John Hookham Frere

Minn Wikipedija, l-enċiklopedija l-ħielsa
John Hookham Frere
John Hookham Frere, by John Hoppner 10993444.jpg
John Hookham Frere, minn John Hoppner
Ambassador of the United Kingdom of Great Britain and Ireland to Spain (en) Translate

1808 - 1809
ambaxxatur tar-Renju Unit fil-Prussja

1807 - 1807
ambaxxatur tar-Renju Unit fil-Portugall

1800 - 1802
Membru tal-ewwel Parlament tar-Renju Unit


Membru tat-18-il Parlament tal-Gran Brittanja

Ħajja
Twelid 21 Mejju 1769, 1769
Nazzjonalità Ir-Renju Unit tal-Gran Brittanja u l-Irlanda
Gran Brittanja
Mewt 7 Jannar 1846
Familja
Missier John Frere
Omm Jane Hookham
Konjuga/i Elizabeth Jemima Blake  (12 Settembru 1816 -  17 Jannar 1831)
Aħwa
Edukazzjoni
Alma mater Kulleġġ ta’ Eton
Gonville and Caius College (en) Translate
Lingwi Ingliż
Okkupazzjoni
Okkupazzjoni diplomatiku
politiku
kittieb
Post tax-xogħol Londra
Impjegaturi Foreign Office

John Hookham Frere PC (21 ta' Mejju 1769 - 7 ta' Jannar 1846) kien diplomatiku u awtur Ingliż. Huwa magħruf ukoll għall-ħbiberija tiegħu ma' Mikiel Anton Vassalli.

Ħajja bikrija[immodifika | immodifika s-sors]

Frere twieled Londra. Missieru, John Frere, membru ta' familja minn Suffolk, kien ġie edukat f'Caius College, Cambridge, u sar it-Tieni Wrangler fl-1763. Ommu, Jane, bint John Hookham, negozjant sinjur ta' Londra, kienet mara kolta u kitbet poeżiji li ma ġewx ippubblikati. Oħt missieru Ellenor, li żżewġet lil Sir John Fenn, editur tal-Paston Letters, kitbet xogħlijiet edukattivi għat-tfal taħt il-psewdonimi "Mrs Lovechild" u "Mrs Teachwell". Iż-żagħżugħ Frere ntbagħat f'Eton College fl-1785, u hemm bdiet ħbiberija ma’ George Canning li kellha impatt kbir fuq ħajtu. Minn Eton, huwa mar il-kulleġġ ta' missieru f'Cambridge, u ggradwa BA fl-1792 u MA fl-1795.[1] Huwa daħal jaħdem fis-servizz pubbliku fl-uffiċċju tal-affarijiet barranin taħt Lord Grenville, u mill-1796 sal-1802 kien Membru tal-Parlament għall-borough ta' West Looe f'Cornwall.

Il-Kontessa armla ta’ Erroll, li żżewweġ magħha fl-1816

Sa minn tfulitu kien ammira lil William Pitt iż-Żgħir, u flimkien ma' Canning daħal fid-difiża tal-gvern tiegħu, u kkontribwixxa għall-paġni tal-Anti-Jacobin, editjat minn Gifford. Huwa kkontribwixxa, b'kollaborazzjoni ma' Canning, f’The Loves of the Triangles, parodija ta' Loves of the Plants, f’The Needy Knife-Grinder u f’The Rovers ta' Erasmus Darwin. Meta Canning kien promoss għall-bord tal-kummerċ fl-1809 huwa laħaq floku bħala Sotto-Segretarju tal-Istat għall-Affarijiet Barranin. F’Ottubru 1800, ġie mibgħut f’Lisbona; u f'Settembru 1802 ġie trasferit lejn Madrid, fejn baqa' għal sentejn. Huwa ġie msejjaħ lura Londra minħabba nuqqas ta' qbil personali li kellu mal-Prim Ministru Spanjol Godoy, iżda l-ministeru wera l-approvazzjoni tiegħu għall-pożizzjoni tiegħu billi tah pensjoni ta' £700 fis-sena.

