Kumpless Modern ta' Pampulha

Il-Kumpless Modern ta' Pampulha.

Il-Kumpless Modern ta' Pampulha (bil-Portugiż: Conjunto Moderno da Pampulha) huwa proġett urban f'Belo Horizonte, fl-istat ta' Minas Gerais, il-Brażil. Ġie ddisinjat madwar lag artifiċjali magħruf bħala l-Lag ta' Pampulha, fid-distrett ta' Pampulha, u jinkludi każinò, sala taż-żfin, il-Klabb tal-Jottijiet tal-Golf (attwalment l-eks Tênis Clube) u l-Knisja ta' San Franġisk ta' Assisi. Il-binjiet ġew iddisinjati mill-arkitett Oscar Niemeyer, b'kollaborazzjoni mal-arkitett pajsaġġistiku Roberto Burle Marx, artisti Brażiljani tal-Moderniżmu, u l-inġinier strutturali Joaquim Cardozo.

F'Lulju 2016, il-Kumpless Modern ta' Pampulha tniżżel fil-lista tas-Siti ta' Wirt Dinji tal-UNESCO bis-saħħa tal-eżempji straordinarji tal-arkitettura moderna u l-importanza tiegħu fl-iżvilupp ta' identità arkitettonika Brażiljana.

Sit ta' Wirt Dinji

Il-Kumpless Modern ta' Pampulha ġie ddeżinjat bħala Sit ta' Wirt Dinji tal-UNESCO fl-2016.

Il-valur universali straordinarju tas-sit ġie rrikonoxxut abbażi ta' tliet kriterji tal-għażla tal-UNESCO: il-kriterju (i) "Rappreżentazzjoni ta' kapulavur frott il-kreattività tal-bniedem"; il-kriterju (ii) "Wirja ta' skambju importanti ta' valuri umani, tul perjodu ta' żmien jew fi ħdan żona kulturali fid-dinja, dwar l-iżviluppi fl-arkitettura jew it-teknoloġija, l-arti monumentali, l-ippjanar tal-bliet jew id-disinn tal-pajsaġġ"; u l-kriterju (iv) "Eżempju straordinarju ta' tip ta' bini, ta' grupp ta' siti jew ta' pajsaġġ arkitettoniku jew teknoloġiku li joħroġ fid-dieher stadju/i sinifikanti fl-istorja tal-bniedem".