Maria Adeodata Pisani

Maria Adeodata Pisani
abbess (en)
Ħajja
Twelid	Napli, 29 Diċembru 1806
Mewt	Mdina, 25 Frar 1855
Okkupazzjoni
Okkupazzjoni	soru
Festa
25 ta' Frar

Maria Adeodata Pisani (Ordni ta’ San Benedittu, 29 ta’ Diċembru 1806 - 25 ta’ Frar 1855) kienet soru Benedittina Kattolika Maltija fil-monasteru ta’ San Pietru l-Imdina, Malta.

---

Pisani ġiet ibbeatifikata mill-Papa Ġwanni Pawlu II fid-9 ta’ Mejju 2001. Numru ta’ isqfijiet ħarġu wkoll ittra pastorali , fejn enfasizzaw id-diffikultajiet serji li kellha taffaċċja. Huma stqarrew li Pisani kellha “tfulija diffiċli minħabba li l-ġenituri tagħha ma kinux jgħixu flimkien”. Qalu wkoll li hi rrinunzjat ġidha u użatu għall-karità u għexet bħala soru tal-klawsura minn jeddha.

---

Ħajja

Maria Teresa Pisani twieldet fid-29 ta’ Diċembru 1806 f’Napli, u tgħammdet dakinhar stess fil-Parroċċa ta’ San Mark f’Pizzofalcone. Pisani kienet l-unika bint tal-Baruni Benedetto Pisani Mompalao Cuzkeri u Vincenza Carrano. Missierha kellu t-titlu Malti ta’ Barun ta’ Frigenuini u ommha kienet Taljana.

Missierha qabad il-vizzju tax-xorb u dan eventwalment wassal għall-problemi fiż-żwieġ, tant li meta Pisani kienet għadha ċkejkna, ommha telqet mid-dar konjugali u fdat lil bintha f’idejn il-kunjata, Elisabeth Mamo Mompalao, li kienet tgħix Napli. Mompalao mietet meta n-neputija tagħha Maria Teresa kellha biss għaxar snin. Wara l-mewt ta’ nannitha, intbagħtet tgħix fl-Istituto di Madama Prota, skola rinomata f’Napli li kienet teduka l-bniet tal-aristokratiċii tal-lokal.

Fl-1821, missierha kien involut f’rewwixta f’Napli u kien imfittex mill-awtoritajiet. Minħabba li kien ċittadin Brittaniku, is-sentenza tiegħu ġiet sospiża u r-Re Ferdinandu II ta’ Napli keċċieh mil-pajjiż, u ġie deportat f’Malta. Fl-1825, Pisani u ommha marru joqgħodu r-Rabat Malta ma’ xi qraba.

Barra diversi problemi ta’ saħħa, Pisani kellha deformazzjoni fl-ispalla kkawżata minn seftura li kienet issawwatha meta kienet tgħix ma’ nannitha f’Napli. Għalkemm ommha ppruvat iżżewwiġha, Pisani rriffjutat kull proposta matrimonjali u għażlet li tgħix ħajja trankwilla billi tiffrekwenta l-Knisja u tgħin lill-foqra. Xtaqet tidħol fil-Monasteru ta’ San Pietru bħala novizza. Minkejja li ommha ppruvat tbiddlilha fehemitha, Pisani kienet determinata li tidħol soru tal-klawsura.

Meta għalqet 21 sena, ingħaqdet mal-komunità Benedittina tas-sorijiet tal-klawsura fil-monasteru ta’ San Pietru fl-Imdina u għażlet l-isem Maria Adeodata (" mogħtija minn Alla”). Hi ħadet il-voti ta’ soru sentejn wara. Fil-monasteru, Pisani kienet tinqala’ ħafna biex taħdem il-bizzilla. Hi kellha bosta rwoli fosthom ta’ sagristana, purtinara, għalliema, u majjistra tan-novizzi. Il-karità tagħha kienet ta’ benefiċċju kemm għas-sorijiet fil-monasteru kif ukoll għal bosta nies barra l-kunvent.

Pisani kitbet diversi xogħlijiet. L-aktar wieħed magħruf, Ġnien mistiku tar-ruħ li tħobb lil Ġesù u lil Marija hu ġabra ta’ riflessjonijiet personali tagħha bejn is-snin 1835 u 1843. Dan ix-xogħol ġie deskritt bħala “kapolavur fiċ-ċokon ta’ kitba spiritwali”.

