Edwin van der Sar

Minn Wikipedija, l-enċiklopedija l-ħielsa
Aqbeż lejn: navigazzjoni, fittex
Edwin van der Sar
Edwin van der Sar side.jpg
Informazzjoni personali
Isem sħiħ Edwin van der Sar
Twelid 29 ta' Ottubru 1970 (1970-10-29) (44 sena)
Voorhout
Pajjiż Bandiera tal-Pajjiżi l-Baxxi Olanda
Tul 1.97 m
Rwol Gowlkiper
Klabbs ġovanili
1980–1985 Pajjiżi l-Baxxi Foreholte
1985–1990 Pajjiżi l-Baxxi VV Noordwijk
Klabbs professjonali*
Snin Klabb Preż Gwls
1990–1999 Pajjiżi l-Baxxi Ajax 226 (1)
1999–2001 Italja Juventus 66 (0)
2001–2005 Ingilterra Fulham 127 (0)
2005–2011 Ingilterra Manchester United 186 (0)
Total 605 (1)
Tim nazzjonali
1994–2008 Pajjiżi l-Baxxi Olanda 130 (0)
* Il-preżenzi u l-gowls fil-karriera professjonali huma validi biss għall-kampjonat domestiku.
Aġġornament: 08:16, 29 Mejju 2011 (UTC)

Edwin van der Sar (Voorhout, 29 ta' Ottubru 1970) huwa eks-gowlkiper tal-futbol Olandiż li l-aħħar li lagħab mat-tim Ingliż ta' Manchester United.

Van der Sar hu l-aktar plejer li għamel preżenzi bil-flokk tat-tim nazzjonali Olandiż, u hu wkoll wieħed mill-ftit plejers li rebħu ċ-Champions League ma' żewġ timijiet differenti, wara li rebaħha fl-1995 mat-tim ta' Ajax tal-Olanda u ma' Manchester United tal-Ingilterra fl-2008.

Karriera[editja]

AFC Ajax[editja]

Edwin van der Sar beda l-karriera fil-klabb tal-lokalità tiegħu Foreholte u wara VV Noordwijk, fejn laqat l-għajn tat-tim ta' Ajax Amsterdam. Wara li beda fis-sistemà ġovanili tal-istess Ajax, u gawda snin twal ta' suċċess mat-tim tal-kbar fejn rebaħ it-Tazza UEFA 1991–92 u l-UEFA Champions League 1994–95, flimkien mal-unur tal-Aqwa Gowlkiper Ewropew fl-1995. Hu tilef il-finali tal-UEFA Champions League 1995–96 wara l-għoti tal-penalties kontra il-Juventus. Hu għamel total ta' 226 apparenza ma' Ajax u skorja gowl minn penalty fir-rebħa ta' 8–1 li Ajax għamlu kontra De Graafschap fl-istaġun 1997-98.

Juventus[editja]

Il-ġigant Olandiż iddebutta mat-tim tal-Juventus fl-istaġun 1999–00, fejn l-ewwel staġun kien wieħed impekkabbli fejn rebħu t-Tazza Intertoto. Minkejja li t-tim tilef il-kampjonat tas-Serie A fl-aħħar ġurnata, fuq nota personali, għal Van der Sar dan kien staġun mill-aqwa fejn f'39 apparenza laqqat biss 19-il gowl.

L-istaġun segwenti kien l-aktar wieħed diffiċli fil-karriera tiegħu, fejn kellu problemi fil-vista u dawnk personali li influwenzaw fuq ir-rendiment tal-istaġun. Ħass ukoll in-nuqqas tal-kuraġġ li kienu jagħtuh il-partitarji tiegħu, minħabba d-diversi żbalji li wettaq fl-ewwel parti tal-istaġun. Fost l-aktar kritikat kien dak kontra SS Lazio, fejn minn xutt debboli minn barra l-kaxxa ta' Marcelo Salas, u minn free kick ta' Paulo Sousa fiċ-Champions League kontra l-Panathinaikos. Minkejja dawn l-iżbalji, reġa' kiseb fiduċja fih innifsu u għen biex it-tim jirritorna lura fil-ġirja għat-titlu flimkien mal-Lazio, detentur tat-titlu, u mar-Roma ta' Fabio Capello. Kien deċisiv fil-pari ta' 0–0 miksub kontra l-giallorossi fi Stadju Olimpiku ta' Ruma fejn irnexxielu jsalva l-ewwel fuq Batistuta u wara fuq Totti. Kien deċisiv ukoll fil-partiti kontra Perugia u kontra Reggina. Imma fil-partita kontra r-Roma, kien proprju l-iżball tiegħu li wassal għall-pari ta' 2–2, wara li Juventus kienu bnew vantaġġ ta' 2–0. Fi tmiem l-istaġun temm l-esperjenza tiegħu l-Italja u għażel li jingħaqad mat-tim tal-Premier League Ingliż, Fulham.

