Miroslav Klose

Minn Wikipedija, l-enċiklopedija l-ħielsa
Jump to navigation Jump to search
Miroslav Klose
Miroslav klose2.jpg
Informazzjoni personali
Isem sħiħMirosław Marian Kloze
Twelid9 ta' Ġunju 1978 (1978-06-09) (40 sena)
Opole
PajjiżBandiera tal-Polonja Polonja
NazzjonalitàBandiera tal-Ġermanja Ġermanja
Tul1.82 m
RwolAttakkant
Informazzjoni fuq il-klabb
Klabb kurrentiLazio
Numru16
Klabbs ġovanili
1987–1998SG Blaubach-Diedelkopf
Klabbs professjonali*
SninKlabbPreżGwls
1998–1999Homburg20(11)
1999–2004Kaiserslautern120(44)
2004–2007Werder Bremen89(53)
2007–2011Bayern Munich98(24)
2011–Lazio58(28)
Tim nazzjonali
2001–Ġermanja129(68)
* Il-preżenzi u l-gowls fil-karriera professjonali huma validi biss għall-kampjonat domestiku.
Aġġornament: 19:07, 1 ta' Settembru 2013

Miroslav Klose, imwieled bħala Mirosław Marian Kloze (Opole, 9 ta' Ġunju 1978) hu plejer tal-futbol Ġermaniż li jilgħab bħala attakkant għal Lazio fis-Serie A.

Minkejja li Pollakk minn twelidu, Klose għandu ċ-ċittadinanza Ġermaniża. Matul it-Tazza tad-Dinja 2006 ġewwa l-Ġermanja hu kien l-aqwa skorer tal-kompetizzjoni b'ħames gowls. Fl-edizzjoni preċedenti tal-2002 li saret fil-Korea t'Isfel u l-Ġappun hu skorja wkoll l-istess ammont ta' gowls fl-ewwel dehra tiegħu f'fażi finali ta' dan il-kampjonat dinji. Fit-Tazza tad-Dinja tal-FIFA 2010, l-ewwel gowl tiegħu wasal fl-ewwel rawnd tal-fażi eliminatorja kontra l-Ingilterra u skorja darbtejn kontra l-Arġentina fil-kwarti tal-finali, partita li mmarkat il-100 dehra tiegħu man-nazzjonal Ġermaniż. Permezz ta' dan il-gowls, attwalment jinsab fit-tieni post flimkien ma' Gerd Müller fil-lista tal-aqwa skorers ta' kull żmien fit-Tazza tad-Dinja.

Bijografija[immodifika | immodifika s-sors]

Imwieled f'Opole, belt fil-Polonja b'komunità qawwija Ġermaniża, ta' età żgħira ttrasferixxa lejn il-Ġermanja. Missieru, Józef Kloze, u ommu, Barbara Jeż, it-tnejn kienu nvoluti fl-isport: missieru kien plejer professjonista u lagħab ukoll fl-Ewwel Diviżjoni Franċiża, waqt li ommu kienet għal diversi snin gowlkiper tat-tim nazzjonali Pollakk tal-ħendbol u membru tal-Partit Komunista Pollakk.

Hu hu miżżewweġ lil Sylwia Klose[1] u hu missier tat-twemin Luan u Noah. F'intervista mar-rivista Ġermaniża Der Spiegel hu stqarr kif fid-dar jitkellmu il-Pollakk waqt li t-tfal tiegħu jitgħallmu l-Ġermaniż l-iskola.

Karriera[immodifika | immodifika s-sors]

Kaiserslautern[immodifika | immodifika s-sors]

Wara staġun ma' Homburg, huwa ngħaqad ma' Kaiserslautern. Sena wara li ngħaqad mal-klabb hu rnexxielu jiżblokka ruħu mal-ewwel tim. Fl-ewwel 67 logħba huwa skorja 33 gowl. L-istaġun 2002–03 kien diżappuntanti għal Klose minħabba li sab ix-xibka 7 darbiet biss.

Werder Bremen[immodifika | immodifika s-sors]

Miroslav Klose ma' Werder Bremen

Fl-2004 huwa ttrasferixxa għal ma' Werder Bremen għal somma ta' 5 miljun. Wara bidu mhux daqsek mill-aqwa, Klose ifforma koppja offensiva mill-aktar effetiva mal-Franċiż Johan Micoud u l-Kroat Ivan Klasnić u anki mal-Paragwajan Nelson Valdez, biex b'hekk skorja 15-il gowl fil-Bundesliga.

