Hildesheim

Minn Wikipedija, l-enċiklopedija l-ħielsa
Jump to navigation Jump to search
Il-pjazza ewlenija ta' Hildesheim bil-binjiet tax-Xirkiet tal-Furnara u tal-Biċċiera

Hildesheim [ˈhɪldəsˌhaɪ̯m] hija belt f'Niedersachsen, il-Ġermanja, b'madwar 104,000 abitant.[1][2] Tinsab fid-distrett ta' Hildesheim, madwar 30 kilometru fix-Xlokk ta' Hanover max-xtut tax-xmara Innerste, tributarju żgħir tax-xmara Leine.

L-Imperatur Ruman Sagru Lwiġi d-Devot stabbilixxa l-Veskovat ta' Hildesheim fit-815 u ħoloq l-ewwel insedjament b'kappella fiż-żona hekk imsejħa Domhügel.

Hildesheim tinsab tul ir-rotta nru 7 tal-Autobahn, in-network ta' awtostradi Ġermaniżi, u b'hekk tinsab f'salib it-toroq bejn it-Tramuntana (Hamburg u lil hinn) u n-Nofsinhar tal-Ewropa.

Il-Katidral ta' Hildesheim u l-Knisja ta' San Mikiel tniżżlu bħala Sit ta' Wirt Dinji tal-UNESCO fl-1985.[3]

Fl-2015 il-belt u d-djoċesi ċċelebraw l-1,200 anniversarju tagħhom.[4]

Storja[immodifika | immodifika s-sors]

Snin bikrin[immodifika | immodifika s-sors]

Il-pjazza tas-suq attwali billejl

Hildesheim, waħda mill-eqdem bliet fit-Tramuntana tal-Ġermanja, saret is-sede tal-Veskovat ta' Hildesheim fit-815 u x'aktarx li ġiet stabbilita meta l-isqof ittrasferixxa ruħu minn Elze san-naħa l-oħra tax-xmara Innerste, li kienet suq importanti tul ir-rotta kummerċjali ta' Hellweg. L-insedjament madwar il-katidral malajr żviluppa f'raħal u ngħata d-drittijiet ta' suq mir-Re Otto III fid-983.[5] Oriġinarjament, is-suq kien jintrama fi triq imsejħa Alter Markt (Suq Antik) li għadha teżisti sa llum. L-ewwel suq ġie stabbilit madwar il-Knisja ta' San Indrija. Meta l-belt kibret iktar, sar meħtieġ suq ikbar. Is-suq attwali ta' Hildesheim ġie stabbilit għall-ewwel darba fil-bidu tas-seklu 13 meta l-belt kellha madwar 5,000 abitant.

Medju Evu[immodifika | immodifika s-sors]

Meta Hildesheim kisbet status ta' belt fl-1249, kienet waħda mill-ikbar bliet fit-Tramuntana tal-Ġermanja.[6] Il-kleru mexxa lil Hildesheim għal erba' sekli sħaħ, qabel ma nbena muniċipju u ċ-ċittadini kisbu influwenza u indipendenza. Il-kostruzzjoni tal-muniċipju attwali bdiet fl-1268.[7] Fl-1367 Hildesheim saret membru tal-Lega Anseatika. Bejn l-1519 u l-1523 faqqgħet gwerra fewdali bejn iċ-ċittadini u l-isqof tagħhom b'konsegwenzi ħorox.

Riforma tal-Knisja[immodifika | immodifika s-sors]

Il-Knisja ta' San Mikiel mill-ajru

Hildesheim saret Luterana fl-1542, u l-katidral u ftit binjiet oħra biss baqgħu f'idejn imperjali (Kattoliċi Rumani). Diversi villaġġi madwar il-belt baqgħu Kattoliċi Rumani wkoll.

Seklu 19[immodifika | immodifika s-sors]

Fl-1813, wara l-Gwerer ta' Napuljun, il-belt saret parti mir-Renju ta' Hanover, li ġie anness mir-Renju tal-Prussja bħala provinċja wara l-Gwerra bejn l-Awstrijaċi u l-Prussjani fl-1866. Fl-1868, is-suldati Prussjani sabu teżor ta' valur imprezzabbli ta' madwar 70 pożata u utensili tal-ikel u tax-xorb ta' żmien ir-Rumani, magħmula mill-fidda; l-hekk imsejjaħ Teżor ta' Hildesheim.

