Aqbeż għall-kontentut

Hans Memling

Minn Wikipedija, l-enċiklopedija l-ħielsa
Hans Memling
Ħajja
Twelid Seligenstadtu Mainzc. 1435, 1433, 1430
Nazzjonalità Nofsinhar tan-Netherlands
Ġermanja
Mewt Bruges, 11 Awwissu 1494
Post tad-dfin Sint-Gilliskerk Brugge (en) Translate
Edukazzjoni
Lingwi Ġermaniż
Għalliema Rogier van der Weyden
Okkupazzjoni
Okkupazzjoni pittur
artist
artist viżiv
Post tax-xogħol Köln
Brussell
Bruges
Xogħlijiet importanti St John Altarpiece (en) Translate
Qerda tal-innoċenti
L-Aħħar Ġudizzju
Trittiku ta' Greverade
Dittiku ta' Maarten Nieuwenhove
Dittiku ta' Bembo
Tommaso di Folco Portinari (1428–1501); Maria Portinari (Maria Maddalena Baroncelli, born 1456) (en) Translate
Master of the Prado Adoration of the Magi (en) Translate
Ritratt ta' Raġel
Ritratt ta' Raġel Xiħ
Ritratt ta' raġel tal-familja Lespinette
Ritratt ta' Mara Xiħa
The Canon Gilles Joye (en) Translate
Ritratt ta' Jacob Obrecht
Portrait of a Man in a Red Hat (en) Translate
Dittiku ta' żewġ donaturi
Dittiku ta' koppja anzjana
Christ with singing and music-making Angels (en) Translate
Xeni mill-Passjoni ta' Kristu
Triptych of the Rest on the Flight into Egypt (en) Translate
Trittiku ta' Jan Crabbe
Trittiku tal-Adorazzjoni tal-Maġi
Trittiku ta' Donne
Moreel Triptych (en) Translate
Virgin and Child with St Anthony the Abbot and a Donor (en) Translate
Madonna ta' Jacob Floreins
Moviment pittura bikrija tan-Netherlands

Hans Memling (spellut Memlinc ukoll; twieled għall-ħabta tal-1430 – miet fil-11 ta' Awwissu 1494) kien pittur attiv fil-Fjandri, li ħadem skont it-tradizzjoni tal-pittura bikrija tan-Netherlands. Huwa twieled fir-reġjun tal-Main Nofsani u x'aktarx li qatta' tfulitu f'Mainz, il-Ġermanja. Huwa ttrasferixxa ruħu fin-Netherlands u qatta' xi żmien fl-istudjo ta' Rogier van der Weyden fi Brussell, il-Belġju. Sussegwentement għamluh ċittadin ta' Bruges fl-1465, fejn sar wieħed mill-artisti ewlenin, u kellu studjo kbir, fejn tpittru xogħlijiet reliġjużi li sikwit kienu jinkorporaw ritratti tal-patruni għonja tiegħu. Il-patruni ta' Memling kienu jinkludu bankiera, merkanti, politiċi, membri tal-kleru u aristokratiċi.[1]

Ir-ritratti ta' Memling kienu msejsa fuq l-istili li tgħallem meta kien żagħżugħ. Huwa kiseb suċċess kbir, u fl-1480 ġie elenkat fost l-iżjed ċittadini għonja f'lista tat-taxxi tal-belt.

Huwa żżewweġ lil Anna de Valkenaere f'xi żmien bejn l-1470 u l-1480, u flimkien kellhom tlett itfal. L-arti ta' Memling ġiet skoperta mill-ġdid fis-seklu 19, u reġgħet kisbet popolarità kbira.

Ħajja u xogħlijiet[immodifika | immodifika s-sors]

Madonna bil-Bambin flimkien ma' San Ġakbu u San Duminku (1488-1490) f'hekk imsejjaħ "tapit ta' Memling".[2]

Imwieled f'Seligenstadt[3], qrib Frankfurt fir-reġjun tal-Main Nofsani, Memling wettaq l-apprendistat tiegħu f'Mainz jew f'Köln u iktar 'il quddiem ħadem fin-Netherlands taħt Rogier van der Weyden (għall-ħabta tal-1455 u l-1460) fi Brussell, id-Dukat ta' Brabant. Imbagħad mar jaħdem fi Bruges, il-Kontea tal-Fjandri għall-ħabta tal-1465.[3]

