Lista ta' Siti ta' Wirt Dinji fit-Tanzanija

Inżul ix-xemx fil-Park Nazzjonali ta' Serengeti.

Is-Siti ta' Wirt Dinji tal-Organizzazzjoni tan-Nazzjonijiet Uniti għall-Edukazzjoni, ix-Xjenza u l-Kultura (UNESCO) huma postijiet b'importanza kulturali jew naturali, kif deskritt fil-Konvenzjoni tal-Wirt Dinji tal-UNESCO, li ġiet stabbilita fl-1972. Il-wirt kulturali jikkonsisti minn monumenti (bħal xogħlijiet arkitettoniċi, skulturi monumentali, jew inċiżjonijiet), gruppi ta' binjiet, u siti (fosthom siti arkeoloġiċi). Il-wirt naturali jinkludi karatteristiċi naturali (li jikkonsistu minn formazzjonijiet fiżiċi u bijoloġiċi), ġeoloġiċi u fiżjografiċi (inkluż il-ħabitats ta' speċijiet mhedda ta' annimali u pjanti), u siti naturali li huma importanti mill-puntdivista tax-xjenza, tal-konservazzjoni jew tas-sbuħija naturali. It-Tanzanija rratifikat il-Konvenzjoni fit-2 ta' Awwissu 1977, u b'hekk is-siti indikattivi tagħha setgħu jitqiesu biex jiżdiedu mal-lista tas-Siti ta' Wirt Dinji tal-UNESCO.

L-ewwel Sit ta' Wirt Dinji tal-UNESCO li tniżżel mit-Tanzanija kien iż-Żona ta' Konservazzjoni ta' Ngorongoro fl-1979, filwaqt li l-iżjed sit li tniżżel reċentement huwa s-Siti tat-Tpittir fuq il-Blat ta' Kondoa. Mill-2006, it-Tanzanija b'kollox għandha seba' Siti ta' Wirt Dinji tal-UNESCO, tlieta kulturali, tlieta naturali u wieħed imħallat.

Siti ta' Wirt Dinji

L-UNESCO tiddeżinja s-siti abbażi ta' għaxar kriterji tal-għażla; kull sit irid jissodisfa mill-inqas wieħed mill-għaxar kriterji. Il-kriterji (i) sa (vi) huma kulturali, filwaqt li l-kriterji (vii) sa (x) huma naturali.

NB: * Siti transnazzjonali (bl-ikħal)

Sit	Ritratt	Post	Kriterji tal-Għażla	Sena tad-deżinjazzjoni	Deskrizzjoni
Żona ta' Konservazzjoni ta' Ngorongoro		Reġjun ta' Arusha	imħallat: (iv), (vii),(viii), (ix),(x)	1979	Iż-Żona ta' Konservazzjoni ta' Ngorongoro huwa Sit ta' Wirt Dinji mħallat. Iż-żona ta' konservazzjoni tinkludi l-Krater ta' Ngorongoro, l-ikbar caldera fid-dinja u diversi siti preistoriċi. Fl-inħawi jgħixu wkoll bosta organiżmi selvaġġi u t-tribù tal-Maasai.
Fdalijiet ta' Kilwa Kisiwani u l-Fdalijiet ta' Songo Mnara		Kilwa Kisiwani	kulturali: (iii)	1981	Il-fdalijiet huma tal-bliet portwali antiki li nbnew mis-Swaħili matul is-seklu 13. Il-fdalijiet tpoġġew fil-lista tas-siti fil-periklu minħabba d-deterjorament kontinwu tas-sit mill-attivitajiet naturali u umani.
Park Nazzjonali ta' Serengeti		Reġjuni ta' Arusha u ta' Mara	naturali: (vii), (x)	1981	Fil-Park Nazzjonali ta' Serengeti sseħħ l-ikbar migrazzjoni tal-mammiferi fid-dinja. Il-migrazzjoni annwali ta' erbivori u ta' karnivori hija waħda mill-iżjed attrazzjonijiet naturali impressjonanti fid-dinja.
Riżerva Naturali ta' Selous		Reġjuni ta' Lindi, ta' Ruvuma u ta' Morogoro	naturali: (ix), (x)	1982	Ir-Riżerva Naturali ta' Selous għandha erja ta' 50,000 km2. Ir-riżerva tospita diversità kbira ta' veġetazzjoni u ta' mammiferi kbar. Is-sit tniżżel fil-lista tas-siti fil-periklu minħabba ż-żieda tal-insib.
Park Nazzjonali ta' Kilimanjaro		Reġjun ta' Kilimanjaro	naturali: (vii)	1987	L-attrazzjoni ewlenija tal-park nazzjonali hija l-muntanja Kilimanjaro, l-ogħla punt fl-Afrika. Il-muntanja bil-borra fil-quċċata hija mdawra bi pjanuri enormi tas-savanna. Il-park fih ukoll għadd kbir ta' mammiferi kbar, uħud minnhom fil-periklu ta' estinzjoni.
Stone Town ta' Zanzibar		Belt ta' Zanzibar	kulturali: (ii), (iii), (vi)	2000	Stone Town ta' Zanzibar hija labirint ta' fużjoni ta' diversi influwenzi kulturali tal-bliet tul is-sekli. Il-belt antiki għandha influwenzi Għarab, Persjani, Indjani u Kostali. Il-belt hija l-belt kapitali kulturali tal-kultura tas-Swaħili.
Siti tat-Tpittir fuq il-Blat ta' Kondoa		Distrett ta' Kondoa	kulturali: (iii), (vi)	2006	Is-siti tat-tpittir fuq il-blat huma sparpaljati mal-Wied tal-Foss kollu u ilhom jeżistu hemmhekk għal iktar minn 2,000 sena. Is-siti jipprovdu informazzjoni storika siewja rigward l-evoluzzjoni tal-bniedem matul il-perjodu tal-kaċċaturi-ġemmiegħa.