Bidu tas-seklu 20 u t-Tieni Gwerra Dinjija[immodifika | immodifika s-sors]

Ritratt mill-ajru ta' Hildesheim fl-1945

Fil-bidu tat-Tieni Gwerra Dinjija, bdew is-segregazzjonijiet tal-popolazzjoni Lhudija, u mijiet ta' Lhud ta' Hildesheim ġew deportati lejn kampijiet ta' konċentrament. Wieħed minnhom li baqa' notevoli kien Guy Stern. Il-belt ġarrbet ħsara estensivi minħabba l-attakki mill-ajru fl-1945, speċjalment fit-22 ta' Marzu. Minkejja li kellha ftit rilevanza militari, xahrejn qabel tmiem il-gwerra fl-Ewropa, il-belt storika ġiet ibbumbardjata bħala parti mid-Direttiva dwar il-Bumbardamenti mill-Ajru sabiex jitkisser il-moral tal-poplu Ġermaniż. 28.5 % tad-djar ġew meqruda għalkollox u 44.7 % minnhom ġarrbu xi ħsarat. 26.8 % tad-djar ma ġarrbux ħsarat. Iċ-ċentru, li kien irnexxielu jżomm il-karattru Medjevali tiegħu sa dak iż-żmien, inqered kważi għalkollox. Madwar 20-30 % tal-belt ġiet meqruda.[8] Bħal f'bosta bliet, ingħatat prijorità lill-kostruzzjoni rapida tad-djar li kienu tant meħtieġa, u strutturi tal-konkos ħadu post il-binjiet meqruda. Il-biċċa l-kbira tal-knejjes il-kbar, li tnejn minnhom issa jitqiesu bħala Sit ta' Wirt Dinji tal-UNESCO, reġgħu nbnew skont l-istil oriġinali ftit wara l-gwerra. Matul il-gwerra, diversi materjali ta' wirt storiku dinji kienu ġew moħbija taħt l-art taħt is-sur tal-belt.

L-aħħar tas-seklu 20 u l-preżent[immodifika | immodifika s-sors]

Kartolina tal-binja partikolari tal-Umgestülpter Zuckerhut

Fl-1978 ġiet stabbilita l-Università ta' Hildesheim. Fis-snin 80 tas-seklu 20 bdiet ir-rikostruzzjoni taċ-ċentru storiku tal-belt. Uħud mill-binjiet tal-konkos madwar il-pjazza fejn attwalment jintrama s-suq twaqqgħu u ġew sostitwiti b'repliki tal-binjiet oriġinali. Fil-ħarifa tal-2007, ittieħdet deċiżjoni biex issir ir-rikostruzzjoni tal-Umgestülpter Zuckerhut, dar ikonika b'qafas nofsu tal-injam li hija famuża għall-għamla mhux tas-soltu tagħha. Fl-2015 il-belt u d-djoċesi ċċelebraw l-1,200 anniversarju tagħhom fil-Jum ta' Niedersachsen.

Reliġjonijiet[immodifika | immodifika s-sors]

Fl-1542, il-biċċa l-kbira tal-abitanti saru Luterani. Illum il-ġurnata, 28.5 % tal-abitanti jidentifikaw lilhom infushom bħala Kattoliċi Rumani tad-Djoċesi ta' Hildesheim u 38.3 % bħala Protestanti tal-Knisja Luterana Evanġelika ta' Hanover. 33.0 % tal-abitanti jipprattikaw reliġjonijiet oħra jew ma għandhomx reliġjon. Sal-2015, l-Isqof Ortodoss Serbjan tal-Ġermanja kellu s-sede tiegħu f'Himmelsthür (lokalità ta' Hildesheim), qabel ma s-sede ġiet ittrasferita lejn Frankfurt u, fl-2018, lejn Düsseldorf.

It-Tempelhaus

Attrazzjonijiet ewlenin[immodifika | immodifika s-sors]