Huwa pitter għall-Kavallieri ta' San Ġwann fl-1479 u fl-1480. Fl-1477, meta kien maħsub li kien miet, fil-fatt kellu kuntratt biex joħloq opra għal fuq l-artal tal-knisja tax-xirka tal-bejjiegħa tal-kotba ta' Bruges. Din l-opra, Xeni tal-Passjoni ta' Kristu, issa tinsab fil-Galleria Sabauda ta' Torino, l-Italja. L-Aħħar Ġudizzju, li ilha tinsab fi Gdańsk, il-Polonja (dak iż-żmien il-Ġermanja), mill-1473, tinsab fil-Mużew Nazzjonali ta' hemmhekk. L-Aħħar Ġudizzju ġiet ikkummissjonata minn Angelo Tani, li dak iż-żmien kien id-direttur tal-fergħa ta' Bruges tal-Bank tal-Medici, għal kappella f'dik li issa hija l-Badia Fiesolana fi Fiesole. Meta t-trittiku jingħalaq, Tani u martu jidhru għarkopptejhom jitolbu. It-trittiku ġie ttrasportat lejn Fiesole fuq bastiment li nħataf minn Paul Beneke f'April 1473.

L-Aħħar Ġudizzju, 1466-1473, il-Mużew Nazzjonali ta' Gdańsk

L-eqdem allużjonijiet għal pitturi marbuta ma' Memling huma marbuta mar-relazzjonijiet tiegħu mal-qorti tal-Istat Burgundjan fi Brussell. L-inventarji ta' Margarita tal-Awstrija, imfassla fl-1524, jalludu għal trittiku tal-Alla tal-Ħniena ta' Rogier van der Weyden, fejn il-partijiet tal-ġnub bl-anġli ġew impittra mill-"Mastru Hans".

Il-pittura ta' Ġwanni l-Battista ta' Memling (għall-ħabta tal-1470) tinsab fil-gallerija ta' Munich, il-Ġermanja.

Ir-ritratti ta' Memling, b'mod partikolari, kienu popolari fl-Italja.[4] Skont Paula Nuttall, il-kontribut siewi ta' Memling għar-ritratti kien l-użu tiegħu tal-isfondi pajsaġġistiċi, ikkaratterizzati minn "kuntrast ibbilanċjat bejn fuq u isfel, quddiem u l-isfond: il-parti ewlenija b'ras is-suġġett ibbilanċjata bil-kobor newtrali tas-sema, u l-parti newtrali tal-ispalel mogħtija l-ħajja permezz tad-dettall tal-pajsaġġ fl-isfond".[5] L-istil tar-ritratti ta' Memling influwenza x-xogħol ta' bosta pitturi Taljani tal-aħħar tas-seklu 15[6], kif huwa evidenti fix-xogħlijiet ta' pereżempju Raffaello, Ritratti ta' Agnolo u Maddalena Doni.[7] Ix-xerrejja tal-pitturi tiegħu jinkludu l-Kardinal Grimani u l-Kardinal Bembo f'Venezja, kif ukoll il-kapijiet tal-Familja Medici f'Firenze.

Pitturi oħra jinkludu l-Madonna u l-Qaddisin (li għaddiet mill-kollezzjoni ta' Duchatel għal-Louvre f'Pariġi, Franza), il-Madonna bil-Bambin (impittra għal Sir John Donne u li issa tinsab fil-Gallerija Nazzjonali ta' Londra, ir-Renju Unit), u l-erba' ritratti attribwiti fl-Uffizi ta' Firenze (inkluż ir-Ritratt ta' Folco Portinari), ix-Xeni mill-Passjoni ta' Kristu fil-Galleria Sabauda ta' Torino u l-Wasla u t-Trijonf ta' Kristu.

Għall-ħabta tal-1492, Memling ġie kkummissjonat biex ipitter l-opra ta' fuq l-artal ta' Najera għall-Monasteru Benedittin ta' Santa Maria la Real f'Najera, La Rioja, Spanja. L-opra ta' fuq l-artal, li tlestiet fil-Fjandri, kienet tikkonsisti minn xbieha ta' Alla mdawwar bl-anġli jdoqqu varjetà ta' strumenti mużikali fuq ringiela sħab bi sfond lewn id-deheb. Studju reċenti ta' Bart Fransen iddetermina li Gonzalo de Cabredo u l-Patri Superjuri Pablo Martinez kienu kkummissjonaw il-ħolqien ta' din l-opra tal-arti.[8]

Trittiku tal-Vanità Dinjija u s-Salvazzjoni Divina (minn quddiem; tal-ħabta tal-1485)

Memling kiseb biżżejjed prosperità biex ismu jidher f'lista tat-875 ċittadin l-iktar għonja ta' Bruges li b'mod obbligatorju kellhom jikkontribwixxu għas-self miġbur minn Massimiljanu I tal-Awstrija sabiex jiġu ffinanzjati l-ostilitajiet lejn Franza fl-1480.[9] Isem Memling ma jibqax jidher fil-listi sussegwenti ta' din ix-xorta.[10]

