew l-FA Cup b'rebħa ta' 5–3 fuq Luton Town, it-tim ta' Benitez rebaħ lir-rivali enterni Manchester United 1–0 f'Anfield fit-18 ta' Frar 2006 b'gowl li wasal fit-85 minuta.[11] Din kienet l-ewwel rebħa fuq l-United f'din il-kompetizzjoni mill-1921. Fil-kwarti tal-finali, huma għelbu lil Birmingham City bi skor konvinċenti ta' 7–0. Dan ir-riżultat kien l-akbar riżultat barra minn darhom li Liverpool qatt ġabu fl-FA Cup.
Fit-22 ta' April 2006, Liverpool rebħu lil Chelsea 2–1 fis-semi-finali, b'gowls ta' John Arne Riise u Luis Garcia. Fil-finali huma rebħu lil West Ham United bil-penalties. Il-ħin normali spiċċa bl-iskor ta' 3-3 bi Steven Gerrard jiskorja gowl inkredibbli fil-91 minuta biex ġab l-iskor indaqs. Fl-għoti tal-penalties huma rebħu 3–1 biex b'hekk rebħu is-seba' titlu ta' din il-kompetizzjoni.
Fl-2005–06 Liverpool kisbu 82 punt fil-Premership [12] – l-akbar total ta' punti minn l-1988 u l-akbar numru ta' punti li tim li spiċċa fit-tielet post qatt kiseb. L-istaġun ta' wara bdiet b'rebħa ta' 2–1 kontra Chelsea FC fil-Community Shield.
Minkejja li kienu eliminati mill-FA Cup u mil-League Cup minn Arsenal, Benitez iggwida lil Liverpool fil-finali taċ-Champions League wara li rebħu 4-1 bil-penalties lil Chelsea wara li spiċċaw pari ta' 1–1. Għal darb'oħra Pepe Reina salva lil Liverpool u tahom il-kwalifikazzjoni għall-finali li kienet se tintlagħab f'Ateni, fil-Greċja. Huma reġgħu ltaqgħu ma' Milan fejn minkejja li ddominaw l-ewwel taqsima, huma sofrew żewġ gowls ta' Filippo Inzaghi li ġew, wieħed f'kull taqsima. Dirk Kuyt naqqas id-distakk fl-aħħar minuta biex l-iskor spiċċa 2–1.
[editja] Proprjetarji ġodda
Fis-6 ta' Frar 2007, l-industrijalisti tat-telekomunikazzjoni mill-Istati Uniti George Gillett (proprjetarju tat-tim tal-hockey fuq is-silġ Montreal Canadiens) u Tom Hicks (proprjetarju tat-tim tal-baseball Texas Rangers), akkwistaw il-maġġoranza tal-klabb b'investiment kumplessiv ta' 470 miljun sterlina (720 miljun ewro).[13] Fl-offerta kienu ukoll 215-il miljun sterlina għall-grawnd il-ġdid, li se jinbena fi Stanley Park. Il-proprjetarji l-ġodda ddikjaraw, fil-konferenza stampa tal-preżentazzjoni, li l-istadju jista' jkun imsemmi għal xi sponsor, jekk dan ikun utli biex jaqilgħu l-flus neċessarji biex f'Liverpool iġibu plejer b'valur kull staġun.[14][15]. Wara li biegħ il-kwoti tiegħu ta' propjetà, David Moores m'għadux il-president tal-klabb, fejn postu ħaduh iż-żewġ azzjonisti Statunitensi.
Fis-suq tat-trasferimenti tas-sajf, Liverpool għamlu l-akkwist, fost l-oħrajn, tal-Ispanjol Fernando Torres mill-Atlético Madrid għal €36 miljun, u l-Olandiż tal-Ajax Ryan Babel għal €17-il miljun.
Fil-UEFA Champions League 2007-08, Liverpool irnexxielhom, minkejja bidu negattiv, jgħaddu mill-fażi tal-gruppi fejn kisbu t-tieni post wara Porto, u qabel Marseille u Beşiktaş. Minkejja li rebħu fir-rawnds ta' wara lill-Inter u Arsenal, huma reġgħu sabu quddiemhom lil Chelsea imma din id-darba t-tim ta' Londra rnexxielhom jirbħulhom u jikkwalifikaw għall-finali. Liverpool spiċċaw staġun ieħor mingħajr trofej.
