Rabat (Malta)

Minn Wikipedija, l-enċiklopedija l-ħielsa
Aqbeż lejn: navigazzjoni, fittex

Ftit informazzjoni dwar ir-Rabat[editja]

Ir-Rabat huwa wieħed mill-akbar lokalitajiet li hawn f'Malta u wkoll wieħed mill-aktar qodma. Dan is-subborg jibda sewwa sew minn taħt is-sur tal-belt il-qadima u kien jiġbor tista' tgħid il-belt il-qadima Rumana kollha. Taħt bosta mit-toroq tar-Rabat hemm midfuna sehem kbir mis-swar li darba kienu ta' din il-belt. L-Għarab kienu ċekknuh, iżda s-sisien baqgħu hemm biex isostnu dak li kienu jaħsbu l-istoriċi. Moħbija taħt bosta mit-toroq dojoq hemm miktuba l-ġrajja twila ta' dan is-subborg li trid titbiegħed wisq lura biex tkun tafha sew u ssir taf meta nkitbet l-ewwel paġna tal-istorja tagħha. Ir-Rabat hija lokalita' qadima li fiha xxeklet ċivilta' bikrija.

Mar-Rabat insibu magħquda l-Baħrija. Sa ftit żmien ilu dan kien biss raħal ċkejken ħdejn il-baħar, iżda llum il-ġurnata kiber ħafna. Ir-Rabat huwa l-kunsill li għandu l-akbar konfini. Insibu wkoll l-Imtaħleb bl-istorja tiegħu ta' Miġra Ferħa. F'dan il-post l-antiki tal-Imdina kienu jiġu sabiex jiddevertu. Hawn skont it-tradizzjoni, l-Insara laqgħu l-Konti Ruġġieru meta ġie Malta biex jeħlishom minn taħt l-Għarab.

Il-Feniċi semmew biċċa art ftit l-isfel mir-Rabat, 'Il-Fiddien' li tfisser 'Żmien iż-Żebbuġ' u hu maħsub li hawn kienu jgħasru ż-żebbuġ biex jagħluh żejt. Fuq in-naħa l-oħra tar-Rabat insibu l-Imtarfa, għolja arjuża ħafna, li kienet ittieħdet mill-Militar li fuqha nbena sptar. Illum l-Imtarfa hija lokalita' għaliha bil-Kunsill Lokali tagħha u hija wkoll Parroċċa għaliha.

Mal-miġja tal-Ordni ta' San Ġwann f'Malta, ir-Rabat kompla jisbieħ ferm, tant li bosta kienu l-kbarat li bnew djar kbar, palazzi u vilel mill-isbah. Ir-Rabat hu wieħed mill-aktar lokalitajiet li fih x'tara f'dawk li huma fdalijiet u patrimonju ta' missirijietna. Naraw ukoll ħafna kampanja sabiħa. Tajjeb li ngħidu li 75% tat-turisti li jżuru 'l pajjiżna, jiġu r-Rabat ukoll. Il-Popolazzjoni tar-Rabat hija 'l fuq minn 12,005.

Ħoloq esterni[editja]

L-Informazzjoni ġiet miġbura minn www.rabatmalta.webs.com

Ingħaqdu magħna fuq facebook billi tagħfsu hawn.