Fortifikazzjonijiet ta' Żmien il-Kavallieri f'Malta

Minn Wikipedija, l-enċiklopedija l-ħielsa
Jump to navigation Jump to search

Swar[immodifika | immodifika s-sors]

Meta nitkellmu fuq Malta fil-perjodu tal-Kavallieri ma nistgħux nonqsu milli nsemmu l-ħitan u s-swar li nbnew biex jiddefendu l-gżejjer fi żmien ta’ għawġ. Qabel mal-Kavallieri ġew Malta fl-1530, kienu diġa konxji li Malta kienet fqira fejn hi ikkonċernata d-difiża. Kienu jafu wkoll li l-Imdina qatt ma setgħet taqdihom fid-difiża minħabba li tinsab ‘il bogħod mill-baħar, u li l-għolja Xebb ir-Ras kellha tiġi mħarsa tajjeb permezz ta’ belt-fortizza.

Forti Sant’Anġlu[immodifika | immodifika s-sors]

Il-Kavallieri kienu mbeżżġħa li t-Torok setgħu jerġgħu jattakkaw lil Malta. Bosta inġiniera taw l-opinjonijiet tagħhom dwar kif dan seta’ jsir, fosthom Ferromolinio u l-Ispanjol Pardo. Sant’Anġlu ġie ffortifikat aħjar sabiex l-armamenti li kien hemm fih setgħu jħarsu aħjar il-Port il-Kbir. Barra minn hekk Ferromolino ħaffer foss li jifred il-Birgu minn dan il-forti. Dan il-foss kien ta’ użu kbir waqt l-Assedju l-Kbir u kien ta’ protezzjoni tajba għall-vapuri ta’ l- Ordni. Pardo iddisinja Forti San Mikiel li ġie mibni aktar tard.

Fuq suġġeriment tiegħu ukoll, nbena Sant’iermu fuq l-għolja Xebb ir-Ras. L-użu ta’ din il-fortizza kellu jkun biex iħares aħjar il-Port il-Kbir u biex ibiegħed lil għadu milli jidħol fil-Port ta’ Marsamxett. Dawn iż-żewġ fortizzi komplew jissaħħu iktar tard permezz ta’ swar sekondarji. iktar tard inbena Forti Ricasoli li kellhu jħares il-bokka tal-port. Xi fortizzi oħra ta’ siwi kienu Forti San Luċjan, it-torri ta’ San Tumas f’Wied il-Għajn u t-torri ta’ Wignacourt.

Ridotti[immodifika | immodifika s-sors]

Barra dawn it-torrijiet ta’ l-għassa, fi żmien il-Kavallieri nbnew ir-ridotti bħal tal-Mistra u Louvier. Dawn kienu l-ewwel binjiet ta’ difiża fil-postijiet fejn it-truppi tal-għadu setgħu jiddisimbarkaw.

Il-Belt Valletta[immodifika | immodifika s-sors]

Il-bini tal-belt il-ġdida ġie deċiż fil-Kunsill ta’ l-Ordni eżatt wara l-Assedju Kbir, meta l-Kavallieri neħħew kull tama li jitilqu minn Malta. Franceso Lapparelli u warajh Ġirolmu Cassar, fasslu l-pjan tal-Belt, li huwa forma ta’ gradilja. Inbnew ukoll il-ħitan ta’ Firenzuola (Magħrufa wkoll bħala Margerita lines), li madankollu, bħal ħafna proġettti tal-Kavallieri baqgħu ma tlestewx.

It-torrijiet ta' De Redin[immodifika | immodifika s-sors]

Fi żmien Martin de Redin inbnew ukoll numru ieħor ta’ torrijiet, magħrufa bħala d-‘De Redin towers’. B’kollox kien hemm 13. Il- Kavallieri ħadu ħsieb il-kostruzzjoni ta’ trunċieri, bħal f’Birżebbuġa u l-Mellieħa li kienu twal ħafna. Madankollu qatt ma kien hemm biżżejjed nies biex dawn jintużaw. Inbnew għadd kbir ieħor ta’ fortizzi mill-Gran Mastru Lascaris.

Sfortunatament ħafna minnhom ġew meqruda, mitluqa jew saru jintużaw bħala ristoranti.