Sal-2005, Klose kien stabbilixxa lilu nnifsu bħala fost l-aqwa attakkanti tal-futbol Ġermaniżi, jekk mhux ukoll l-aqwa. Fl-istaġun 2005–06, hu skorja 25 gowl f'26 logħba tal-kampjonat, l-akbar total f'dak l-istaġun, u barra minn hekk assista sittax-il gowl.

Wara prestazzjoni mill-aqwa li ħalla fit-Tazza tad-Dinja 2006, kien hemm għajdut li Klose kien se jitlaq lit-tim ta' Weserstadion. Timijiet bħal Barcelona u Juventus kienu fost dawk interessati fl-akkwist ta' dan il-plejer. Kien hemm spekulazzjoni li Klose seta' jissieħeb ma' Bayern Munich, bil-president tal-klabb Franz Beckenbauer ammiratur kbir tal-plejer.

Bayern Munich[immodifika | immodifika s-sors]

Fis-26 ta' Ġunju, 2007, ġie kkonfermat il-passaġġ ta' Klose għal Bayern Munich għas-somma ta' 15-il miljun. Klose kompla t-testijiet mediċi fit-28 ta' Ġunju qabel ma ffirma kuntratt ta' erba' snin.

Klose għamel id-debutt uffiċjali fir-rebħa ta' 4–1 kontra l-eks-tim tiegħu, Werder Bremen, fl-ewwel rawnd tad-DFB Liga-Pokal. Wara li naqas milli jipparteċipaw fir-rebħa li Bayern Munich għamlu fis-semifinali kontra Stuttgart minħabba li kien imweġġa', Klose irritorna fil-finali kontra Schalke 04, fejn skorja l-ewwel gowl kompetittiv tiegħu mal-klabb il-ġdid biex huma rebħu l-ewwel titlu staġjonali.

Miroslav Klose beda tajjeb fil-Bundesliga meta skorja doppjetta kontra Hansa Rostock fl-ewwel ġurnata tal-kampjonat fir-rebħa ta' 3–0, fejn ukoll assista lil Luca Toni. Lejn l-aħħar ta' Settembru, hu skorja l-ewwel tripletta għall-klabb f'rebħa ta' 5–0 kontra Energie Cottbus fil-kampjonat. Lejn l-aħħar nofs tal-istaġun, Klose bata sabiex jirrepeti l-forma tal-ewwel nofs. Madanakollu, l-20 gowl tiegħu (fil-kompetizzjonijiet kollha) – flimkien ma' rekord impressjonanti fit-Tazza DFB – għenu mhux ftit lill-klabb biex jikseb id-doppjetta tal-kampjonat u t-tazza nazzjonali.

It-tieni staġun tiegħu kien wieħed pożittiv hekk kif spiċċa bħala l-aqwa skorer tal-klabb b'20 gowl f'kull kompetizzjoni, figura li setgħet kienet aħjar li ma kienux għall-problemi fiżiċi li tappnulu l-istaġun. L-aħħar sentejn mal-klabb Bavarjan kienu deludenti hekk kif ħafna drabi spiċċa fost is-sostituti.

Fis-6 ta' Ġunju, 2011, Klose u Bayern Munich baqgħu ma laħqux qbil u hekk kif il-kuntratt tiegħu kien skada, iddeċieda li jħalli 'l-klabb fi tmiem l-istaġun 2010–11.[2]

Lazio[immodifika | immodifika s-sors]

Nhar id-9 ta' Ġunju, 2011, Klose iffirma kuntratt ta' sentejn mal-klabb Taljan ta' Lazio. Dan se jkun l-ewwel tim tiegħu barra mill-Ġermanja.[3]

Internazzjonali[immodifika | immodifika s-sors]

Miroslav Klose waqt taħriġ mat-tim nazzjonali Ġermaniż

F'Jannar tal-2001, il-kowċ nazzjonali tal-Polonja, Jerzy Engel, mar il-Ġermanja sabiex jipperswadi lil Klose biex jilgħab f'isem il-Polonja. Din ir-rikjesta ġie rrifjutata minn Klose li għażel li jilgħab għall-Ġermanja. Il-konsistenza tiegħu fl-ammont ta' gowls, wassluh biex jiddebutta mat-tim nazzjonali kontra l-Albanija nhar l-24 ta' Marzu, 2001. Klose daħal bħala sostitut u żewġ minuti mill-ħin skorja l-gowl tar-rebħa permezz ta' daqqa ta' ras, għal skor finali ta' 2–1.[4]

