Eritrea

A mina tal-ferrovija fuq il-Plateau Eritrea.

L-Eritrea(Ge'ez: ኤርትራ ʾErtrā ; Għarbi: إرتريا‎ Iritrijá ), hija pajjiż fil-"qarn" tal-Afrika. Eritrea hija l-forma Taljana tal-isem Grieg Ἐρυθραίᾱ (Erythraíā ), li tfisser l-"[art] ħamra". Bil-kapitali tagħha f'Asmara, għandha l-fruntieri tagħha mas-Sudan fl-punent, l-Etijopja man-nofsinhar, u Djibouti fix-xlokk. Fil-majjistral u fil-lvant tal-Eritrea hemm kosta twila mal-Baħar l-Aħmar, faċċata tal-Għarabja Sawdita u l-Jemen. Il-pajjiż fih medda ta' madwar 117,600 km2 (45,406 mil kwadru), u jinkludi l-Arċipelagu Dahlak u ħafna mill-Gżejjer Hanish.

L-Eritrea hija pajjiż mult-etniku, b'disa' gruppi etniċi rikonoxxuti. Għandha popolazzjoni ta' madwar sitt miljun abitant. Ħafna jitkellmu ilsna Afro-Ażjatiċi , Semitiċi jew Kusiti. Fost dawn il-komunitajiet, it-Tigrinja jagħmlu 55% tal-popolazzjoni. Ħafna min-nies huma Insara jew Musulmani.

Is-saltna ta' Aksum, li kienet tikkomprendi l-Eritrea tal-lum u l-Etijopja ta' fuq, bdiet bejn l-ewwel u t-tieni seklu wK u kienet Nisranija kważi sa mill-bidu tagħha. Fil-Medju Evu ħafna mill-Eritrea waqgħet taħt is-saltna ta' Medri Baħri, u biċċa kienet tagħmel parti mir-Repubblika Ħamasja. L-Eritrea tal-lum hija magħmula minn saltniet li qabel kienu independenti u stati vassali tal-Imperu Etijopiku u l-Imperu Ottoman, li eventwalment iffurmaw l-Eritrea Taljana. Fl-1947 l-Eritrea saret parti mill-Federazzjoni tal-Etijopja u l-Eritrea. Wara l-Gwerra Eritrea għall-Independenza, din saret stat indipendenti fl-1991.

L-Eritrea hija membru tal-Unjoni Afrikana, il-Ġnus Magħquda u l-IGAD, u hija osservatur fil-Lega Għarbija.