Muntanji Blu u John Crow
Il-Park Nazzjonali tal-Muntanji Blu u John Crow jew fil-qosor il-Muntanji Blu u John Crow huwa park nazzjonali fil-Ġamajka. Il-park ikopri 495.2 km2 u jirrappreżenta 4.5 % tas-superfiċe tal-art tal-Ġamajka. Isem il-park ġej mill-Muntanji Blu, il-katina muntanjuża li tinsab fi ħdanu, kif ukoll minn isem għasfur komuni li jgħix fil-park, magħruf bħala "John crow" (Cathartes aura). Globalment il-park huwa magħruf għall-bijodiversità tiegħu. Dan il-park huwa l-aħħar minn żewġ ħabitats magħrufa tal-farfett ġgantesk tal-kuda (Papilio homerus), l-ikbar farfett fl-Emisferu tal-Punent, u huwa wkoll il-ħabitat tal-malvizz Ġamajkan fil-periklu (Nesopsar nigerrimus), refuġju għall-boa tal-Ġamajka (Chilabothrus subflavus) u għall-hutia tal-Ġamajka (Geocapromys brownii).[1][2]
Il-park tniżżel fil-lista tas-Siti ta' Wirt Dinji tal-UNESCO bħala sit kulturali u naturali (sit imħallat) fit-3 ta' Lulju 2015.[3]
Sit ta' Wirt Dinji
[immodifika | immodifika s-sors]
Il-Muntanji Blu u John Crow ġew iddeżinjati bħala Sit ta' Wirt Dinji tal-UNESCO fl-2015.[3]
Il-valur universali straordinarju tas-sit ġie rrikonoxxut abbażi ta' tliet kriterji tal-għażla tal-UNESCO: il-kriterju (iii) "Xhieda unika jew minn tal-inqas eċċezzjonali ta' tradizzjoni kulturali jew ta' ċivilizzazzjoni li għadha ħajja jew li għebet"; il-kriterju (vi) "Assoċjazzjoni diretta jew tanġibbli ma' avvenimenti jew ma' tradizzjonijiet ħajjin, ma' ideat jew ma' twemmin, jew ma' xogħlijiet artistiċi jew letterarji ta' valur universali straordinarju"; u l-kriterju (x) "Post fejn hemm l-iktar ħabitats naturali importanti u sinifikanti għall-konservazzjoni fil-post tad-diversità bijoloġika, inkluż fejn hemm speċijiet mhedda ta' valur universali straordinarju mill-perspettiva tax-xjenza jew tal-konservazzjoni".[3]
Referenzi
[immodifika | immodifika s-sors]- ^ "Home - Blue and John Crow Mountains National Park". www.blueandjohncrowmountains.org. Miġbur 2024-12-13.
- ^ "Blue and John Crow Mountains". Google Arts & Culture (bl-Ingliż). Miġbur 2024-12-13.
- ^ a b ċ "Blue and John Crow Mountains - UNESCO". whc.unesco.org. Miġbur 2024-12-13.