Żona ta' Interess Xeniku u Storiku ta' Huanglong
Iż-Żona ta' Interess Xeniku u Storiku ta' Huanglong jew fil-qosor Huanglong (biċ-Ċiniż simplifikat: 黄龙; biċ-Ċiniż tradizzjonali: 黃龍; bil-Pinjin: Huánglóng; litteralment "dragun isfar") tinsab fin-naħa tan-Nofsinhar tal-katina muntanjuża ta' Minshan, 370 kilometru (230 mil) fil-Majjistral it-Tramuntana tal-belt kapitali reġjonali ta' Chengdu, iċ-Ċina. Din iż-żona hija magħrufa għall-vaski kkuluriti tat-travertina ffurmati bid-depożiti tal-kalċit, speċjalment f'Huanglonggou (Kanal tad-Dragun l-Isfar), kif ukoll għal diversità ta' ekosistemi forestali, qċaċet miksijin bil-borra, kaskati u fawwariet termali. Huanglong tospita wkoll bosta speċijiet fil-periklu ta' estinzjoni, fosthom il-panda ġganteska u x-xadina dehbija ta' Sichuan.[1] Barra minn hekk, fiż-żona ġiet skoperta popolazzjoni kbira tal-ispeċi ta' orkidea endemika Cypripedium plectrochilum.[2] Iż-Żona ta' Interess Xeniku u Storiku ta' Huanglong tniżżlet fil-lista tas-Siti ta' Wirt Dinji tal-UNESCO fl-1992 bis-saħħa tal-formazzjonijiet straordinarji tat-travertina, il-kaskati u l-formazzjonijiet tal-ġebla tal-ġir, kif ukoll il-vaski u l-lagi mtarrġa tat-travertina li huma kklassifikati bħala fost l-aqwa tliet eżempji fid-dinja.
Deskrizzjoni
[immodifika | immodifika s-sors]
Diversi avvenimenti ripetuti ta' glaċjazzjoni, l-istruttura unika tat-terren, il-formazzjoni tat-tufa, l-istratum tal-blat tal-aċidu karboniku, u l-kundizzjonijiet klimatiċi bħad-dawl tax-xemx alpin-Artiku ħolqu dan il-pajsaġġ tat-travertina famuż mad-dinja kollha. Huanglong tkopri erja ta' 700 km2 f'altitudni ta' bejn 1,700 metru u 5,588 metru. Iż-żoni xeniċi ewlenin jinkludu:
- il-Wied ta' Huanglong (biċ-Ċiniż: 黄龙沟);
- il-Fondoq ta' Danyun (biċ-Ċiniż: 丹云峽; litteralment "fondoq tas-sħab aħmar"): kanjon fond iktar minn 1,000 metru; il-borra li ddub mill-Muntanja Xuebaoding fil-qrib tinżel ġo dan il-kanjon u tipprovdi l-biċċa l-kbira tal-ilma fir-reġjun;
- il-Wied ta' Muni (biċ-Ċiniż: 牟尼沟);
- Xuebaoding (biċ-Ċiniż: 雪宝顶; litteralment "quċċata tat-teżor tal-borra") – 5,588 metru (18,333 pied); l-ogħla quċċata fil-Muntanji Min;
- il-Katina Muntanjuża ta' Xueshan (biċ-Ċiniż: 雪山梁; litteralment "il-katina muntanjuża tal-borra") – 4,007 metru (13,146 pied); l-ogħla punt fit-triq mill-Ajruport ta' Jiuhuang sal-Wied ta' Huanglong;
- il-Blata tal-Istilla Ħamra (biċ-Ċiniż: 红星岩);
- Sigou (biċ-Ċiniż: 四沟; litteralment "ir-raba' kanal").