Frere sar membru tal-Privy Council fl-1805. Sentejn wara, fl-1807, inħatar plenipotenzjarju f'Berlin, iżda l-missjoni ġiet abbandunata, u Frere ntbagħat Spanja fl-1808 bħala plenipotenzjarju għall-Ġunta Ċentrali. Il-kundizzjoni ta’ Spanja għamlet il-pożizzjoni tiegħu diffiċli. Meta Napuljun beda javvanza fuq Madrid, saret kwistjoni ta' importanza kbira li jkun deċiż jekk Sir John Moore, li dak iż-żmien kien fit-Tramuntana ta' Spanja, għandux jokkupa l-kapitali jew jirtira, u jekk jirtira għandux imur il-Portugall jew lejn il-Galizja. Frere kien konvint li l-iktar triq kuraġġuża kienet l-aħjar, u ħeġġeġ il-fehmiet tiegħu b'persistenza urġenti u bla biża' li kultant qabżet il-limiti tal-kummissjoni tiegħu. Wara l-irtrar diżastruż lejn A Coruña, il-pubbliku akkuża lil Frere li pperikola l-armata Brittanika; għalkemm ma kien suġġett għall-ebda ċensura diretta mill-gvern għall-imġiba tiegħu, huwa xorta ssejjaħ lura, u l-Markiż Wellesley inħatar minfloku.

Dan kien tmiem il-ħajja pubblika ta' Frere. Wara huwa rrifjuta li jmur San Pietruburgu bħala ambaxxatur, u darbtejn irrifjuta li jinħatar membru tal-House of Lords.

Fl-1816, huwa żżewweġ lil Elizabeth Jemima Hay, Kontessa armla ta’ Erroll. Fl-1820, għall-bżonnijiet ta' saħħitha, Frere mar Malta, fejn għex għall-bqija ta’ ħajtu. Issa li kien irtirat mix-xogħol pubbliku, iddedika ruħu għal-letteratura, studja l-awturi Griegi favoriti tiegħu, u għallem lilu nnifsu l-Ebrajk u l-Malti . Huwa laqa’ għandu mistednin Brittaniċi, kien popolari mal-ġirien Maltin tiegħu, u sar ħabib ta’ Mikiel Anton Vassalli, l-ewwel Professur tal-Malti fl-Università ta’ Malta.

Fl-1833-1834, bħala President tal-Kunsill Ġenerali tal-Università ta' Malta, huwa ta donazzjoni ta' ħamsa u tmenin volum ta' kotba mediċi lill-kollezzjoni tal-Librerija Pubblika bl-intenzjoni speċifika li jkunu "għall-użu ta' studenti żgħar tal-arti medika".

Huwa miet f’Villa Frere fil-Pietà u jinsab midfun fiċ-ċimiterju li hemm fis-swar tal-Imsida.

Xogħlijiet[immodifika | immodifika s-sors]

Ir-reputazzjoni letterarja ta' Frere hija bbażata fuq it-traduzzjonijiet tiegħu ta' Aristofane. It-traduzzjonijiet ta’ The Acharnians, The Knights, The Birds, and The Frogs ġew stampati privatament, u l-ewwel attenzjoni ġenerali għalihom kienet minn George Cornewall Lewis fil-Classical Museum tal-1847. Warajhom kien hemm Theognis Restilutus, l-istorja personali tal-poeta Theognis ta’ Megara.

Fl-1817, huwa ppubblika poeżija Arturjana taparsi erojka, Prospectus and Specimen of an intended National Work, by William and Robert Whistlecraft, of Stowmarket in Suffolk, Harness and Collar Makers.[2] Ħames snin qabel William Tennant uża l-ottava rima għal poeżija semiburleska Anster Fair, iżda l-esperiment ta' Frere huwa interessanti għax Byron issellfu f'Don Juan.

Ix-xogħlijiet kompluti ta’ Frere ġew ippubblikati fl-1871, b’tifkiriet min-neputijiet tiegħu, WE u Sir Henry Bartle Frere.

Ritratt minn Calvert Jones li juri l-ġnien ta’ Frere f’Malta, meħud fl-1846, ftit wara li miet Frere

Sorsi[immodifika | immodifika s-sors]

Rabtiet esterni[immodifika | immodifika s-sors]

Referenzi[immodifika | immodifika s-sors]

  1. ^ University of Cambridge. "Frere, John Hookham (FRR787JH)". A Cambridge Alumni Database.
  2. ^ "Elfinspell: An Intended National Work, (Monks and Giants), by John Hookham Frere, from A Miscellany, epic parody, English Literature, poetry, ottava rima, 19th century poets and authors, British poets and diplomats, online text, (MonksandGiants)". www.elfinspell.com. Miġbur 2021-07-05.