Il-Familja ta' Bin Laden

 

Il-Familja ta' Bin Laden عائلة بن لادن (Għajla Bin Lâden)
Reġjun kurrenti	Peniżola Għarbija
Imkien ta' nisel	Ħadramewt, Jemen
Membri magħrufa sew	Osama bin Laden

Bini ta' uffiċini tal-Grupp Binladin Sawdi fl- Arabja Sawdija.

Il-familja ta' Bin Laden (bl-Għarbi: عائلة بن لادن, b'ittri Latini: Għajla Bin Lâden), miktuba wkoll bħala Bin Ladin, hija familja Ħadramija għanja marbuta mill-qrib maċ-ċrieki l-aktar interni tal-familja rjali Sawdija (id-Dar ta' Sgħud). Hija l-isem u l-azzjonist ta' kontroll tal-Grupp Binladin Sawdi, ditta tal-kostruzzjoni multinazzjonali. Wara l-attakki tal-11 ta' Settembru, il-familja saret is-suġġett ta' attenzjoni u skrutinju tal-midja minħabba l-attivitajiet ta' Osama bin Laden, l-eks kap tal-Qaeda, anke jekk ċaħduh pubblikament fl-1994.

Bidu

L-oriġini tal-familja ġejja minn Għawad bin Laden mir-raħal tar-Rubat, fil-Wied Doan tal-Wied Tarim, fil-gvernatorat ta’ Ħadramewt, fil-Jemen. Iben Għawad kien Muħammed bin Għawad bin Laden (1908-1967). Muħammed bin Laden kien nattiv tar-reġjun ta’ Ħadramewt fil-Lvant tal-Jemen, u, bħal ħafna Ħdarem oħra, emigra lejn l-Arabja Sawdija qabel l-Ewwel Gwerra Dinjija. Huwa waqqaf kumpanija tal-kostruzzjoni u ġie għall-attenzjoni ta’ Għabdilgħażiż bin Sgħud (Ingliż: Ibn Saud) permezz ta’ proġetti ta’ kostruzzjoni, u aktar tard ingħata kuntratti għal rinnovazzjonijiet kbar f'Mekka. Huwa kiseb il-fortuna inizjali tiegħu mid-drittijiet esklussivi biex jibni l-moskej u bini reliġjuż ieħor kollu mhux fl-Arabja Sawdija biss, iżda safejn laħqet l-influwenza ta’ Iben Sgħud. Sal-mewt tiegħu, Muhammed bin Għawad bin Laden kellu kontroll esklussiv fuq ir-restawr fil-Ġiema' l-Aqsa (il-Moskea l-Aqsa) f’Ġerusalemm. Dalwaqt, in-netwerk korporattiv ta’ Bin Laden estenda ferm lil hinn mis-siti tal-kostruzzjoni biss.

L-intimità speċjali ta’ Muħammed mal-monarkija ġiet wirtet mill-ġenerazzjoni iżgħar ta’ Bin Laden. Ulied Muhammed attendew il-Victoria College, f’Alessandrija, l-Eġittu. Fost sħabhom tal-iskola kien hemm ir-Re Hussein tal-Ġordan, Zaid Al Rifai, l-aħwa Kashoggi (li missierhom kien wieħed mit-tobba tar-re), Kamal Adham (li mexxa d-Direttorat tal-Intelligence Ġenerali taħt ir-Re Fejsal), il-kuntratturi tal-lum Mohammed Al Attas, Fahd Shobokshi, Ghassan Sakr, u l-attur Omar Sharif.

Meta Muħammed bin Laden miet fl-1967, ibnu Salem bin Laden ħa f'idejh l-intrapriżi tal-familja, sakemm miet aċċidentalment fl-1988.