  • Il-Marktplatz (il-pjazza tas-suq storiku) ġiet rikostruwita fl-1984-1990 wara li kienet inqerdet b'attakk mill-ajru f'Marzu 1945. L-iżjed binjiet notevoli fil-pjazza huma:
    • il-Knochenhaueramtshaus (il-Binja tax-Xirka tal-Biċċiera), li oriġinarjament kienet inbniet fl-1529 u nqerdet fl-1945; ġiet rikostruwita bejn l-1987 u l-1989 skont il-pjanti oriġinali. Il-faċċata għandha dekorazzjonijiet sbieħ b'bosta pitturi kkuluriti u proverbji Ġermaniżi. Illum il-binja tospita ristorant u l-Mużew tal-Belt.
    • il-Bäckeramtshaus (il-Binja tax-Xirka tal-Furnara) hija dar b'qafas nofsu tal-injam li oriġinarjament kienet inbniet fl-1825. Ġiet meqruda fl-1945 u nbniet mill-ġdid bejn l-1987 u l-1989. Illum il-ġurnata tospita kafetterija.
    • il-Muniċipju, li nbena fis-seklu 13 bi stil Gotiku. Ġie parzjalment meqrud fl-1945, u mbagħad reġa' nbena u ġie inawgurat fl-1954.
    • it-Tempelhaus, dar aristokratika tas-seklu 14 bi stil tal-aħħar tal-Gotiku, li llum tospita l-uffiċċju tal-informazzjoni għat-turisti. Ġarrbet xi ħsarat matul it-Tieni Gwerra Dinjija iżda ġiet restawrata u inawgurata fl-1950.
    • il-Wedekindhaus, dar aristokratika tas-seklu 16 karatterizzata b'sulari għoljin u mnaqqxin b'bosta dettalji, b'ħoġor tat-twieqi b'figuri allegoriċi.
    • il-Lüntzelhaus li nbniet fl-1755 bi stil Barokk.
    • ir-Rolandhaus kienet inbniet oriġinarjament fis-seklu 14 bi stil Gotiku. Fl-1730, id-dar ġiet immudellata mill-ġdid, u ġew miżjuda portal Barokk u tieqa kbira.
    • l-iStadtschänke (it-Taverna tal-Belt) hija dar kbira b'qafas nofsu tal-injam li nbniet oriġinarjament fl-1666. Ir-Rococcohaus maġenbha nbniet fl-1730.
    • il-Wollenwebergildehaus (il-Binja tax-Xirka tan-Nissieġa) inbniet bejn wieħed u ieħor fis-sena 1600.
  • Il-Katidral Rumanesk ta' Santa Marija (il-Katidral ta' Hildesheim), flimkien mal-bibien antiki tal-bronż (magħrufa bħala l-Bibien ta' Bernward tal-ħabta tal-1015) u teżori oħra. Il-katidral inbena fis-seklu 9, iżda ġie meqrud kważi għalkollox fl-1945, u ġie rikostruwit ftit wara l-gwerra. Fl-1985 tniżżel bħala Sit ta' Wirt Dinji tal-UNESCO. Il-"Warda ta' Elf Sena" hija pjanta tal-ward selvaġġ li jingħad li għandha xi 1,000 sena, u allegatament hija l-iktar pjanta tal-ward antika fid-dinja. Għadha twarrad mal-ħajt tal-apsida tal-katidral.
    • Il-Mużew tal-Katidral: li fih it-Teżor tal-Katidral.
  • Il-Knisja ta' San Mikiel (Sit ta' Wirt Dinji tal-UNESCO flimkien mal-katidral) hija knisja Rumaneska bikrija u eżempju ta' arkitettura Ottonjana. Inbniet mill-1010 sal-1022.
  • Il-Knisja ta' San Indrija hija knisja Gotika tas-seklu 12 bl-ogħla kampnar (114.5-il metru) f'Niedersachsen. Faċċata tal-knisja hemm l-Umgestülpter Zuckerhut tal-1509.
  • Ir-Roemer-und-Pelizaeus-Museum, li huwa mużew b'kollezzjonijiet tal-qedem mill-Eġittu u mill-Perù b'wirjiet speċjali.
  • Il-Kreuzkirche (il-Knisja tas-Salib Imqaddes) oriġinarjament kienet parti mill-fortifikazzjonijiet Medjevali. Ġiet ikkonvertita f'knisja għall-ħabta tal-1079, ġarrbet ħsarat estensivi fl-1945, u reġgħet inbniet wara l-gwerra.
