Ahwar tan-Nofsinhar tal-Iraq

Iż-Żiggurat ta' Ur.

L-Ahwar* tan-Nofsinhar tal-Iraq: Rifuġju ta' Bijodiversità u l-Pajsaġġ Relitt tal-Bliet tal-Mesopotamja huma Sit ta' Wirt Dinji tal-UNESCO fin-Nofsinhar tal-Iraq.

Is-Sit ta' Wirt Dinji tal-ahwar, jiġifieri mraġ (bl-Ingliż: marshes jew marshlands), huwa magħmul minn seba' komponenti, li jinkludu tliet bliet ta' oriġini Sumera u erba' artijiet mistagħdra fl-imraġ tal-Mesopotamja.

Sit ta' Wirt Dinji

L-Ahwar tan-Nofsinhar tal-Iraq: Rifuġju ta' Bijodiversità u l-Pajsaġġ Relitt tal-Bliet tal-Mesopotamja ġew iddeżinjati bħala Sit ta' Wirt Dinji mħallat tal-UNESCO fl-2016.

Il-valur universali straordinarju tas-sit ġie rrikonoxxut abbażi ta' erba' kriterji tal-għażla tal-UNESCO: il-kriterju (iii) "Xhieda unika jew minn tal-inqas eċċezzjonali ta' tradizzjoni kulturali jew ta' ċivilizzazzjoni li għadha ħajja jew li għebet"; il-kriterju (v) "Eżempju straordinarju ta' insedjament uman tradizzjonali, ta' użu tal-art jew ta' użu tal-baħar, li jirrappreżenta kultura (jew kulturi), jew interazzjoni umana mal-ambjent, speċjalment meta jkun sar vulnerabbli minħabba l-impatt ta' bidla irreversibbli"; il-kriterju (ix) "Eżempju straordinarju li jirrappreżenta proċessi ekoloġiċi u bijoloġiċi kontinwi sinifikanti fl-evoluzzjoni u fl-iżvilupp ta' ekosistemi u ta' komunitajiet ta' pjanti u ta' annimali terrestri, tal-ilma ħelu, kostali u tal-baħar"; u l-kriterju (x) "Post fejn hemm l-iktar ħabitats naturali importanti u sinifikanti għall-konservazzjoni fil-post tad-diversità bijoloġika, inkluż fejn hemm speċijiet mhedda ta' valur universali straordinarju mill-perspettiva tax-xjenza jew tal-konservazzjoni".

Komponenti

1. L-Imraġ ta' Huwaizah;
2. l-Imraġ Ċentrali;
3. l-Imraġ tal-Lvant ta' Hammar;
4. l-Imraġ tal-Punent ta' Hammar;
5. il-Belt Arkeoloġika ta' Uruk;
6. il-Belt Arkeoloġika ta' Ur;
7. is-Sit Arkeoloġiku tal-Għolja ta' Eridu.

Noti

1. * Ahwar hija l-kelma Għarbija għal "imraġ".