---

Serviet ta’ badessa mill-1851 sal-1853, iżda kellha tirtira mid-doveri tagħha minħabba problemi fil-qalb. Mietet fil-25 ta’ Frar, 1855, ta’ 48 sena, u ndifnet l-għada fil-kripta tal-monasteru Benedittin fl-Imdina.

Pisani baqgħet magħrufa għall-qdusija tagħha, l-imħabba għall-foqra, is-sagrifiċċji li imponiet fuqha nnfisha, u estasijiet qawwijjin tant li kienu jarawha tinqata' mill-art.

---

Venerazzjoni

Il-kawża ta’ Pisani infetħet formalment fid-29 t’April 1898, fejn ingħatat it-titlu ta’ Qaddejja t' Alla. Papa Ġwanni Pawlu II iddikjarha Beata fid-9 ta’ Mejju 2001, il-Furjana, Malta. Skont il-Papa, il-miraklu li wassal għall-beatifikazzjoni tagħha seħħ fl-24 ta’ Novembru, 1897, meta l-badessa Giuseppina Damiani mill-Monasteru ta’ San Ġwann il-Battista f’Subiaco, l-Italja, fieqet f’daqqa waħda minn tumur fl-istonku bl-interċezzjoni ta’ Maria Pisani. Wara l-beatifikazzjoni tagħha inkixef ritratt enormi tal-Beata — replika ta’ pittura biż-żejt oriġinali kkummissjonata fl-1898 minn Pietro Pace, l-Arċisqof ta’ Rodi u l-Isqof ta’ Malta. Il-Papa ħabbar ukoll li l-festa tagħha se tibda tiġi ċċelebrata fil-25 ta’ Frar, il-ġurnata tal-mewt tagħha.

"It-talb, l-ubbidjenza, is-servizz lil ħutha s-Sorijiet u l-maturità li biha kienet taqdi d-doveri tagħha kienu l-elementi li sawwru l-ħajja silenzjuża u qaddisa ta’ Maria Adeodata. Mistura fil-qalba tal-Knisja, “niżlet bilqiegħda f’riġlejn il-Mulej sabiex tisma x’kien qiegħed jgħid” (Luqa 10:39) u taħseb “fil-ħwejjeġ tas-sema, mhux f’dawk tal-art” (Kolossin 3:2). Permezz tat-talb, il-ħidma u l-imħabba tagħha, hi saret fawwara tal-ispiritwalità u l-missjoni li tagħti l-frott, u li mingħajrhom il-Knisja ma tistax tippriedka il-Vanġelu kif ordna Kristu. Dan għaliex il-missjoni u l-kontemplazzjoni jirrikjedu lil xulxin b’mod assolut (cf. Novo Millennio Ineunte). L-eżempju qaddis tas-Soru Adeodata inkoraġġixa t-tiġdid ta’ ħajja reliġjuża fil-Monasteru tagħha. Għalhekk nixtieq li bl-interċezzjoni tagħha sseħħ intenzjoni partikolari li għandi f’qalbi. Dan l-aħħar, sar ħafna xogħol sabiex il-ħajja reliġjuża tadatta għaċ-ċirkostanzi taż-żminijiet tal-lum, u l-benefiċċju ta’ dan jidher fil-ħajja ta’ bosta nisa u rġiel reliġjużi. Madanakollu, hemm bżonn jiġġeded l-apprezzament għar-raġunijiet teoloġiċi profondi ta’ din il-forma speċjali ta’ konsakrazzjoni. Għadna nistennew it-twettiq sħiħ tat-tagħlim tal-Konċilju Vatikan it-Tieni dwar il-valur traxxendenti tal-imħabba speċjali t’Alla u oħrajn li jwasslu għal ħajja bil-voti ta’ povertà, kastità u ubbidjenza.  Nirrakommanda li n-nisa u rġiel ikkonsakrati kollha jimxu mal-eżempju ta’ maturità u responsabilità personali li kienu evidenti fil-ħajja tal-Beata Adeodata". — Papa Ġwanni Pawlu II, mill-Quddiesa tal-Beatifikazzjoni tal- Maria Adeodata Pisani, 9 ta’ Mejju, 2001.

Illum, il-parti ta’ wara tal-monasteru ta’ San Pietru fl-Imdina hija miftuħa għall-pubbliku bħala mużew. Il-kmamar tal-Beata Adeodata Pisani fil-monasteru huma wkoll miftuħin għall-viżitaturi.