[editja] Plejers famużi
Biex tapprofondixxi, ara l-artiklu: Lista ta' plejers ta' Liverpool FC.
Numru ta' plejers ta' prestiġju – kemm Brittaniċi u anki dawk li mhumiex – libsu l-flokk ta' Liverpool. Fost l-ismijiet denji ta' nota nsibu dak tal-gowler mill-Irlanda ta' Fuq Elisha Scott, li hu l-plejer bl-aktar numru ta' staġuni mat-tim, fejn kien bejn il-lasti għal 22 staġun konsekuttiv mill-1912 sal-1934; l-Iskoċċiż Ron Yeats, difensur ċentrali li wasal fi żmien Bill Shankly biex jerġa' jibni d-difiża tal-iskwadra fil-bidu tas-snin sebgħin; l-Ingliż Roger Hunt, li mat-tim nazzjonali kien rebaħ it-Tazza tad-Dinja 1966. Fis-snin sebgħin u tmenin kontribut kbir wasal mill-plejer Galliku John Toshack, mill-Iskoċċiż Alan Hansen, rebbieħ ta' tliet Tazez taċ-Champions u l-qalb tat-tim kollu flimkien ma' Dalgish u McDermott, u mill-attakkant Ian Rush. Hu probabbli li l-aktar plejer maħbub mill-benjamini tal-Kop hu Ian Callaghan, idolu għall-klabb hekk kif hu kien twieled f'Liverpool stess, u serva għall-klabb mill-1960 sal-1978 fejn irnexxielu jagħmel 640 preżenza fil-kampjonat mar-"Reds" (b'total kumplessiv ta' 857 preżenzi fil-kompetizzjonijiet kollha), rekord li għadu mhux megħlub.
Fi snin aktar riċenti, kien hemm numru ta' plejers li bdew il-karriera ma' Liverpool, biex wara marru jilagħbu ma' klabbs oħra. Fost dawn insibu lil Steve McManaman (attwalment irtira mil-logħba tal-futbol wara li lagħab ukoll ma' Real Madrid, Robbie Fowler (ittrasferixxa għal Leeds u Manchester City biex wara reġa' ngħaqad mar-"Reds") u Michael Owen (li wkoll ittrasferixxa ma' Real Madrid u attwalment jinsab ma' Newcastle United). Attwalment, il-plejer li jirrapreżenta l-aktar it-tim hu bla dubju ta' xejn il-kaptan Steven Gerrard, nazzjonali Ingliż, li twieled u trabba f'Liverpool u li minn dejjem kien parti mill-klabb.
[editja] Kuluri soċjali u l-emblema
|
|||||||||
| Il-kuluri oriġinali ta' Liverpool ta' darhom (1892–1894) | |||||||||
Il-kuluri tradizzjonali ta' Liverpool huma l-aħmar u l-abjad, bil-flokk ta' darhom li mis-snin sittin baqa' bl-istess kulur aħmar. Fis-snin tal-bidu, meta l-klabb ħa Anfield minn Everton, huma kienu jużaw il-kuluri blu u abjad tat-"Toffees", fejn kienu jilbsu uniformi identika bħal dik tat-tim ta' Everton fl-istess żmien. Sal-1894, Liverpool adottaw il-kulur aħmar, u fl-1901 adottaw ukoll lill-għasfur mitoloġiku Liver Bird, bħala l-emblemma tal-klabb.[16] Għas-sittin sena ta' wara, l-uniformi ta' Liverpool kienet flokk aħmar u xorts abjad, bil-kulur tal-kalzetti li alternaw mas-snin minn ħomor, għal suwed, għal bojod u għal darb'oħra għal dawk ħomor.