Fulham[editja]

Van der Sar ma' Fulham

Minkejja interess kbir minn klabbs Ingliżi bħal Arsenal, Manchester United u Liverpool, hu għażel li jmur ma' tim inqas kwotat, u dan kien it-tim tal-miljunarju Eġizzjan Mohamed Al-Fayed, Fulham. Edwin mal-ewwel ambjenta ruħu mal-klabb u mal-istil tal-logħob, fejn fl-istaġun 2001-02 irnexxielu jwassal lit-tim sas-semi-finali tal-FA Cup u anki sal-kwalifikazzjoni għat-Tazza Intertoto.

Fl-istaġun suċċessiv kiseb it-Tazza Intertoto, u reġa' wettaq prestazzjoni ta' livell għoli. Imma f'nofs il-kampjonat sofra minn uġigħ gravi li telfitu l-partiti kollha li kien għad baqa' dak l-istaġun. Fl-istaġun 2003-04 reġa' rritorna għal-logħob u għal darb'oħra għamel staġun eċċezzjonali, aktar mit-tnejn preċedenti, fejn kellu prestazzjonijiet tajba matul l-istaġun kollu speċjalment kontra Manchester United, Arsenal u Chelsea. Fl-aħħar tal-istaġun irċieva offerta min-naħa tal-PSV Eindhoven, imma l-Olandiż irrifjuta u ddeċieda li jkompli l-avventura tiegħu fir-Renju Unit.

Manchester United[editja]

Van der Sar ingħaqad ma' Manchester United fis-sajf tal-2005, fejn iddebutta kontra l-Ungeriżi ta' Debreceni VSC, li kienet partita mit-tielet rawnd ta' kwalifikazzjoni għaċ-Champions League. Fil-kampjonat għamel l-eżordju tiegħu fl-20 ta' Awwissu f'Goodison Park kontra Everton fejn grazzi għas-salvataġġi tiegħu għen biex United jirbħu 2–0. Fl-ewwel sitt partiti tal-istaġun ma laqqat l-ebda gowl, fejn dan wasal biss fil-pari ta' 1–1 fid-derby kontra l-Manchester City. Fis-26 ta' Frar, Edwin kiseb l-ewwel trofew ma' Manchester United bir-rebħa ta' 4–0 kontra Wigan Athletic fil-finali tal-Carling Cup, fil-Millenium Stadium. L-istaġun ta' wara spiċċaw fit-tieni post bi 83 punt. Van der Sar, fost l-oħrajn, għalaq l-istaġun fuq nota pożittiva permezz ta' prestazzjoni tajba kontra Celtic, li kienet partita organizzata bħala rikonoxximent għal wieħed mill-akbar leġġendi fl-istorja ta' Manchester United, Roy Keane, fejn din spiċċat 2–0 favur ir-Red Devils.

