Karnival ta' Malta

Minn Wikipedija, l-enċiklopedija l-ħielsa
(Rindirizzat minn Il-Karnival)
Jump to navigation Jump to search

Il-'Karnival ta' Malta ilu jkollu post importanti fuq il-kalendarju kulturali Malti għal ftit anqas minn ħames sekli, ġie introdott għall-Gżejjer Malin mill-Gran Mastru Piero de Ponte fl-1535.

Il-Karnival isir fil-jiem qabel Ras ir-Randan, u tipikament jinkludi ballijiet bil-maskri, fancy dress u kompetizzjonijiet tal-maskra grotteski, festi lussużi tard billejl, ikkuluriti, parata mimlija kuluri ta' karrijiet allegoriċi ppreseduta mir-Re tal-Karnival, baned jimmarċjaw u xalaturi bil-kostum.

Il-Karnival ta' Malta ilu jsir mill-1400 meta introduċewh il-Kavallieri ta’ San Ġwann. Dawn it-tlitt ijiem ta’ bagħrid, xalar u ċajt jiġi eżatt qabel ir-Randan li hu żmien ta’ sawn astinenza fejn il-poplu jħejji ruħu għall-festi tal-Ġimgħa l-Kbira. Dak iż-żmien in-nies kienu jsumu 40 ġurnata sħaħ u allura kienu jagħmlu l-Karnival biex jixxalaw għal tlitt ijiem imbagħad jagħmlu s-sagrifiċċju. Fil-fatt Karnival ġejja minn Carne Vale jiġifieri hu permess li tiekol laħam għaliex fl-erbgħin jum tar-Randan ma setax jittiekel laħam. Illum il-Karnival jiġbed ħafna turisti lejn Malta. Dan hu żmien ta’ kulur, ċajt u xalar fejn il-Belt tkun mimlija bil-karrijiet tal-karnival, nies libsin kull tip ta’ kostumi, u kompetizzjonjiet ta’ żfin. Illum ħafna jilbsu ta’ karattri moderni Iżda fl-antik aktar kienu jilbsu ta’ xi ħares jew pirata

Il-Parata tal-Karnival[immodifika | immodifika s-sors]

Il-Karnival jibda s-sibt bil-Parata din hija żifna bix-xwabel li turi ġlieda. Il-Parata bdiet issir biex tiġi mfakkra r-rebħa tal-Kavallieri fuq it-Torok fl-Assedju ta’ l-1565. Fiha jkun hemm żewġ gruppi wieħed liebes ta’ Kavallieri u l-ieħor liebes ta’ Torok u dawn jibdew ġlieda bix-xwabel, naturalment iż-żifna tispiċċa bir-rebħa tal-Kavallieri. Fl-aħħar taż-żifna dawk lebsin ta’ Kavallieri jgħollu fuq l-idejn tifla bi stallett f’idha msejħa l-Għarusa li tirrappreżenta r-rebħa. Fi żmien il-Kavallieri l-Parata kienet tittieħed bis-serjeta` u f’Sibt il-Karnival fil-għodu kmieni nies mill-irħula kien jmorru ħdejn il-Palazz il-Belt biex jitolbu l-permess tal-Gran Mastru biex jagħmlu l-Parata għaliex mingħajr dan il-permess il-Parata ma kinitx issir u jekk ma ssirx il-parata ma kienx isir Karnival.

Kienu jdendlu ġebla mal-bini imsejjaħ il-Kastellanija fi triq merkanti u jibdew isawtu lil din il-ġebla imsejħa Strappado, bħal sinjal li fit-tlett ijiem tal-karnival ma kienx hemm ġustizzja.[1]

Ikel Tradizzjonali[immodifika | immodifika s-sors]

Il-Prinjolata: Il-Prinjolata hija kejk tradizzjonali tal-Karnival. Huwa kejk miksi bil-krema u mimli biċ-ċikkulata, sponge, frott u ġewz. Il-Perlini: Huma ħelu żgħir li jkunu b’ħafna kuluri. Fl-antik il-maskarati kienu jwaddbu l-perlini lin-nies li jkunu qed jammirawhom fit-toroq.Din hija poeżija żgħira fuq il-perlini:

Maskarata tin perlina
Għax warajk għandek xadina
Minflok waħda tini tnejn
Għax tiddobba xi daqtejn.

Għalkemm il-karnival illum sar aktar fejn in-nies jixtru u jonfqu l-flus kif ukoll jagħmlu n-negozju u spettaklu turistiku jibqa’ festa folkloristika importanti ħafna li miegħu hemm marbutin tradizzjonjiet antiki li sfortunatament ħafna minnhom intesew.

Referenzi[immodifika | immodifika s-sors]

  1. ^ [1],