Fl-1964, il-kowċ ta' dak iż-żmien Bill Shankly, iddeċieda li jilgħab lit-tim għall-ewwel darba b'uniformi kollha ħamra, għall-partita kontra Anderlecht.
|
|||||||||
| It-tielet uniformi ta' Liverpool għall-2007–08. | |||||||||
Il-kuluri ta' Liverpool meta jkunu barra minn darhom huma tradizzjonali jew flokk abjad u xorts iswed jew kollox isfar. Madanakollu, fl-1987 kienet introdotta uniformi kollha griża. Din baqgħet sal-istaġun taċ-ċentinarju 1991–92, meta postha ħaditha kumbinazzjoni ta' flokk aħdar u xorts abjad. Wara diversi kumbinazzjonijiet ta' kuluri fis-snin disgħin, fosthom kulur id-deheb, isfar ċar, iswed u griż, u ekrù, il-klabb iddeċċiedda fil-millenju l-ġdid f'mudell li jalterna l-isfar mal-abjad kull sena.[17]
L-uniformi kurrenti hi ddisinjati mill-adidas,[18] li għamlet ukoll l-uniformi tat-tim bejn l-1985 u l-1996. Il-flokkijiet l-oħra li huma milbusa mill-klabb u li huma sponsorjati kienu magħmula minn Umbro sal-1985, u Reebok għal għaxar staġuni mill-1996.[19] L-uniformi kurrenti meta jkunu barra minn darhom hi flokk abjad, xorts iswe u kalzetti bojod. Hemm ukoll it-tielet uniformi li hi kollha sewda, iddisinjata primarjament għal-logħob barra minn darhom fiċ-Champions League, imma hi wżata wkoll fil-logħob domestiku meta tim ikollu wkoll l-istess kuluri ħomor u bojod.
Liverpool kienu l-ewwel klabb professjonista Brittaniku li libes logo tal-isponsor fuq il-flokkijiet tagħhom.[20] Minn dakinhar sa issa, il-klabb kellu relattivament ftit varjazzjoni f'negozjati ta' sponsorizzazzjoni.
L-emblema kurrenti ta' Liverpool hi bbażata madwar il-Liver Bird tradizzjonali, li hu pożizzjonat f'tarka. Fuq it-tarka hi rappreżentazzjoni tad-daħla għal Anfield dedikata lil Bill Shankly u miktub fiha hemm "You'll Never Walk Alone" (Qatt ma timxu waħedkhom), li hu anki t-titlu tal-innu uffiċjali. Iż-żewġ fjammi fuq kull naħa huma bħala tifkira għall-vittmi fid-diżastru ta' Hillsborough.[21]
[editja] Stadju
Biex tapprofondixxi, ara l-artiklu: Anfield.
L-istadju uffiċjali għall-partiti ta' Liverpool ġewwa darhom hu Anfield, wieħed mill-grawnds l-aktar rispettati u mħarsa fid-dinja hekk kif dan għandu tradizzjoni sportiva kbira mibnija matul snin ta' rebħiet f'diversi kompetizzjonijiet maġġuri kontinentali. Dan jinsab fit-triq li ġġib l-istess isem (Anfield Road) u ilu bħal l-grawnd tat-tim mill-1892. Matul iż-żmien ġie ristrutturat diversi drabi, imma m'għadux addattat biex jissodisfa r-rikjesti tal-benjamini (45,362 post) u hu mistenni li jkun hemm kostruzzjoni ta' stadju ġdid fi Stanley Park, fiż-żona fejn bdiet tintlagħab il-logħba tal-futbol f'Liverpool.