F'intervista li ta għal Przegląd Sportowy fid-9 ta' Ġunju, 2008, Klose stqarr li d-deċiżjoni tiegħu li jilgħab għall-Ġermanja u mhux għall-Polonja ma kinitx waħda faċli, u li kieku l-uffiċċjali Pollakki kienu aktar kmieni, seta' għażel li jilgħab mal-Polonja. Fatt kurjuż huwa li meta Klose skorja mal-Ġermanja, it-tim qatt ma tilef. Attwalment jinsab fit-tieni post flimkien ma' Gerd Müller bħala l-aqwa skorer ta' kull żmien fit-Tazza tad-Dinja.

Tazza tad-Dinja 2002[immodifika | immodifika s-sors]

Klose żblokka fix-xena internazzjonali tal-futbol waqt it-Tazza tad-Dinja 2002 li saret fil-Korea u l-Ġappun. Għall-Ġermanja hu skorja ħames gowls, kollha bir-ras, matul il-kompetizzjoni, fejn temm l-ewwel esperjenza f'kampjonat internazzjonali bħala t-tieni l-aqwa skorer flimkien ma' Rivaldo. Fost il-ħames gowls kien hemm tripletta li għamel fir-rebħa kbira tal-Ġermaniżi fuq l-Għarabja Sawdita bl-iskor ta' 8–0.

Tazza tad-Dinja 2006[immodifika | immodifika s-sors]

Klose ġie msejjaħ mal-iskwadra għat-Tazza tad-Dinja 2006, it-tieni Tazza tad-Dinja fuq livell personali. Fil-partita tal-ftuħ kontra l-Kosta Rika, li kienet taħbat ukoll ma' għeluq it-28 sena tiegħu, Klose skorja darbtejn għall-Ġermanja, fis-17 u fil-61 minuta. Il-partita spiċċat 4–2 favur it-tim Ġermaniż. Matul il-kompetizzjoni fforma koppja offensiva formidabbli ma' Lukas Podolski li bejniethom skorjaw tmien gowls.

Hu skorja żewġ gowls oħra kontra l-Ekwador fl-20 ta' Ġunju, fejn b'hekk poġġa ruħu fl-ewwel post tal-klassifika tal-aqwa skorers. Klose lagħab rwol importanti fir-rebħa tal-Ġermanja kontra l-Iżvezja fejn kien hu li pprovda żewġ assists lil Lukas Podolski li skorja ż-żewġ gowls fir-rebħa ta' 2–0 fir-rawnd tal-aħħar sittax.

Il-forma tajba tiegħu kompliet hekk kif lejn l-aħħar minuti tal-partita mill-kwarti tal-finali kontra l-Arġentina, li ntlagħbet fit-30 ta' Ġunju 2006, hu rnexxielu jikseb il-gowl tal-pari fejn wassal biex il-Ġermanja tirbaħ 4–2 wara l-għoti tal-penalties. Klose huwa l-ewwel Ġermaniż minn żmien Gerd Müller fis-sebgħinijiet li sar l-aqwa skorer tat-Tazza tad-Dinja, u l-ewwel Ġermaniż li skorja l-aktar gowls minn meta l-Ġermanja ngħaqdet f'pajjiż wieħed (Müller irrappreżenta lill-Ġermanja tal-Punent). L-edizzjoni tal-2006 intemmet bi Klose għaxar gowls fiż-żewġ edizzjonijiet li lagħab tat-Tazza tad-Dinja, sitta 'l bogħod mir-rekord tal-Brażiljan Ronaldo.

Kampjonati Ewropej 2008[immodifika | immodifika s-sors]

Fis-6 ta' Settembru, 2006, Klose skorja darbtejn kontra San Marino fir-rebħa ta' 13–0 tal-Ġermanja, biex b'hekk tella' n-numru ta' gowls internazzjonali għal 33, l-istess ammont ta' Fritz Walter u b'hekk wasal sas-seba' post tal-aqwa skorers ta' kull żmien tal-Ġermanja.

Minkejja n-nifxa fil-gowls li kien għaddej minnha li wasslu għal xniegħat li seta' jitneħħa mill-ewwel ħdax, il-kowċ Ġermaniż Joachim Löw ċaħad dan kollu. Nhar it-8 ta' Settembru, 2007, Klose kellu l-faxxa ta' kaptan għall-ewwel darba u ċċelebraa dan l-avveniment biż-żewġ gowls tar-rebħa ta' 2–0 fuq Wales.

