Aqbeż għall-kontentut

Park Naturali tal-Pilastri ta' Lena

Minn Wikipedija, l-enċiklopedija l-ħielsa
Il-Pilastri ta' Lena.

Il-Park Naturali tal-Pilastri ta' Lena (bir-Russu: Ле́нские столбы́, trażlitterata: Lenskiye Stolby; bil-Yakut: Өлүөнэ туруук хайалара, Ölüöne Turūk Khayalara) jinkludi formazzjoni naturali tal-blat tul ix-xtut tax-xmara Lena fil-Lvant Imbiegħed tas-Siberja, ir-Russja. Il-Pilastri ta' Lena huma għoljin 150–300 metru (490–980 pied), u ġew iffurmati f'uħud mill-baċiri tal-baħar tal-era Kambrijana. L-ogħla densità ta' pilastri tinsab bejn il-villaġġi ta' Petrovskoye u Tit-Ary. Il-Park Naturali tal-Pilastri ta' Lena tniżżel fil-lista tas-Siti ta' Wirt Dinji tal-UNESCO fl-2012.[1]

Is-sit jinsab madwar 180 kilometru (110 mili), jiġifieri inqas minn vjaġġ ta' jum bid-dgħajsa fuq ix-xmara fin-Nofsinhar mill-belt ta' Yakutsk, il-belt kapitali tar-Repubblika awtonoma ta' Sakha.[2]

Turiżmu[immodifika | immodifika s-sors]

Wieħed jista' jippjana mawra bid-dgħajsa fuq ix-xmara billi jikkuntattja servizz tal-ivvjaġġar fil-belt ta' Yakutsk. Min għandu interess fil-limnoloġija jew fl-ekoturiżmu, u oħrajn li jżuru l-Lag ta' Baikal, jistgħu jikkoordinaw soġġorn fuq ix-xmara bl-għajnuna ta' gwida mir-reġjun tal-Lag ta' Baikal; madankollu, ta' min wieħed iqis li Yakutsk, l-iżjed belt kiesħa fid-dinja u l-post minn fejn jitilqu l-mawriet bid-dgħajsa, tinsab madwar 1,400 kilometru (870 mil) fil-Grigal tal-Lag ta' Baikal.

Ma tantx hemm wisq faċilitajiet moderni f'din il-parti tar-Russja, sakemm wieħed ma jivvjaġġax b'kruċiera fix-xmara Lena. Tit-Ary, fuq in-naħa l-oħra tax-xmara, għandha triq biż-żrar li tagħti għal Yakutsk.

Il-mogħdijiet għall-mixi fir-reġjun huma weqfin u xi kultant pjuttost prekarji.

Ġeoloġija[immodifika | immodifika s-sors]

Il-Pilastri ta' Lena jikkonsistu minn saffi li jalternaw ta' ġebla tal-ġir, marna, dolomit u lavanja tal-era Kambrijana bikrija jew nofsanija, li huma pjuttost mikulin bl-erożjoni u bl-elementi, u b'hekk iffurmaw blat ippuntat u jaqta'.[3]

Dan it-tip ta' blat normalment iktar jifforma f'ambjenti qrib il-baħar, u s-saffi orizzontali u l-varjazzjoni vertikali jindikaw trasgressjoni/rigress tal-baħar maż-żmien. Il-lavanja tirrappreżenta x-shale kemxejn metamorfizzat li fl-imgħoddi kien jinsab fil-fond tal-baħar.

Klima[immodifika | immodifika s-sors]

Il-klima hija tassew kontinentali b'temperaturi li jinżlu saħansitra sa -60 °C fix-xitwa u li jitilgħu saħansitra sa +35 °C fis-sajf.

Sit ta' Wirt Dinji[immodifika | immodifika s-sors]

Il-Park Naturali tal-Pilastri ta' Lena ġie ddeżinjat bħala Sit ta' Wirt Dinji tal-UNESCO fl-2012.[1]

Il-valur universali straordinarju tas-sit ġie rrikonoxxut abbażi ta' kriterju wieħed tal-għażla tal-UNESCO: il-kriterju (viii) "Eżempju straordinarju li jirrappreżenta stadji importanti tal-istorja tad-dinja, inkluż it-trapass tal-ħajja, il-proċessi ġeoloġiċi kontinwi sinifikanti fl-iżvilupp tat-tipi differenti ta' art, jew il-karatteristiċi ġeomorfiċi jew fiżjografiċi sinifikanti".[1]

Gallerija[immodifika | immodifika s-sors]

Referenzi[immodifika | immodifika s-sors]

  1. ^ a b ċ Centre, UNESCO World Heritage. "Lena Pillars Nature Park". UNESCO World Heritage Centre (bl-Ingliż). Miġbur 2024-04-28.
  2. ^ "Welcome To Yakutia! Lena river trips". web.archive.org. 2012-01-23. Arkivjat minn l-oriġinal fl-2012-01-23. Miġbur 2024-04-28.
  3. ^ Centre, UNESCO World Heritage. "Siti indikattivi tar-Russja". UNESCO World Heritage Centre (bl-Ingliż). Miġbur 2024-04-28.