[editja] Skwadra kurrenti u staff
- Sas-27 ta' Novembru 2008.[22]
[editja] L-ewwel tim
|
|
[editja] Plejers barra f'self
|
[editja] Staff tekniku
- Sal-1 ta' Diċembru 2008.[22]
| Isem | Rwol |
|---|---|
| Rafael Benítez |
Kowċ |
 Sammy Lee |
Assistent Kowċ |
 Mauricio Pellegrino |
Kowċ tal-Ewwel Tim |
| Xavi Valero |
Kowċ tal-Gowlers |
| Angel Vales |
Kap tal-Analisi Tekniċi |
| Mark Waller |
Tabib tal-Klabb |
[editja] Kowċis
| Isem | Naz | Minn | Sa | Rekord | |||||||||
|---|---|---|---|---|---|---|---|---|---|---|---|---|---|
| P | R | P | T | F | K | %R | |||||||
| W. E. Barclay u John McKenna[23] |  |
Frar 1892 | Awissu 1896 | 131 | 80 | 20 | 31 | 344 | 158 | 61.07% | |||
| Tom Watson |  |
Awissu 1897 | Mejju 1915 | 742 | 329 | 141 | 272 | 1226 | 1056 | 44.34% | |||
| David Ashworth | |
Diċembru 1919 | Frar 1923 | 138 | 70 | 40 | 28 | 220 | 118 | 50.36% | |||
| Matt McQueen | |
Frar 1923 | Frar 1928 | 229 | 93 | 60 | 76 | 354 | 307 | 40.61% | |||
| George Patterson | |
Marzu 1928 | Awissu 1936 | 366 | 137 | 85 | 144 | 665 | 700 | 37.43% | |||
| George Kay | |
Awissu 1936 | Jannar 1951 | 357 | 142 | 93 | 122 | 551 | 511 | 39.78% | |||
| Don Welsh | |
Marzu 1951 | Mejju 1956 | 232 | 81 | 58 | 93 | 387 | 423 | 34.91% | |||
| Phil Taylor | |
Mejju 1956 | Novembru 1959 | 150 | 76 | 32 | 42 | 294 | 211 | 50.67% | |||
| Bill Shankly | |
Diċembru 1959 | Lulju 1974 | 783 | 407 | 198 | 178 | 1307 | 766 | 51.98% | |||
| Bob Paisley | |
Lulju 1974 | Lulju 1983 | 535 | 307 | 132 | 96 | 955 | 406 | 57.38% | |||
| Joe Fagan | |
Lulju 1983 | Mejju 1985 | 131 | 70 | 37 | 24 | 225 | 97 | 53.44% | |||
| Kenny Dalglish | |
Mejju 1985 | Frar 1991 | 307 | 187 | 78 | 42 | 617 | 259 | 60.91% | |||
| Ronnie Moran | |
Frar 1991 | April 1991 | 10 | 4 | 1 | 5 | 20 | 16 | 40.00% | |||
| Graeme Souness | |
April 1991 | Jannar 1994 | 157 | 65 | 47 | 45 | 248 | 186 | 41.40% | |||
| Roy Evans | |
Jannar 1994 | Lulju 1998 | 226 | 116 | 57 | 53 | 375 | 216 | 51.33% | |||
| Roy Evans u Gérard Houllier[24] |  |
Lulju 1998 | Novembru 1998 | 18 | 7 | 6 | 5 | 33 | 20 | 38.89% | |||
| Gérard Houllier[25] | |
Novembru 1998 | Mejju 2004 | 307 | 158 | 75 | 74 | 516 | 298 | 51.47% | |||
| Rafael Benítez | |
Ġunju 2004 | Preżent | 239 | 134 | 50 | 55 | 395 | 202 | 56.07% | |||
[editja] Unuri
[editja] Kompetizzjonijiet domestiċi
- Kampjonat Ingliż: 18
- 1900–01, 1905–06, 1921–22, 1922–23, 1946–47, 1963–64, 1965–66, 1972–73, 1975–76, 1976–77, 1978–79, 1979–80, 1981–82, 1982–83, 1983–84, 1985–86, 1987–88, 1989–90
- 1893–94, 1895–96, 1904–05, 1961–62
- 1892–93
- 1965, 1974, 1986, 1989, 1992, 2001, 2006
- 1981, 1982, 1983, 1984, 1995, 2001, 2003
- 1964, 1965, 1966, 1974, 1976, 1977, 1979, 1980, 1982, 1986, 1988, 1989, 1990, 2001, 2006
- 1986
[editja] Kompetizzjonijiet internazzjonali
- 1977, 1978, 1981, 1984, 2005
- Tazza UEFA: 3
- 1973, 1976, 2001
- 1977, 2001, 2005
[editja] Biblijografija
- Graham, Matthew. Liverpool. Hamlyn Publishing Group Ltd. 1985. ISBN 0-600-50254-6.
- Liversedge, Stan. Liverpool:The Official Centenary History. Hamlyn Publishing Group Ltd. 1991. ISBN 0-600-57308-7.
- Ponting, Ivan. Liverpool In Europe. Guinness Publishing. 1992. ISBN 0-85112-569-7.