Van der Sar jilgħab ma' Manchester United

Fil-bidu tal-istaġun ta' wara kien ċedut sieħbu tat-tim nazzjonali, Ruud van Nistelrooy, u Manchester United ma akkwistawx sostitut għalih, fejn ħafna ddubitaw dwar il-qawwa offensiva tal-iskwadra. Id-diriġenti tal-klabb ħasbu aktar biex jgħinu nofs il-grawnd, permezz tal-akkwist ta' Michael Carrick. L-istaġun beda bir-rebħa fit-Turnew ta' Amsterdam, fejn għelbu 1-0 lil Ajax fil-partita deċisiva, grazzi għal gowl ta' Ryan Giggs, anki jekk il-plejer tal-partita kien Van der Sar, li minbarra n-numru ta' interventi li għamel, salva wkoll penalty ta' Klaas Jan Huntelaar. Fil-kampjonat bdew ukoll tajjeb fejn kienu fl-ewwel post wara biss żewġ partiti. Fl-4 ta' Frar 2007, fil-partita f'White Hart Lane kontra t-Tottenham Hotspur (li kienet mirbuħa 4–0 mit-tim ta' Alex Ferguson), wara parata minn xutt ta' Robbie Keane, hu kien milqut involuntarjament f'wiċċu mill-istess attakkant Irlandiż, fejn tilef is-sensi għal xi minuti u kien qed jissogra serjament il-karriera tiegħu. Minħabba li Manchester United kienu wżaw it-tliet sostituzzjonijiet, id-difensur John O'Shea kellu jieħu post Van der Sar bejn il-lasti. Wara għoxrin ġurnata biss, hu reġa' rritorna bejn il-lasti għall-partita kontra Fulham, b'rebħa għar-Red devils fl-aħħar minuta b'gowl ta' Cristiano Ronaldo. Il-gowlkiper Olandiż wettaq prestazzjoni oħra tajba kontra Liverpool fejn ipprevjena għal ħafna drabi li United imorru minn taħt. Fl-aħħar mumenti tal-logħba John O'Shea skorja l-gowl tar-rebħa, li ta lil Manchester United ir-rebħa, fejn din kienet rebħa importanti fl-aktar partita importanti tal-istaġun u tefa' b'manjiera kważi definittiva lit-tim ta' Ferguson għall-konkwista tat-titlu.

Xahar wara, United affrontaw lil Roma fil-kwarti tal-finali taċ-Champions League, wara li eliminaw fil-fażi tal-aħħar sittax lil Lille. Minkejja li tilfu 2–1 fi Stadju Olimpiku ta' Ruma, huma ttrijunfaw 7–1 f'Old Trafford. F'dik l-istess partita Van der Sar salva żewġ free kicks perikolużi ta' Totti. Fil-kampjonat, Chelsea kienu rkupraw xi ftit fuq United u avviċinawhom aktar fil-klassifika. Edwin flimkien ma' sħabu tat-tim ikkwalifikaw għall-finali tal-FA Cup, fejn rebħu 4–1 lil Watford. Fiċ-Champions League wara li rebħu 3–2 lil Milan ġewwa darhom, il-fortuna ma kinitx magħhom fil-partita ta' ritorn hekk kif tilfu 3–0. Ir-Red devils xorta baqgħu fit-tiġrija għall-konkwista tat-tilu nazzjonali. Fl-aħħar partita tal-istaġun huma affrontaw barra minn darhom lil Everton, waqt li Chelsea kellhom partita aktar faċli kontra Bolton. Fi tmiem l-ewwel taqsima il-Blues kienu 2–1 fil-vantaġġ, waqt li United kienu saħansitra 2–0 minn taħt. Però kien hemm żvolta fit-tieni taqsima taż-żewġ partiti. Bolton irnexxielhom jakkwistaw il-pari waqt li United għamlu rimonta mirakoluża ta' 4–2 fejn marru 5 punti vantaġġ fuq Chelsea bi 3 partiti mit-tmiem. Nhar il-5 ta' Mejju, fid-derby ta' Mancester f'City of Manchester Stadium, Manchester United marru fil-vantaġġ b'gowl ta' Cristiano Ronaldo, imma 10 minuti mit-tmiem Edwin irnexxielu jsalva penalty mogħti mill-ispeċjalist Darius Vassell, u b'hekk ta għall-ewwel darba wara erba' staġuni t-trofew lil Manchester United. Fil-finali tal-FA Cup li ntlgħabet kontra Chelsea fid-19 ta' Mejju, United sofrew telfa b'gowl fl-aħħar minuti tal-ħin supplementari.