Membri tal-familja

Uffiċjali tal-intelliġenza tal-Punent jistmaw li l-qraba kollha tal-familja jistgħu jgħoddu sa 600. Fl-1994, il-familja Bin Laden ċaħdet lil Osama bin Laden, u l-gvern Sawdi rrevoka l-passaport tiegħu. Il-gvern Sawdi neħħielu wkoll iċ-ċittadinanza lil Osama talli tkellem pubblikament kontra l-gvern talli ppermetta lit-truppi Amerikani jkunu bbażati fl-Arabja Sawdija bi tħejjija għall-Gwerra tal-Golf tal-1991.

Il-gruppi tal-familja Bin Laden, ibbażati fuq in-nazzjonalitajiet tan-nisa, jinkludu l-aktar prominenti "grupp Sawdi", "grupp Sirjan", "grupp Lebaniż", u "grupp Eġizzjan". Il-grupp Eġizzjan jimpjega 40,000 ruħ, x'aktarx l-akbar investitur barrani privat tal-pajjiż. Osama bin Laden twieled bħala l-uniku iben tal-għaxar mara ta' Muhammed bin Laden, Hamida l-Għattas, li kienet ta' oriġini Sirjana, jagħmel lil Osama membru tal-grupp Sirjan.

Titjiriet ta' Bin Laden

Madwar 13-il membru tal-familja Bin Laden, flimkien mal-assoċjati u l-gwardji tal-ġisem tagħhom, tellgħu mill-Istati Uniti fuq titjira mikrija ma' Ryan International Airlines (Ryan International Flight 441), tmien ijiem wara l-attakki terroristiċi tal-11 ta' Settembru 2001, skont manifest tal-passiġġieri li ħareġ fil-21 ta' Lulju 2004. Il-lista tal-passiġġieri nkisbet u nħarġet mis-Senatur Frank Lautenberg (D-NJ), li akkwistaha mingħand uffiċjali fl-Ajruport Internazzjonali Logan ta' Boston. L-ebda waħda mit-titjiriet, domestiċi jew internazzjonali, ma seħħet qabel il-ftuħ mill-ġdid tal-ispazju tal-ajru nazzjonali filgħodu tat-13 ta' Settembru u l-Kummissjoni tad-9/11 ma sabet "l-ebda evidenza ta' intervent politiku".

Fost il-passiġġieri bil-kunjom Bin Laden kien hemm Omar Awad bin Laden, li kien għex mat-tifel ta’ Osama, Abdallah Awad bin Laden, li kien involut fil-formazzjoni tal-fergħa Amerikana tal-Assemblea Dinjija taż-Żgħażagħ Misilmin f’Alessandrija, u Shafig bin Laden, ħu Osama minn naħa ta’ missieru li allegatament kien qed jattendi l-konferenza annwali tal-investituri tal-Carlyle Group. Abbord kien hemm ukoll Akberali Moawalla, uffiċjal mal-kumpanija tal-investiment immexxija minn Yeslam bin Ladin, ħu ieħor minn ħu Osama bin Laden minn naħa ta’ missieru. Ir-rekords juru li passiġġier, Kholoud Kurdi, għex fit-Tramuntana ta’ Virginia ma’ qarib ta’ bin Laden.

It-titjiriet ta’ bin Laden irċevew pubbliċità ġdida meta ġew diskussi fid-dokumentarju kontroversjali ta’ Michael Moore Fahrenheit 9/11.

Il-Kummissjoni tad-9/11 sabet li l-"FBI wettqet skrinjar sodisfaċenti taċ-ċittadini Sawdin li telqu mill-Istati Uniti fuq titjiriet charter. Il-gvern Sawdi ġie avżat u qabel mar-rekwiżiti tal-FBI li l-passiġġieri jiġu identifikati u vverifikati ma' diversi databases qabel ma jitilqu t-titjiriet. Ir-rappreżentant tal-Amministrazzjoni Federali tal-Avjazzjoni li jaħdem fiċ-ċentru tal-operazzjonijiet tal-FBI aċċerta ruħu li l-FBI kienet konxja tat-titjiriet taċ-ċittadini Sawdin u kienet kapaċi tiskrutinizza l-passiġġieri qabel ma tħallew jitilqu."