- Ponting, Ivan. Liverpool Player by Player. Hamlyn Publishing Group Ltd. 1998. ISBN 0-600-59493-9.
[editja] Referenzi
- ^ a b ' ISBN 1-85973-303-4
- ^ LFC Story (Ingliż). Sit uffiċjali ta' Liverpool FC. Aċċessata nhar il-17-03-2007.
- ^ 2nd Division League table for the 1893-1894 season (Ingliż). lfchistory.net. Aċċessata nhar il-07-03-2007.
- ^ Liverpool in the FA Cup - Season by Season (Ingliż). lfchistory.net. Aċċessata nhar il-07-03-2007.
- ^ ' ISBN 1-84018-493-0
- ^ ' ISBN 0-00-218907-0pġ 86
- ^ On This Day - 1985: Fans die in Heysel rioting (Ingliż). BBC News. Aċċessata nhar il-12-09-2006.
- ^ Profile of Kenny Dalglish (Ingliż). Sit uffiċjali ta' Liverpool FC. Aċċessata nhar il-21-03-2007.
- ^ On This Day - 15th April 1989: Soccer fans crushed at Hillsborough (Ingliż). BBC News. Aċċessata nhar il-12 ta' Settembru, 2006.
- ^ McNulty, Phil (24-05-2004). Houllier to leave Liverpool (Ingliż). BBC. Aċċessata nhar il-13-04-2007.
- ^ Liverpool dump United out of FA Cup (Ingliż), www.rte.ie
- ^ Statistika ta' Liverpool FC (Ingliż), stats.football365.com
- ^ Shareholders accepted American takeover bid, (Ingliż)
- ^ US pair agree Liverpool takeover (Ingliż), BBC
- ^ US business duo at Liverpool helm (Ingliż), BBC
- ^ LFC Story (Ingliż). Sit uffiċjali ta' Liverpool FC. Aċċessata nhar il-17-03-2007.
- ^ Club Colours - Away kit pictures (Ingliż). liverweb.org.uk. Aċċessata nhar il-17-03-2007.
- ^ Back on home turf, as adidas returns to Liverpool (Ingliż). adidas.com. Aċċessata nhar il-17-03-2007.
- ^ History of Liverpool's kits (Ingliż). historicalkits.co.uk. Aċċessata nhar il-21-09-2007.
- ^ The Knowledge - Has a streaker ever scored? (Ingliż). guardian.co.uk. Aċċessata nhar il-16-08-2007.
- ^ Hillsborough (Ingliż). liverpoolfc.tv. Aċċessata nhar il-27-12-2007.
- ^ a b First Team Players And Staff (Ingliż). Liverpoolfc.tv. Aċċessata nhar il-17-05-2008.
- ^ Is-sit uffiċjali ta' Liverpool issemmi lil Barclay u McKenna bħala żewġ kowċis li kienu jmexxu lit-tim flimkien. (Referenza: William E. Barclay: 'Joint Manager' (1892-96) (Ingliż). Liverpool official website. Aċċessata nhar il-12-09-2006.
- ^ Houllier wasal Liverpool fis-sajf tal-1998 biex jaqsam l-pożizzjoni ta' kowċ ma' Evans.
- ^ Houllier kien assenti minn Ottubru 2001 għal Frar 2002, minħabba mard. Matul dan iż-żmien, Phil Thompson ħa l-pożizzjoni ta' kowċ temporarju.
- ^ It-trofew kien magħruf bħala Charity Shield sal-2002, u wara beda jissejjaħ Community Shield sa issa.
- ^ Introdotta wara li timijiet Ingliżi kienu sospiżi milli jilgħabu fil-kompetizzjonijiet Ewropej
- ^ Sal-1992, l-ikbar kompetizzjoni Ewropeja għall-klabbs kienet tissejjaħ Tazza taċ-Ċampjins; minn dakinhar 'l hawn, saret tissejjaħ UEFA Champions League.
[editja] Ħoloq esterni
- (Ingliż) Sit uffiċjali
- (Ingliż) LFCHistory.net – Artikli u statistika dwar Liverpool FC
|
||||||||
|
||||||||
