Produzzjoni tal-inbid

 

Għeneb tal-inbid mill-Wied ta’ Guadalupe f’Ensenada, Baja California, il-Messiku

Il-produzzjoni tal-inbid, jew vinifikazzjoni, tibda bl-għażla tal-frott, imbagħad il-fermentazzjoni tiegħu f’alkoħol, u l-ibbottiljar tal-likwidu bħala prodott finali. L-istorja tal-produzzjoni tal-inbid tmur lura eluf ta’ snin. Hemm evidenza li tissuġġerixxi li l-ewwel produzzjoni tal-inbid seħħet fil-Georgia u fl-Iran madwar 6000 sa 5000 sena QK. Ix-xjenza tal-inbid u tal-produzzjoni tiegħu tissejjaħ enoloġija. Xi ħadd li jipproduċi l-inbid jista’ jissejjaħ ukoll vitikultur. It-tkabbir tal-għeneb jissejjaħ vitikultura, u hemm diversi tipi ta’ għeneb.

Il-produzzjoni tal-inbid tista’ tinqasam f’żewġ kategoriji ġenerali: il-produzzjoni ta’ nbid mingħajr gass u l-produzzjoni ta’ nbid spumanti (bil-gass naturali jew miżjud). L-inbid aħmar, l-inbid abjad u l-inbid rożè huma l-kategoriji l-oħra prinċipali. Għalkemm ħafna mill-inbid isir mill-għeneb, jista’ jsir ukoll minn pjanti oħra. (Ara: inbid tal-frott.) Xorb alkoħoliku ħafif ieħor simili (b’differenza mill-birra jew spirti) jinkludi l-idromel, li jsir bil-fermentazzjoni tal-għasel u l-ilma; is-sajder (“sajder tat-tuffieħ”), li jsir bil-fermentazzjoni tal-meraq tat-tuffieħ; il-perry (“sajder tal-lanġas”), li jsir bil-fermentazzjoni tal-meraq tal-lanġas; u l-kumis, li jsir bil-fermentazzjoni tal-ħalib tad-debba.

L-għeneb

Vinji fl-Italja

Għeneb Cabarnet Sauvignonmaħsud

Il-kwalità tal-għeneb tiddetermina l-kwalità tal-inbid aktar minn kwalunkwe fattur ieħor u tiġi affettwata mill-varjetà tal-għeneb kif ukoll mit-temp matul l-istaġun tat-tkabbir, mill-minerali u l-aċidità tal-ħamrija, miż-żmien tal-ħsad, u mill-metodu taż-żbir. Il-kombinazzjoni ta’ dawn l-effetti spiss tissejjaħ bħala t-territorju tal-għenba, jew aħjar terroir bil-Franċiż. Minħabba li l-għeneb huwa sensittiv għall-kundizzjonijiet tat-temp, il-produzzjoni tal-inbid tiġi affettwata mit-tibdil fil-klima.

L-għeneb ġeneralment jinħasad mill-vinja mill-bidu ta’ Settembru sal-bidu ta’ Novembru fl-emisfera tat-Tramuntana, u minn nofs Frar sal-bidu ta’ Marzu fl-emisfera tan-Nofsinhar. F’xi żoni kesħin fl-emisfera tan-Nofsinhar (bħal fit-Tasmanja), il-ħsad jibqa’ sejjer sa Mejju.

L-aktar speċi komuni ta’ għeneb għall-inbid hija l-Vitis vinifera, li tinkludi kważi l-varjetajiet kollha ta’ oriġini Ewropea.