Fil-fażi finali, Klose beda l-partita tal-ftuħ mill-ewwel minuta u kien hu li pprovda ż-żewġ gowls tal-Ġermanja skurjati minn Lukas Podolski fir-rebħa ta' 2–0. Fiż-żewġ partiti segwenti kontra l-Kroazja u l-Awstrija ma rnexxielux jiskorja gowl wieħed, però fil-fażi eliminatorja hu fetaħ il-kont tiegħu għal din il-kompetizzjoni permezz ta' żewġ gowls għall-Ġermanja, l-ewwel fil-partita tal-kwarti tal-finali kontra l-Portugall u t-tieni wasal fis-semifinali kontra t-Turkija. Madanakollu ma sabx ix-xibka fil-finali mitlufa mill-Ġermaniżi kontra Spanja.

Tazza tad-Dinja 2010[immodifika | immodifika s-sors]

Klose ġie magħżul fost it-23 plejer tal-Ġermanja għat-Tazza tad-Dinja 2010, it-tielet waħda tiegħu. Fl-ewwel logħba mill-fażi tal-gruppi kontra l-Awstralja, Klose skorja t-tieni gowl fir-rebħa ta' 4–0. Fit-tieni logħba kontra s-Serbja, Klose ingħata karta ħamra fit-36 minuta, partita li l-Ġermaniżi tilfu 1–0. Fir-rawnd ta' L-Aħħar Sittax, hu skorja t-tnax-il gowl tiegħu fit-Tazza tad-Dinja meta sab ix-xibka fil-konfront kontra l-Ingilterra tas-27 ta' Ġunju, 2010. Dan kien il-50 gowl tiegħu fid-99 logħba internazzjonali, hekk kif il-Ġermaniżi ttrijonfaw 4–1. Il-100 logħba tiegħu waslet fil-kwarti tal-finali kontra l-Arġentina hu skorja darbtejn, it-tieni u r-raba' gowls, fir-rebħa ta' 4–0, biex ugwalja r-rekord tal-konnazzjonali Gerd Müller. Minħabba uġigħ f'daru li sofra fis-semifinali kontra Spanja (li l-Ġermanja tilfet 1-0), Klose ma setax jilgħab fil-partita għat-tielet post kontra l-Urugwaj (li l-Ġermanja rebħet 3-2).

Statistika tal-karriera[immodifika | immodifika s-sors]

Korretti sal-14 ta' Mejju 2011
Klabb Staġun Kampjonat Tazza Ewropa Total
Preż Gowls Preż Gowls Preż Gowls Preż Gowls
Kaiserslautern 1999–00 2 0 2 0
2000–01 29 9 4 0 12 2 45 11
2001–02 31 16 4 0 35 16
2002–03 32 9 4 4 0 0 36 13
2003–04 26 10 1 1 2 1 29 12
Total 120 44 13 5 14 3 147 52
Werder Bremen 2004–05 32 15 5 0 8 2 44 17
2005–06 26 25 5 2 9 4 40 31
2006–07 31 13 3 0 13 2 47 15
Total 89 53 13 2 30 8 132 63
Bayern Munich 2007–08 27 10 8 6 12 5 47 21
2008–09 26 10 4 3 8 7 38 20
2009–10 25 3 5 2 8 1 38 6
2010–11 20 1 4 3 2 1 26 5
Total 98 24 21 14 30 14 149 52
Total tal-karriera 308 121 47 21 74 25 429 167

Unuri[immodifika | immodifika s-sors]

Klabb[immodifika | immodifika s-sors]

Ġermanja Werder Bremen

Ġermanja Bayern Munich

Individwali[immodifika | immodifika s-sors]

Referenzi[immodifika | immodifika s-sors]

  1. ^ Sylwia Klose
  2. ^ (Ingliż) Klose set to leave Bayern. UEFA.com, 06-06-2011. Aċċess tal-URL: 06-06-2011.
  3. ^ (Ingliż) Klose leaves Bayern for Lazio. UEFA.com, 09-06-2011. Aċċess tal-URL: 09-06-2011.
  4. ^ (Ingliż) Klose call as Germans beat Albania. BBC Sport, 24-03-2001. Aċċess tal-URL: 08-06-2008.

Ħoloq esterni[immodifika | immodifika s-sors]