  • Il-Bażilika Rumaneska Minuri ta' San Gottardu, li nbniet bejn l-1133 u l-1172, li hija skedata biex titniżżel fil-lista tas-Siti ta' Wirt Dinji tal-UNESCO fil-ġejjieni qarib. Faċċata tal-knisja hemm binjiet notevoli oħra: il-Kappella ta' San Nikola, li hija eks knisja parrokkjali li nbniet bi stil Rumanesk fis-seklu 12 u ġiet ittrasformata f'binja residenzjali wara l-1803, u l-Isptar tal-Ħames Ġerħiet li hija dar b'qafas nofsu tal-injam li jmur lura għall-1770.
  • Il-Knisja ta' San Lamberti hija binja tal-aħħar tal-Gotiku, fejn isiru serje ta' kunċerti kull ġimgħa fil-ħin tas-suq.
  • Il-Kehrwiederturm (it-Torri ta' Kehrwieder), li nbena madwar l-1300, huwa l-unika torri li fadal mill-fortifikazzjonijiet Medjevali.
  • Id-djar b'qafas nofsu tal-injam li ma nqerdux matul it-Tieni Gwerra Dinjija jinsabu madwar il-Knisja ta' San Gottardu u t-Torri ta' Kehrwieder, fit-toroq imsejħa Keßlerstraße, Knollenstraße, Gelber Stern, Am Kehrwieder, Lappenberg, Brühl, Hinterer Brühl, u fil-pjazza Godehardsplatz. Uħud minnhom għandhom tinqix mirqum fl-injam fil-faċċati tagħhom, pereżempju l-Wernersches Haus (1606) f'Godehardsplatz u l-Waffenschmiedehaus (1548) f'Gelber Stern.
  • Il-Knisja ta' San Ġakbu hija knisja tal-pellegrini li għandha 500 sena u nbniet bi stil Gotiku. Hija waħda mill-ħafna kappelli u knejjes fil-Pellegrinaġġ ta' San Ġakbu. Illum il-knisja hija knisja kulturali b'enfasi fuq il-letteratura.
  • Il-Monument tas-Sinagoga (ikkonsagrat fl-1849 u meqrud fl-1938 matul il-Kristallnacht) inbena fl-1988 fil-kwartier Lhudi antik fit-triq ta' Lappenberg. Il-pedamenti ġew rikostruwiti sabiex min iżurhom ikollu idea ta' kemm kienet kbira s-sinagoga. Il-binja ħamranija tal-brikks, li nbniet faċċata għall-ħabta tal-1840, kienet skola tal-Lhud.
  • Il-Mauritiuskirche (il-Knisja ta' San Mawrizju) hija knisja Rumaneska tas-seklu 11 u tinsab fuq għolja fil-Punent tal-belt fil-kwartier ta' Moritzberg bi kjostru. Fuq ġewwa, il-knisja hija Barokka, u fl-1765 ġie miżjud torri.
  • Il-Kaiserhaus (id-Dar tal-Imperatur) hija binja Rinaxximentali tal-1586 fl-Alter Markt, l-eqdem triq ta' Hildesheim, li reġgħet inbniet wara l-gwerra. Il-faċċata hija mżejna bi statwi u medaljuni Rumani. Faċċata tagħha hemm tieqa notevoli tal-blat ramli li tmur lura għall-1568. Oriġinarjament, kienet ta' dar privata li twaqqgħet fl-aħħar tas-seklu 19. It-tieqa ġiet ikkonservata u ġiet miżjuda ma' dar oħra fil-parti tal-Lvant ta' Hildesheim li ma ġarrbitx ħsarat matul it-Tieni Gwerra Dinjija. It-tieqa mbagħad tneħħiet minn hemm meta d-dar ġiet immudellata mill-ġdid u ġiet miżjuda mal-iskola fl-1972 fejn tinsab attwalment.[9]
  • Qrib il-Kaiserhaus, hemm l-Alte Kemenate, dar u maħżen Medjevali notevoli b'għoli ta' 5.5 metri, wara l-iskola fit-triq imsejħa Alter Markt. Għandha bażi rettangolari ta' 6.5 metri b'5.0 metri u kantina b'kostruzzjoni bil-volti.[10] Id-dar u maħżen, waħda mill-eqdem binjiet profani f'Hildesheim, inbniet bil-blat ramli u bi stil Gotiku fis-seklu 15. Skont sorsi oħra jaf kienet saħansitra iktar antika minn hekk, jiġifieri nbniet bejn l-aħħar tas-seklu 11 u nofs is-seklu 13.[11] Il-binja għandha żewġ sulari. Peress li ma kinitx tal-injam, ma nħarqitx fl-1945, iżda ġarrbet biss xi ħsarat u ġiet irrestawrata minnufih wara l-gwerra. Mill-1945 sal-1951 intużat għal skopijiet residenzjali. L-Alte Kemenate mhijiex miftuħa għall-pubbliku.
