Lino Agius
 |
Dan l-artiklu għandu bżonn jiġi wikifikat biex jaqbel mal-istandard tal-Wikipedija. B'mod partikolari, dan l-artiklu huwa nieqes minn referenzi għal sorsi esterni li jivverifikaw il-fatti u perspettivi dwar is-suġġett. Jekk jogħġbok għin biex ittejjeb dan l-artiklu skont il-konvenzjonijiet tal-Wikipedija. |
| Lino Agius | |
|---|---|
.jpg) | |
| Ħajja | |
| Twelid | Tas-Sliema, 18 Awwissu 1945 (79 sena) |
| Nazzjonalità | Malta |
| Edukazzjoni | |
| Alma mater | Università ta' Malta |
| Okkupazzjoni | |
| Okkupazzjoni |
avukat imħallef |
| Sħubija |
International Criminal Tribunal for the former Yugoslavia (en)  International Residual Mechanism for Criminal Tribunals (en) |
Carmel (Lino) Agius (Sliema, 18 ta' Awwissu 1945) huwa Imħallef Malti.
Studji
[immodifika | immodifika s-sors]Bin Anthony u Josephine mwielda Buttigieg, huwa ħa l-edukazzjoni tiegħu fis-Seminarju (1955-1960) u fil-Liċeo (1960-1962). Fl-1965 ġab il-Baċellerat tal-Arti mill-Università ta' Malta. Fl-1968 sar nutar, u s-sena ta' wara avukat bit-teżi "The Quantum of Damages in Injury Claims". Kien President tal-Kunsill tal-Istudenti.
Avukat
[immodifika | immodifika s-sors]Għal 7 snin prattika ta' avukat f'kawżi ċivili u kummerċjali.
Fl-1971, ħareġ kandidat għall-Elezzjonijiet Ġenerali f'isem il-Partit Laburista imma ma kienx elett. Sal-1973, kien konsulent legali tat-Times of Malta u reporter mill-Parlament. Fis-snin sebgħin kien ukoll konsulent legali tal-Bank of Valletta.
Maġistrat u Mħallef
[immodifika | immodifika s-sors]Fil-25 ta' Mejju 1977 nħatar Maġistrat.
Fit-12 ta' Mejju 1982, huwa nħatar Imħallef. Ħadem fil-Qorti tal-Appell u fil-Qorti Kostituzzjonali ta’ Malta u serva bħala Aġent-Prim Imħallef f’diversi okkażjonijiet.
Huwa rtira bl-età minn imħallef f’Malta fl-2010.
Ħidma Internazzjonali
[immodifika | immodifika s-sors]Bejn l-1999 u l-2008 huwa kien ukoll Membru tal-Qorti Permanenti tal-Arbitraġġ f’The Hague.
Fl-1998, huwa kien viċi-kap tad-delegazzjoni Maltija fil-Kungress Internazzjonali ta’ Ruma li wassal għall-Istatut tal-Qorti Kriminali Internazzjonali (ICC) li matulu ħa parti attiva fin-negozjati u anki iffirma d-Dokument Finali tal-Kungress għan-nom ta’ Malta.
L-Imħallef Agius kien ukoll ir-rappreżentant tal-Ġudikatura Maltija fil-Kunsill Ċentrali tal-Assoċjazzjoni Internazzjonali tal-Imħallfin.
Fit-Tribunal Kriminali Internazzjonali tal-Ġnus Magħquda għall-Ex-Jugoslavja
[immodifika | immodifika s-sors]L-Imħallef Agius serva fil-Kamra tal-Appelli tat-Tribunal Kriminali Internazzjonali tal-Ġnus Magħquda għall-ex-Jugoslavja (ICTY) kif ukoll tat-Tribunal Internazzjonali tal-Ġnus Magħquda għar-Rwanda (ICTR). Huwa ġie elett l-ewwel darba bħala Imħallef Permanenti tal-ICTY fl-2001 mill-Assemblea Ġenerali tal-Ġnus Magħquda u ġie ri-elett fl-2004.
Bejn l-2003 u l-2010 huwa serva bħala President ta’ Trial Chamber II tal-ICTY u f'dan il-perjodu huwa ppresjieda uħud mill-iktar proċessi importanti tat-Tribunal inkluż il-każ "Popovic et al" li kien jittratta dwar il-ġenoċidju ta’ Srebrenica li seħħ fl-1995 u li fih kien hemm seba’ akkużati. Fl-2010 huwa beda jservi fil-Kamra tal-Appelli taż-żewġ Tribunali.
Mill-2003, l-Imħallef Agius serva bħala President tar-Rules Committee tal-ICTY u kien ukoll membru tal-Bureau tal-President tat-Tribunal. Agius ikkoordina u ġab fit-tmiem il-kumpilazzjoni tar-Regolamenti ta’ Provi u Proċedura tar-Residual Mechanism li mbagħad ġew mgħoddija lill-Kunsill tas-Sigurtà tal-Ġnus Magħquda biex imbagħad jiġu approvati mill-imħallfin tal-istess Residual Mechanism li huwa l-korp li ssuċċeda lit-Tribunal.
Fid-19 ta' Ottubru 2011, waqt seduta straordinarja plenarja tal-imħallfin tat-Tribunal Kriminali Internazzjonali tal-Ġnus Magħquda għall-eks-Jugoslavja (ICTY) f’The Hague, l-Imħallef Agius ġie elett unaniment bħala Viċi-President tat-Tribunal għal perijodu ta’ sentejn b’effett mis-17 ta’ Novembru 2011. Din kienet l-ewwel darba li Imħallef Malti ġie elett bħala Viċi-President ta’ qorti jew tribunal tal-Ġnus Magħquda. Fl-2012, kien Agius li sema’ l-appell ta’ Ratko Mladic li nstab ħati b’ġenoċidju u reati marbutin mal-gwerra. Fl-2013, Agius reġa' ġie ikkonfermat.
Fis-17 ta’ Novembru 2015, Agius ġie elett b’akklamazzjoni bħala President tat-Tribunal ICTY għal perijodu ta’ sentejn. L-Imħallef Agius kien l-ewwel imħallef Malta li qatt ġie elett bħala President ta’ qorti jew tribunal internazzjonali.
Fit-30 ta' Ġunju 2018, Agius inħatar president tat-tribunal internazzjonali tan-Nazzjonijiet Magħquda, imsejjaħ International Residual Mechanism for Criminal Tribunals.Is-Segretarju Ġenerali tal-Ġnus Magħquda ħatar lil Agius wara li saru għadd ta’ konsultazzjonijiet bejn il-15-il membru tal-Kunsill tas-Sigurtà u din il-ħatra tidħol fis-seħħ mid-19 ta’ Jannar 2019 u tibqa' sat-30 ta’ Ġunju 2020.
Unuri
[immodifika | immodifika s-sors]Fl-2015, l-Imħallef Agius kien ingħata Ġieħ ir-Repubblika.