L-istaġun segwenti, lagħab fost l-aqwa staġuni fil-karriera tiegħu. Fil-5 ta' Awissu 2007, fil-finali tal-Community Shield, Manchester United sfidaw għal darb'oħra liċ-Chelsea ta' José Mourinho fil-leġġendarju Wembley Stadium. Wara l-ħin supplementari, ir-riżultat kien dak ta' 1-1 u l-partita marret għall-għoti tal-penalties fejn din kienet deċiża permezz ta' tliet parati ta' Van der Sar fuq l-ewwel tliet penalties ta' Chelsea. B'hekk United kisbu l-ewwel trofew tal-istaġun. Fost l-aqwa prestazzjonijiet matul dan l-istaġun kienu jinkludu l-ewwel partita fil-fażi tal-gruppi taċ-Champions League kontra Sporting CP, u anki l-partita f'Anfield kontra r-rivali Liverpool, fejn irnexxielu ma jkunx megħlub għat-tielet sena konsekuttiva. Wara li tilef diversi partiti minħabba li kien weġġa' waqt it-taħriġ, irritorna bil-prestazzjonijiet il-Red devils. Hu kompla bil-forma tajba tiegħu fejn kien deċiżiv fil-partiti kontra Newcastle United, Fulham, Arsenal u Liverpool, fejn f'din il-partita tal-aħħar baqa imbattut u għalhekk għamel rekord ta' tliet staġuni konsekuttivi ta' imbattibilità kontra l-Liverpool. Fiċ-Champions League wera wkoll il-forma tajba tiegħu fil-partiti kontra r-Roma u Barcelona. United akkwistaw it-tieni titlu konsekuttiv b'rebħa fl-aħħar partita fuq Wigan Athletic u rebħa oħra fil-finali taċ-Champions League, fejn kien hu l-eroj tas-serata, meta salva l-penalty ta' Nicolas Anelka, biex b'hekk kiseb it-tieni titlu Ewropew fil-karriera tiegħu u sar ukoll wieħed mill-ikbar leġġendi fl-istorja tal-klabb u tal-futbol, fejn laħaq kwota ta' 30 trofew li ntrebħu matul il-karriera tiegħu.

Fit-12 ta' Diċembru 2008, Van der Sar iffirma estenzjoni ta' sena fil-kuntratt kurrenti tiegħu ma' Manchester United, fejn b'hekk se jżommu mal-klabb tal-anqas sal-istaġun 2009–10.[1]

Fis-27 ta' Jannar 2009, Van der Sar għen lil Manchester United iwaqqfu rekord ġdid kemm tal-klabb kif ukoll tal-Premier League għall-ikbar numru ta' partiti mingħajr ma jlaqqtu gowl – ir-rebħa bl-iskor ta' 5–0 fuq West Bromwich Albion kienet tfisser li United kienu ilhom 11-il logħba (1,032 minuta) mingħajr ma jlaqqtu gowl, fejn b'hekk għelbu r-rekord preċedenti ta' 10 logħbiet (1,025 minuta) magħmul minn Petr Čech fl-istaġun 2004–05.

Erbat ijiem wara, hu għamel rekord ieħor ta' 1,121 minuta fil-futbol Ingliż mingħajr ma jsofri gowl, wara r-rebħa ta' 1–0 kontra Everton.[2] F'dan l-istadju b'hekk għadda r-rekord li kien f'idejn Steve Death ta' Reading, li kien żamm 1,103 minuti fl-1979. Nhar it-8 ta' Frar 2009, hu estenda r-rekord għal 1,212-il minuta wara r-rebħa kontra West Ham United bl-iskor ta' 1–0, fejn b'hekk għeleb ir-rekord Brittaniku li qabel kien f'idejn Bobby Clark, ta' 1,155 minuta fl-1971.[3]

Fit-18 ta' Frar 2009, van der Sar kompla jtawwal ir-rekord għal 1,302 minuti, wara t-telfa ta' Fulham bl-iskor ta' 3-0. Il-wasla tiegħu sa dan l-istadju tfisser li hu għeleb ir-rekord mondjali ta' staġun wieħed li kien f'idejn Jose Maria Buljubasich, ta' 1,289 minuta, li wettqu fil-Clausura Ċilena 2005.[4] Dan ir-rekord intemm fl-4 ta' Marzu, meta minn żball tiegħu Peter Løvenkrands ta' Newcastle United skorja wara 9 minuti.[5] B'kollox, Van der Sar għamel 1,311-il minuta mingħajr ma jlaqqat gowl fil-kampjonat.[6]

Internazzjonali[editja]

Van der Sar kien magħżul mat-tim Olandiż għat-Tazza tad-Dinja 1994, imma ma lagħab lanqas minuta f'dik l-edizzjoni. Iddebutta fis-7 ta' Ġunju 1995 kontra l-Belarus. Anki mat-tim nazzjonali kiseb il-post mal-ewwel ħdax, fejn iddebutta f'manifestazzjoni ta' kalibru fil-Kampjonati Ewropej 1996, fejn hu u l-Olanda waslu sal-kwarti tal-finali, fejn kienu eliminati wara l-għoti tal-penalties minn Franza.