  • Il-Knisja ta' Santa Maddalena (Magdalenenkirche) hija knisja żgħura bi twieqi tawwalin u dojoq kbar fit-triq storika ta' Alter Markt, li ġiet ikkonsagrata fl-1224. Oriġinarjament inbniet bi stil Rumanesk, iżda ġiet imkabbra u mmudellata mill-ġdid bi stil Gotiku fl-1456. Fiha artal tal-injam (tal-ħabta tal-1520) b'tinqix u opri tal-arti oħra. It-triq iż-żgħira msejħa Süsternstraße fiha parti ppreservata tajjeb tas-sur Medjevali tal-belt b'torri tond. Faċċata tal-knisja hemm dar b'qafas nofsu tal-injam li ġiet rikostruwita fl-1981 mas-sur Medjevali tal-belt fit-triq żgħira sekondarja msejħa Mühlenstraße. Il-faċċata tagħha hija mżejna b'tinqix fl-injam.
  • Il-Magdalenengarten huwa park Barokk li ġie stabbilit fl-1720-1725, u jinsab qrib il-Knisja ta' Santa Maddalena. Hemm bosta tipi differenti ta' pjanti tal-ward, mużew tal-ward, paviljuni, statwi Barokki, parti ppreservata tajjeb tas-sur Medjevali tal-belt u saħansitra għalqa bid-dwieli li minnha jiġu prodotti bejn 100 u 200 flixkun tal-inbid fis-sena. Fir-rebbiegħa, speċi rara ta' tulipan isfar selvaġġ (tulipa sylvestris) tarmi l-fjuri fil-parti tal-Punent tal-park.
  • Il-Knisja ta' San Bernward hija knisja neo-Rumaneska li nbniet fl-1905-1907, inqerdet fl-1945 u ġiet rikostruwita mill-1948 sal-1949; fiha artal tal-injam Gotiku li jmur lura għall-bidu tas-seklu 15.
  • Parti mis-sistema tad-difiża Medjevali, li tikkonsisti minn sur bi ħniedaq mimlijin ilma u swar sekondarji li nbnew madwar il-belt fis-seklu 13, hija ppreservata sew. Il-Kalenberger Graben, lag artifiċjali, huwa parti minn din is-sistema li hija mdawra bil-park Magdalenengarten.
  • Il-Kastell ta' Steuerwald (Burg Steuerwald) fit-Tramuntana tal-belt, madwar tliet kilometri mill-Pjazza tas-Suq, inbena fl-1310-1313. It-torri tiegħu ta' 25 metru ġie miżjud fl-1325. Il-kappella, iddedikata lil Santa Maddalena, oriġinarjament inbniet bi stil Rumanesk u ġiet ittrasformata f'kappella Gotika fl-1507. Illum il-ġurnata tintuża għat-tiġijiet u l-kunċerti.
  • Il-Kastell ta' Marienburg (Burg Marienburg) jinsab fix-Xlokk ta' Hildesheim, madwar sitt kilometri mill-Pjazza tas-Suq. Inbena bejn l-1346 u l-1349.
  • Sorsum huwa villaġġ antik fil-Punent ta' Hildesheim li sar parti mill-belt fl-1974. Hemm żona rurali li ġiet stabbilita fil-Medju Evu, u li ġiet ittrasformata f'żona residenzjali wara s-sena 2000. It-torri tal-ħamiem, li nbena fl-1733, il-matmura l-kbira tal-1786 u l-ikbar dar rurali tal-1734 huma l-iżjed attrazzjonijiet notevoli f'din il-parti rurali ta' Hildesheim.
  • Il-Prijorat ta' Marienrode (Kloster Marienrode) jinsab fil-Lbiċ ta' Hildesheim, madwar sitt kilometri mill-Pjazza tas-Suq. Ġie stabbilit fl-1125. Il-ġebla tax-xewka tal-knisja attwali ġiet stabbilita fl-1412. Il-knisja nbniet bi stil Gotiku bi tliet navati u tlestiet fl-1462. It-turretta Barokka fit-tarf ġiet miżjuda fis-seklu 18. Fil-knisja hemm żewġ artali Barokki notevoli li jmorru lura għall-ħabta tal-1750 u skultura Gotika tal-blat ramli ta' Santa Marija li saret fl-1460. L-orgni jmur lura għal nofs is-seklu 18. Kappella żgħira ta' San Cosmas u Damjan, li nbniet fl-1792, ġiet ikkonvertita fi knisja Protestanta żgħira fl-1830. Il-prijorat ġie xolt fl-1806, iżda ġie rritornat lill-Knisja Kattolika fl-1986. Mill-1988 ġie mmexxi mis-sorijiet. Ħdejn il-monasteru hemm għadira kbira bil-ħut u raddiena tar-riħ għolja li nbniet fl-1839.
L-arkitettura Ottonjana tal-Knisja ta' San Mikiel f'Hildesheim