Iktar 'il quddiem f'ħajtu, Memling pitter is-Santwarju ta' Santa Ursula fil-mużew tal-isptar ta' Bruges, San Kristofru u l-Qaddisin (1484) fl-akkademja, id-Dittiku ta' Maarten van Nieuwenhove fl-isptar ta' Bruges, u Kurċifissjoni kbira, b'xeni mill-Passjoni ta' Kristu (1491), mill-Katidral ta' Lübeck, li issa tinsab fil-Mużew ta' Sant'Anna f'Lübeck. Lejn l-aħħar tal-karriera ta' Memling, ir-reġistri tax-xirka tal-pitturi fi Bruges isemmu l-ismijiet ta' żewġ apprendisti li ħadmu ma' Memling u li ħallsu l-miżati tagħhom biex ikunu parti mix-xirka fl-1480 u fl-1486.

Memling miet fi Bruges. Il-fiduċjarji tat-testment tiegħu dehru quddiem il-qorti fi Bruges fl-10 ta' Diċembru 1495, u r-rekords jindikaw li Memling ħalla warajh diversi tfal u proprjetà konsiderevoli.[11]

Twapet ta' Memling[immodifika | immodifika s-sors]

Hemm erba' xogħlijiet ta' Memling li jidhru f'tapit Orjentali. Dawn huma t-Trittiku bil-Madonna u l-Bambin fuq it-Tron (li jinsab fil-Mużew tal-Istorja tal-Arti fi Vjenna, l-Awstrija), it-Trittiku ta' John Donne (li jinsab fil-Gallerija Nazzjonali ta' Londra, ir-Renju Unit), il-Madonna bil-Bambin fuq it-Tron flimkien ma' familja kbira (li tinsab fil-Louvre f'Pariġi, Franza), u r-Ritratt ta' żagħżugħ jitlob (li tinsab f'Madrid fil-Fundacion Coleccion Thyssen-Bornedmisza). Dawn kollha għandhom mudell ripetut b'mod indefinit li huwa rappreżentattiv ta' tip arkajku ta' tiżjin fit-twapet Torok mill-Anatolja jew mill-Armenja. Dawn it-tipi ta' twapet ingħataw kunjom Memling u huma magħrufa bħala t-twapet ta' Memling. Huma kkaratterizzati minn linji b'qishom "ganċijiet" li jirradjaw minn korp ċentrali.[12]

Referenzi[immodifika | immodifika s-sors]

  1. ^ "Memling [Memlinc], Hans". Grove Art Online (bl-Ingliż).
  2. ^ King, Donald and Sylvester, David eds. The Eastern Carpet in the Western World, From the 15th to the 17th century, p. 57, Arts Council of Great Britain, Londra, 1983, ISBN 0-7287-0362-9
  3. ^ a b Murray, P. and Murray, L. (1963) The Art of the Renaissance. London: Thames & Hudson, p. 156. ISBN 978-0-500-20008-7
  4. ^ Borchert, Till-Holger (2005). Memling's Portraits. Thames & Hudson. ISBN 0-500-09326-1. p. 70.
  5. ^ Borchert, Till-Holger (2005). Memling's Portraits. Thames & Hudson. ISBN 0-500-09326-1. p. 74.
  6. ^ Borchert, Till-Holger (2005). Memling's Portraits. Thames & Hudson. ISBN 0-500-09326-1. p. 78.
  7. ^ Borchert, Till-Holger (2005). Memling's Portraits. Thames & Hudson. ISBN 0-500-09326-1. p. 83.
  8. ^ Fransen, Bart (February 2018). "Hans Memling's Najera Altarpiece: New Documentary Evidence". Burlington Magazine. 160: 101–105.
  9. ^ Borchert, Till-Holger (2005). Memling's Portraits. Thames & Hudson. ISBN 0-500-09326-1. p. 15.
  10. ^ Borchert, Till-Holger (2005). Memling's Portraits. Thames & Hudson. ISBN 0-500-09326-1. pp. 15-16.
  11. ^ Memlinc, Hans. 17. Miġbur 2022-08-12.
  12. ^ Batari, Ferenc (1994). The "Memling" carpets in de Vos, Dirk, editor (1994). Essays Hans Memling. Essay bundle ippubblikat bil-katalogu ta' Hans Memling, vijf eeuwen werkelijkheid en fictie fil-Mużew ta' Groeningen, Bruges, 12 ta' Awwissu - 15 ta' Novembru 1994.