Wied ta' Huanglong
[immodifika | immodifika s-sors]It-tul totali tat-travertina fil-Wied ta' Huanglong huwa ta' 3.6 kilometru u huwa maħsub li għandu għamla ta' dragun dehbi enormi jserrep qalb il-muntanji miksijin bil-borra tal-wied. Il-pajsaġġi prinċipali huma x-xtut tat-travertina, il-vaski kkuluriti u l-kaskati u l-għerien tat-travertina. Il-korp tal-ilma prinċipali jibda mit-tempju Buddist/ta' Benbo tal-qedem fil-quċċata tal-wied u jintemm fil-Vaska tal-Merħba fit-Tramuntana, b'tul ta' 2.5 kilometri u b'wisa' ta' 30–170 metru. Il-kuluri tal-ilma ta' Huanglong jinkludu sfumaturi ta' isfar, aħdar, ikħal u kannella.
Sit ta' Wirt Dinji
[immodifika | immodifika s-sors]Iż-Żona ta' Interess Xeniku u Storiku ta' Huanglong ġiet iddeżinjata bħala Sit ta' Wirt Dinji tal-UNESCO fl-1992.[1]
Il-valur universali straordinarju tas-sit ġie rrikonoxxut abbażi ta' kriterju wieħed tal-għażla tal-UNESCO: il-kriterju (vii) "Post fejn iseħħu fenomeni naturali tal-għaġeb jew fejn hemm żoni ta' ġmiel naturali u ta' importanza estetika eċċezzjonali".[1]
Attrazzjonijiet
[immodifika | immodifika s-sors]| Nru | Żoni xeniċi fil-Wied ta' Huanglong | Altitudni mil-livell tal-baħar | Rimarki | Ritratt |
|---|---|---|---|---|
| 1 | Vaski tal-Merħba (biċ-Ċiniż: 迎宾池) | 3,230 metru | 350 vaska | 
|
| 2 | Kaskata Stupenda li Ttir (biċ-Ċiniż: 飛瀑流輝) | 3,245 metru | għolja 14-il metru u wiesgħa 68 metru | 
|
| 3 | Vaska ta' Lianyan (biċ-Ċiniż: 瀲灩湖) | 3,251 metru | erja ta' 2,000 metru kwadru | 
|
| 4 | Kaskata li Ttir fuq Pjattaforma tal-Lotus (biċ-Ċiniż: 蓮台飛瀑) | 3,260 metru | għolja 45 metru u wiesgħa 19-il metru | 
|
| 5 | Għar tal-Ħasil (biċ-Ċiniż: 洗身洞) | 3,280 metru | għoli 10 metri u wiesa' 40 metru | 
|
| 6 | Xatt tar-Ramel Dehbi (biċ-Ċiniż: 金沙鋪地) | 3,305 metru | twil 1,300 metru | 
|
| 7 | Seba' Mili ta' Ramel Dehbi (biċ-Ċiniż: 七里金沙) | 3,400 metru | 
| |
| 8 | Vaska tal-Bonsaj (biċ-Ċiniż: 盆景池) | 3,320 metru | 330 vaska | 
|
| 9 | Għadira Mera (biċ-Ċiniż: 明鏡倒映池) | 3,400 metru | fiha 180 vaska | 
|
| 10 | Għadira ta' Azalea (biċ-Ċiniż: 娑蘿映彩池) | 3,415-il metru | fiha 400 vaska | 
|
| 11 | Għadira Tleqq (biċ-Ċiniż: 爭豔池) | 3,414-il metru | fiha 658 vaska | 
|
| 12 | Tempju Nofsani ta' Huanglong (biċ-Ċiniż: 黃龍中寺) | 3,470 metru | 
| |
| 13 | Tempju tal-Qedem ta' Huanglong (biċ-Ċiniż: 黃龍古寺) | 3,568 metru | 
| |
| 14 | Għadira b'Bosta Kuluri (biċ-Ċiniż: 五彩池) | 3,576 metru | fiha 693 vaska | 
|
Gallerija
[immodifika | immodifika s-sors]
Referenzi
[immodifika | immodifika s-sors]- ^ a b ċ "Huanglong Scenic and Historic Interest Area". whc.unesco.org. Miġbur 2024-08-21.
- ^ Li, P.; Luo, Y.; Bernhardt, P.; Kou, Y.; Perner, H. (27 February 2008). "Pollination of Cypripedium plectrochilum (Orchidaceae) by Lasioglossum spp. (Halictidae): the roles of generalist attractants versus restrictive floral architecture". Plant Biology. 10 (2): 220–230.