Postijiet oħra ta' interess jinkludu t-teatru, li joffri spettakli tal-opri, operetti u musicals, reċti, żfin klassiku u kunċerti.

Inkorporazzjonijiet[immodifika | immodifika s-sors]

  • 1911: Moritzberg
  • 1912: Steuerwald
  • 1938: Drispenstedt u Neuhof
  • 1971: Ochtersum
  • 1974: Achtum-Uppen, Bavenstedt, Einum, Himmelsthür, Itzum, Marienburg, Marienrode u Sorsum
Is-saqaf impitter tal-injam tal-Knisja ta' San Mikiel

Sit ta' Wirt Dinji[immodifika | immodifika s-sors]

Il-Katidral ta' Hildesheim u l-Knisja ta' San Mikiel ġew iddeżinjati bħala Sit ta' Wirt Dinji tal-UNESCO fl-1985. Fl-2008 kien hemm modifika żgħira fil-konfini tas-sit.[3]

Il-valur universali straordinarju tas-sit ġie rrikonoxxut abbażi ta' tliet kriterji tal-għażla tal-UNESCO: il-kriterju (i) "Rappreżentazzjoni ta' kapulavur frott il-kreattività tal-bniedem"; il-kriterju (ii) "Wirja ta' skambju importanti ta' valuri umani, tul perjodu ta' żmien jew fi ħdan żona kulturali fid-dinja, dwar l-iżviluppi fl-arkitettura jew it-teknoloġija, l-arti monumentali, l-ippjanar tal-bliet jew id-disinn tal-pajsaġġ"; u l-kriterju (iii) "Xhieda unika jew minn tal-inqas eċċezzjonali ta' tradizzjoni kulturali jew ta' ċivilizzazzjoni li għadha ħajja jew li għebet".[3]

Demografija[immodifika | immodifika s-sors]

Storja tal-popolazzjoni[immodifika | immodifika s-sors]

Il-Katidral ta' Hildesheim

Fil-31 ta' Diċembru 2017 Hildesheim kellha 103,970 abitant.[12]

Popolazzjoni storika
Sena Pop. ±%
1400 6,000 —    
1450 8,000 +33.3 %
1648 5,500 −31.2 %
1803 11,108 +102.0 %
1825 12,630 +13.7 %
1849 14,651 +16.0 %
1871 20,801 +42.0 %
1875 22,581 +8.6 %
1890 33,481 +48.3 %
1900 42,973 +28.4 %
1910 50,239 +16.9 %
1919 53,499 +6.5 %
1925 58,522 +9.4 %
1933 62,519 +6.8 %
1939 72,101 +15.3 %
1950 65,531 −9.1 %
1961 96,296 +46.9 %
1970 93,400 −3.0 %
1975 106,000 +13.5 %
1980 102,700 −3.1 %
1985 100,900 −1.8 %
1989 103,512 +2.6 %
1997 105,700 +2.1 %
2002 103,448 −2.1 %
2013 100,708 −2.6 %
2015 101,667 +1.0 %
2017 103,970 +2.3 %
2019 101,693 −2.2 %

L-ikbar gruppi minoritarji[immodifika | immodifika s-sors]

Il-lista li ġejja turi l-ikbar gruppi barranin fil-belt ta' Hildesheim mill-2013:[13]

Klass. Nazzjonalità Popolazzjoni (2016)
1 Turkija 2,395
2 Polonja 764
3 Serbja 474
4 Italja 442
5 Iraq 299
6 Sirja 268
7 Russja 254
8 Bulgarija 243

Lista ta' sindki ta' Hildesheim[immodifika | immodifika s-sors]

  • 1803–1843: Georg Otto Ferdinand Lohde
  • 1843–1848: Carl Christoph Lüntzel
  • 1848: Ikkummissjonat minn Oberg, Starke, u Wynecken
  • 1848–1852: Amtsassessor Domeier
  • 1853–1875: Paul Johann Friedrich Boysen
  • 1876–1895: Gustav Struckmann
  • 1895–1896: Hans Ukert, mhux bħala sindku
  • 1896–1909: Gustav Struckmann, elett mill-ġdid
  • 1909–1937: Ernst Ehrlicher
  • 1945–1946: Erich Bruschke
  • 1946–1950: Albin Hunger
  • 1950–1952: Friedrich Lekve
  • 1952–1958: Albin Hunger, elett mill-ġdid
  • 1958–1959: Paul Lienke
  • 1959–1964: Martin Boyken
  • 1964–1968: Friedrich Nämsch
  • 1968–1972: Martin Boyken, elett mill-ġdid
  • 1972–1975: Friedrich Nämsch, elett mill-ġdid
  • 1975–1981: Heiko Klinge
  • 1981–1991: Gerold Klemke
  • 1991–2001: Kurt Machens
  • 2001–2005: Dr. Ulrich Kumme
  • 2005–2014: Kurt Machens, elett mill-ġdid
  • 2014–present: Dr. Ingo Meyer

Ġemellaġġ[immodifika | immodifika s-sors]

Hildesheim hija ġemellata ma':[14]