Sentejn wara ħa sehem fl-ewwel Tazza tad-Dinja tal-karreira tiegħu, dawk tal-1998. Din id-darba l-Oranje kisbu r-raba' post, wara li tilfu bl-għoti tal-penalties konta ċ-ċampjins renjanti tal-Brażil. Edwin madanakollu għamel prestazzjoni tajba fejn wera l-ħila tiegħu flimkien ma' Fabien Barthez u Gianluca Pagliuca. Fis-sena 2000, l-Olanda flimkien mal-Belġju ospitaw il-Kampjonati Ewropej 2000, fejn għal darb'oħra l-progress fil-kompetizzjoni għall-Olandiżi kien sas-semi-finali.

Van der Sar jitħarreġ mat-tim nazzjonali Olandiż qabel l-Euro 2008

Wara perjodu iswed għat-tim Olandiż fejn naqqsu li jikkwalfiikaw għat-Tazza tad-Dinja 2002, l-Oranje għamlu ribalta u kisbu l-kwalifikazzjoni għall-Kampjonati Ewropej tal-Futbol 2004. Fil-kwarti tal-finali, fil-partita kontra l-Iżvezja spiċċaw bil-lotterija tal-penalties fejn din id-darba l-fortuna kienet taħt l-Olanda. Imma wara sofrew eliminazzjoni mill-ospitu, il-Portugall, b'gowls ta' Maniche u Cristiano Ronaldo.

Wara l-Euro 2004, bħala kowċ wasal Marco Van Basten, fejn għamel rivoluzzjoni kbira, fejn eskluda l-elementi ta' kalibru ta' Edgar Davids u Clarence Seedorf, u daħħal minflok lil żgħażagħ promettenti bħal Wesley Sneijder, Robin van Persie u Rafael van der Vaart. L-uniku veteran magħżul kien Ruud van Nistelrooy li flimkien ma' Van der Sar kien magħżul bħala s-simbolu tal-iskwadra. Waqt il-fażi ta' kwalifikazzjoni u fil-fażi finali tat-Tazza tad-Dinja 2006, Edwin irnexxielu jistabilixxi rekord ta' imbattibilità ta' kull żmien dwar il-partiti uffiċċjali ta' timijiet nazzjonali, fejn irnexxielu jkun imbattut għal 1,013-il minuta. Wara l-eliminazzjoni għal darb'oħra kontra l-Portugall, kien ippjana biex jirtira mill-impenji nazzjonali, imma Marco van Basten irnexxielu jikkonvinċih biex jerġa' lura fl-iskwadra.

Wara li reġa' ħa postu fit-tim nazzjonali, ikkwalfika għall-Euro 2008 fejn ħa sehem bħala plejer titulari u kaptan fil-partiti kontra l-Italja u Franza. Minkejja li l-Olanda ddominaw Grupp Ċ huma sfaw eliminati mir-Russja, fejn din kienet tfisser l-aħħar partita għal Van der Sar. Din kienet is-sittax-il apparenza tiegħu fil-fażi finali tal-Kampjonati Ewropej, fejn ugwalja r-rekord li wettaq Lilian Thuram xi ġranet qabel. Wara l-Kampjonati Ewropej 2008, Van der Sar sar il-plejer li lagħab l-aktar minuti fil-Kampjonati Ewropej.[7]

Minkejja li qabel l-Euro 2008 van der Sar kien wara din il-kompetizzjoni kien se jirtira mit-tim nazzjonali, fit-3 ta' Ottubru, van der Sar ħabbar li kien lest li jerġa' jipposponi l-irtirar tiegħu biex jilgħab għall-Olanda fil-fażi ta' kwalifikazzjoni għat-Tazza tad-Dinja tal-Futbol 2010 kontra l-Iżlanda u n-Norveġja wara li t-tim nazzjonali sofra kriżi tal-gowlkipers.[8] B'Maarten Stekelenburg u Henk Timmer, il-kowċ tal-Olanda Bert van Marwijk ikkonferma li van der Sar kien se jibda ż-żewġ partiti. Van der Sar irnexxielu jibqa' imbattibli fiż-żewġ partiti, bl-Olandiżi jirbħu 2–0 u 1–0 rispettivament. B'hekk van der Sar għalaq is-separju fuq it-tim nazzjonali b'rekord ta' 130 dehra.

