Mikiel Spiteri

Minn Wikipedija, l-enċiklopedija l-ħielsa
(Rindirizzat minn Kelinu Spiteri)
Jump to navigation Jump to search
Kilin bil-korteżija tal-Akkademja tal-Malti
Bust ta' Kilin ir-Rabat

Mikiel Spiteri (magħruf bħala Kilin) (ir-Rabat, Malta, 20 ta’ Awwissu, 1917 - Msida, 8 ta’ Lulju, 2008) kien kittieb Malti.

Din l-informazzjoni ttieħdet minn Ref 1[1], Ref 2[2] u Ref 3[3].

Tfulija[immodifika | immodifika s-sors]

Ommu u missier Kilin kienu Anna Azzopardi u Diegu Spiteri. Dawn kellhom għaxart itfal li minnhom tlieta mietu fit-tfulija. Kilin jgħid li meta kien żgħir kien se jmut b'xemxata kbira.

Kilin mill-ewwel deher li kien se jipprometti fl-iskola għax kien tifel li kellu interess f’kollox u kien determinat li ried jirnexxi. Ħa l-edukazzjoni sekondarja tiegħu fil-Liċeo.

Servizz Pubbliku[immodifika | immodifika s-sors]

Ħadem bħala uffiċjal tad-dwana bejn l-1935 u l-1941 u f’diversi dipartiment tal-Gvern sal-1975.

Letteratura[immodifika | immodifika s-sors]

Il-laqam "Kilin" beda jużah meta darba sema' lil xi ħadd isejjaħ lil xi ħadd ieħor Kilin u dan l-isem għoġbu.

Kilin beda jikteb fl-1966 meta kellu 31 sena u l-aktar li kien iħobb jikteb kienet il-proża, bħal novelli, rumanzi u saġġi bil-Malti.

L-ewwel xogħlijiet tiegħu letterarji ppubblikati kienu Burdati (1970) u Burdati 71 (1971).

L-aktar xogħol magħruf ta’ Kilin hu Fuq il-Għajn ta’ San Bastjan (1973). Wara kiteb Wara l-Għajn ta’ San Bastjan (1994) u Iż-Żmien Isajjar il-Bajtar (1996) fejn jissoktaw it-tifkiriet ta’ tfulitu u żgħożitu. Imma Kilin iddikjara li l-aktar ktieb li jogħġbu kien Tlikki Tlikki ma' Wenzu.

Kilin huwa l-awtur ta’ erba’ rumanzi: L-Għafrid (1975), Tmint Ijiem fi Dragunara (1984), It-Tapit Imsaħħar (1995) uTinsiex, Publius, Tinsiex! (2003).

Fl-1998 ġabar in-novelli fil-ktieb Għajnejn Kalanġ li jiġbru ‘kwadru morali’ tal-ħajja, bil-ħelu u bil-morr tagħha.

Huwa ttraduċa L-Alla li ma Nemminx Fih (1983) mill-Ispanjol u ħareġ sensiela ta’ ħames kotba żgħar Kappelli u Knejjes Żgħar (1967), Nistqarr (1968), Djar is-Sultana (1969 u Osanna (1978).

Wayside Chapels (1966) u A Maltese Mosaic (1990) huma l-verżjoni bl-Ingliż ta’ dawn il-kotba.

Kilin kiteb ukoll xi poeżiji.

Kilin baqa' jsemma' leħnu fil-ġurnali, sikwit jilmenta fuq il-bidliet li għaddej minnhom ilsienna.

Unuri[immodifika | immodifika s-sors]

Fl-1973 rebaħ il-Premju Rothmans għal-Letteratura bid-dramm Bl-Irġulija u bl-Onestà, li deher fi ktieb bl-istess titlu flimkien ma’ ġabra ta’ novelli.

Fl-1981, Tmint Ijiem fi Dragunara (ħareġ 1984) rebaħ it-tieni premju fil-Konkors Buġelli.

Fl-1999, in-novella Id-Dell tal-Fatat ġiet fit-tieni post minn fost 842 novella f'kompetizzjoni li nżammet fl-Italja. In-novella kienet bil-Malti u hu stess qalibha bit-Taljan.

Fit-13 ta' Diċembru 2000, ingħata l-Midalja għall-Qadi tar-Repubblika mill-President ta' Malta dak iż-żmien Guido de Marco.

Ftit xhur qabel miet f'għeluq id-90 sena l-Akkademja tal-Malti onoratu b’tifkira għall-ħidma sfiqa u bla heda tul ħajtu kollha għall-ilsien Malti.

Ħajja Personali[immodifika | immodifika s-sors]

Kien mżżewweġ lil Ġuża Mifsud u kellhom sebat itfal. Kien nannu ta' 17 u bużnannu ta' 12 .

Għamel ħafna snin jgħix l-Imsida u għex hemm sakemm miet.

Kilin kien iħobb il-familja, tant li kemm-il darba ddikjara li biex jieħu ħsiebha sewwa ġieli kellu jagħmel sitt xogħlijiet.

Mikiel Spiteri kien ukoll iffissat fuq iċ-Ċess u kien iħobb imur għall-kwiet fil-kampanja u joqgħod ipinġi.

Xogħlijiet[immodifika | immodifika s-sors]

Saġġi u novelli[immodifika | immodifika s-sors]

  • Burdati (1970)
  • Burdati 71 (1971)
  • Tlikki Tlikki ma’ Wenzu (1972)
  • Hawn Aħna, Wenz (1991)
  • Fuq il-Għajn ta’ San Bastjan (1973)
  • Wara l-Għajn ta’ San Bastjan (1994)
  • Iż-Żmien Isajjar il-Bajtar (1996)
  • Għajnejn Kalanġ (1998) ġabra ta' novelli

Drammi[immodifika | immodifika s-sors]

  • Bl-Irġulija u bl-Onestà, deher fi ktieb bl-istess titlu flimkien ma’ ġabra ta’ novelli.

Rumanzi[immodifika | immodifika s-sors]

  • L-Għafrid (1975)
  • Tmint Ijiem fi Dragunara (1984)
  • It-Tapit Imsaħħar (1995)
  • Tinsiex, Publius, Tinsiex! (2003).

Diversi[immodifika | immodifika s-sors]

  • L-Alla li ma Nemminx Fih (1983) traduzzjoni mill-Ispanjol ta' El Dios en quien no creo (1969) ta' Juan Arias.[4]
  • Sensiela ta’ ħames kotba żgħar Kappelli u Knejjes Żgħar (1967),
  • Nistqarr (1968)
  • Djar is-Sultana (1969)
  • Osanna (1978).

Referenzi[immodifika | immodifika s-sors]

  1. ^ [1] Grajjiet Malta 9 ta’ Lulju, 2008
  2. ^ [2] L-Akkademja tal-Malti
  3. ^ Ipitter bil-kliem u bil-kuluri Artiklu ta' Fiona Vella
  4. ^ [3]El Dios en quien no creo

Ħoloq esterni[immodifika | immodifika s-sors]