  • Angoulême, Franza (1965)
  • Minya, l-Eġittu (1975)
  • Weston-super-Mare, l-Ingilterra, ir-Renju Unit (1983)
  • Gelendzhik, ir-Russja (1992)
  • North Somerset, l-Ingilterra, ir-Renju Unit (1997)
  • Pavia, l-Italja (2000)

Avvenimenti ta' interess internazzjonali[immodifika | immodifika s-sors]

  • Il-Festival ta' M'era Luna, l-iktar avveniment importanti tax-xena Gotika fl-Ewropa
  • Il-Festival "Jazztime" li jsir fi tmiem il-ġimgħa ta' Pentekoste (f'Mejju jew f'Ġunju)

Ekonomija[immodifika | immodifika s-sors]

Hildesheim tospita għadd ta' korporazzjonijiet multinazzjonali notevoli – kif ukoll bosta kumpaniji ta' daqs medju b'saħħithom – fosthom Bosch, Fairchild u Coca-Cola. Blaupunkt falliet u Krupp&Thyssen għamlu fużjoni u saru KSM Castings Group li fl-aħħar tal-2020 kien fi proċess ta' falliment.

Trasport[immodifika | immodifika s-sors]

Hildesheim għandha infrastruttura tat-traffiku effiċjenti: hija hub reġjonali għat-toroq u l-linji ferrovjarji interstatali (l-istazzjon ċentrali ta' Hildesheim Hauptbahnhof huwa moqdi minn servizzi tal-InterCityExpress), hija kollegata mal-Autobahn, għandha port fil-mogħdija tal-ilma artifiċjali tal-Mittellandkanal, kif ukoll l-Ajrudrom ta' Hildesheim.

Edukazzjoni[immodifika | immodifika s-sors]

Hemm bosta skejjel sekondarji: Gymnasium Andreanum, Gymnasium Marienschule, Gymnasium Josephinum Hildesheim, Scharnhorstgymnasium Hildesheim, Goethegymnasium Hildesheim, Michelsenschule, Gymnasium Himmelsthür. Barra minn hekk hemm skejjel oħra: Freie Waldorfschule Hildesheim, Robert-Bosch-Gesamtschule. Friedrich-List-Schule (Fachgymnasium Wirtschaft), Herman-Nohl-Schule (Fachgymnasium Gesundheit und Soziales), Walter-Gropius-Schule (Berufsbildende Schule), Werner-von-Siemens-Schule (Fachgymnasium Technik), Elisabeth-von-Rantzau-Schule (Fachakademie für Sozialmanagement).

Wieħed jista' jikseb edukazzjoni terzjarja fl-Università ta' Hildesheim jew fil-Hochschule für angewandte Wissenschaft und Kunst (HAWK), permezz tal-kooperazzjoni mal-bliet ta' Holzminden u Göttingen.

Kultura[immodifika | immodifika s-sors]

Il-komunità ta' Hildesheim għandha s-sede tal-Eparkija Ortodossa Serbjana ta' Frankfurt u tal-Ġermanja kollha.

Ludolf van Ceulen

Residenti notevoli[immodifika | immodifika s-sors]