Statistika tal-karriera[editja]

Korretti sad-28 ta' Mejju 2011[9]

Klabb Staġun Kampjonat Tazza League Cup Ewropa Oħrajn[10] Total
Preż Gowls Preż Gowls Preż Gowls Preż Gowls Preż Gowls Preż Gowls
Ajax 1990–91 9 0 0 0
1991–92 0 0 0 0
1992–93 19 0 3 0
1993–94 32 0 6 0
1994–95 33 0 11 0
1995–96 33 0 11 0
1996–97 33 0 10 0
1997–98 33 1 8 0
1998–99 34 0 6 0
Total 226 1 55 0
Juventus 1999–2000 32 0 4 0
2000–01 34 0 6 0
Total 66 0 10 0
Fulham 2001–02 37 0 4 0 0 0 0 0 0 0 41 0
2002–03 19 0 0 0 0 0 11 0 0 0 30 0
2003–04 37 0 6 0 0 0 0 0 0 0 43 0
2004–05 34 0 5 0 1 0 0 0 0 0 40 0
Total 127 0 15 0 1 0 11 0 0 0 154 0
Manchester United 2005–06 38 0 2 0 3 0 8 0 0 0 51 0
2006–07 32 0 3 0 0 0 12 0 0 0 47 0
2007–08 29 0 4 0 0 0 10 0 1 0 44 0
2008–09 33 0 2 0 0 0 10 0 4 0 49 0
2009–10 21 0 0 0 2 0 6 0 0 0 29 0
2010–11 33 0 2 0 0 0 10 0 1 0 46 0
Total 186 0 13 0 5 0 56 0 6 0 266 0
Total 605 1 56 0 6 0 139 0 14 0 820 1

Unuri[editja]

Klabb[editja]

Pajjiżi l-Baxxi Ajax

Italja Juventus

Ingilterra Fulham

Ingilterra Manchester United

Individwali[editja]

  • Nominat darbtejn bħala l-aqwa gowlkiper taċ-Champions League: 1994–95, 1995–96
  • Nominat darba bħala l-aqwa gowlkiper tal-Ewropa: 1995
  • Nominat darba bħala l-aqwa gowlkiper tal-istaġun tal-FA Premier League: 2006–07
  • Nominat erba' darbiet bħala l-aqwa gowlkiper tal-Olanda: 1995, 1996, 1997, 1998
  • Nominat darba bħala l-plejer Olandiż tas-sena: 1998
  • Nominat darba bħala l-aqwa plejer tal-istaġun ta' Fulham: 2003–04
  • Unur ta' Mertu tal-Barclays Premier League: 2008–09

Referenzi[editja]

  1. ^ (Ingliż) Van der Sar extends Man Utd deal. BBC Sport, 12-12-2008. Aċċess tal-URL: 21-12-2008.
  2. ^ (Ingliż) Man Utd 1-0 Everton. BBC Sport, 31-01-2009. Aċċess tal-URL: 20-02-2009.
  3. ^ (Ingliż) West Ham 0-1 Man Utd. BBC Sport, 08-02-2009. Aċċess tal-URL: 20-02-2009.
  4. ^ Statisika tal-IFFHS
  5. ^ (Ingliż) United battle for points at Newcastle. EuroSport, 04-03-2009. Aċċess tal-URL: 04-03-2009.
  6. ^ (Ingliż) We can handle pressure - Ferguson. BBC Sport, 04-03-2009. Aċċess tal-URL: 05-03-2009.
  7. ^ (Ingliż) Edwin van der Sar most minutes played at European Championship. TopFootball.net, 21-06-2008. Aċċess tal-URL: 31-10-2008.
  8. ^ (Ingliż) Van der Sar makes Dutch comeback for World Cup qualifiers. Reuters, 03-10-2008. Aċċess tal-URL: 31-10-2008.
  9. ^ (Ingliż) Edwin van der Sar. StretfordEnd.co.uk. Aċċess tal-URL: 06-04-2009.
  10. ^ Tinkludi kompetizzjonijiet kompetittivi oħrajn, fejn tinkludi l-FA Community Shield, is-Supertazza Ewropea, it-Tazza Interkontinentali, Tazza tad-Dinja tal-Futbol tal-Klabbs

Ħoloq esterni[editja]