  • Klaus Berger, (twieled fl-1940), teologu
  • San Bernward, (960-1022), isqof ta' Hildesheim
  • Adolf Bertram (1859-1945), isqof Kattoliku Ruman Ġermaniż
  • Andreas Bovenschulte (twieled fl-1965), politiku
  • Ludolph van Ceulen, (1540–1610), matematiku
  • Nadine Chanz, (twieldet fl-1972), playmate ta' Playboy
  • Bernd Clüver, (1948–2011), crooner (It-tifel bl-armonika)
  • Wolfgang Danne, (twieled fl-1941), figure skater
  • Catharina Helena Dörrien, (1717-1795), botanika
  • San Gottardu, (960-1038), isqof ta' Hildesheim
  • Uwe Gronostay, (1939-2008), kap tal-kor
  • Jakob Guttmann (1845-1919), rabbi ewlieni, filosfu, pedagogu
  • Ġwanni ta' Hildesheim (1310/1320-75), kittieb u patri Karmlitan
  • Julius Guttmann (1880-1950), rabbi Ġermaniż u Iżraeljan, filosfu u storiku Lhudi
  • Karl Hamann, (1903-73), fl-1948-51 kien il-president tal-LDPD u ministru
  • Prinċep Ernst August ta' Hanover (twieled fl-1983), twieled f'Hildesheim.
  • Petra Hartmann, (twieldet fl-1970), awtriċi u xjenzata tal-letteratura
  • Hubertus Heil (twieled fl-1972), politiku (SPD)
  • Wilhelm Hennis, (1923–2012), xjenzat politiku
  • Frederick Hornemann, (1772–1801), esploratur Ġermaniż Afrikan
  • Adolf Hurwitz, (1859–1919), matematiku Ġermaniż
  • Wilhelm Koppe, (1896–1975), Obergruppenführer Ġermaniż u Ġeneral tal-Waffen-SS u l-Pulizija
  • Hans Adolf Krebs, (1900–81), fiżiku u bijokimiku, Fiżjoloġija u Mediċina fl-1953
  • Diane Kruger, (twieldet fl-1976), supermudella u attriċi, li ħadmet f'Troy
  • Heinrich Nordhoff (1899–1968), inġinier, President tal-Volkswagen u esponent ewlieni fl-istorja tal-VW Beetle
  • Didrik Pining, (1430-1491), esploratur tat-Tramuntana tal-Atlantiku, twieled f'Hildesheim
  • Erich Pommer (1889–1966), produttur tal-films, twieled f'Hildesheim
  • Thomas Quasthoff, (twieled fl-1959), kantant bass-baritonu Ġermaniż
  • Henry Rathbone, (1837-1911), Konslu tal-Istati Uniti, mitfuħ f'istitut mentali f'Hildesheim wara l-qtil ta' martu peress li ġie meqjus li kellu problemi mentali
  • Ferdinand von Roemer, (1818–91), ġeologu, twieled f'Hildesheim.
  • Michael Schenker, (twieled fl-1955), kitarrista tar-rock Ġermaniż, membru fundatur tal-iScorpions u l-band mużikali UFO
  • Rudolf Schenker, (twieled fl-1948), kitarrista u membru fundatur tal-iScorpions, twieled f'Hildesheim.
  • Oskar Schindler (1908-1974) industrijalista Ġermaniż, li miet f'Hildesheim
  • Eberhard Schlotter, (1921-2014), pittur u artist grafiku
  • Wolfram Sievers, (1905-1948), kriminal tal-gwerra Nażist u direttur ta' Ahnenerbe, ġustizzjat għal reati tal-gwerra
  • Bruno Snell, (1886-1986), filologu klassiku
  • Guy Stern, (twieled fl-1922), kritiku letterarju Amerikan u ċittadin onorarju tal-belt
  • Maik Taylor, (twieled fl-1971), plejer tal-futbol tal-Irlanda ta' Fuq u ta' Birmingham City.
  • It-tewmin Wolfgang u Christoph Lauenstein, (twieldu fl-1962), rebbieħa ta' Academy Award fl-1989 għall-film tagħhom Balance.
  • Wilhelm Wachsmuth (1784-1866), storiku

Referenzi[immodifika | immodifika s-sors]

  1. ^ "Demographics Hildesheim" (PDF).
  2. ^ "Landesamt für Statistik Niedersachsen". www.statistik.niedersachsen.de. Miġbur 2021-09-19.
  3. ^ a b c Centre, UNESCO World Heritage. "St Mary's Cathedral and St Michael's Church at Hildesheim". UNESCO World Heritage Centre (bl-Ingliż). Miġbur 2021-09-19.
  4. ^ gmbh, mps public solutions. "Sonderprägung „1200 Jahre Hildesheim"". www.hildesheim.de (bil-Ġermaniż). Miġbur 2021-09-19.
  5. ^ Neigenfind, W.: Unsere schöne Stadt, p. 46. Hildesheim 1964.
  6. ^ Neigenfind, W.: Unsere schöne Stadt, p. 38. Hildesheim 1964.
  7. ^ Borck, Heinz-Günther: Der Marktplatz zu Hildesheim, p. 24. Hildesheim 1989.
  8. ^ "Arkivji Hildesheim" (PDF).
  9. ^ Segers-Glocke, Christiane: Baudenkmale in Niedersachsen, Band 14.1. - Hildesheim, p. 109. Hameln 2007.
  10. ^ Segers-Glocke, Christiane: Baudenkmale in Niedersachsen, Band 14.1. - Hildesheim, p. 108. Hameln 2007.
  11. ^ Stadtgeschichte auf dem Hinterhof. - Hildesheimer Allgemeine Zeitung, 23 June 2009, p. 9.
  12. ^ gmbh, mps public solutions. "Fläche und Bevölkerung". www.hildesheim.de (bil-Ġermaniż). Miġbur 2021-09-19.
  13. ^ "Data tal-2013" (PDF).
  14. ^ gmbh, mps public solutions. "Partnerstädte". www.hildesheim.de (bil-Ġermaniż). Miġbur 2021-09-19.