Giorgio Grognet de Vassé
| Giorgio Grognet de Vassé | |
|---|---|
 | |
| Ħajja | |
| Twelid | Malta, 1774 |
| Nazzjonalità | Malta |
| Mewt | Mosta, 1862 |
| Okkupazzjoni | |
| Okkupazzjoni | arkitett |
| Servizz militari | |
| Iġġieldu | invazzjoni Franċiża tal-Eġittu u s-Sirja |
Giorgio Grognet de Vassé (1774–1862) kien perit u antikwarju Malti, li huwa magħruf l-aktar għad-disinn tal-Bażilika tal-Mosta, magħrufa popolarment bħala r-Rotunda tal-Mosta.
Fl-aħħar tas-seklu 18, studja fi Frascati fl-Istati Papali biex isir qassis. Madankollu, żviluppa appoġġ qawwi għall-Ġakobini, u ngħaqad mal-forza spedizzjonarja Franċiża bħala uffiċjal matul il-kampanja Eġizzjana. Huwa rritorna Malta fis-seklu 19, xi snin wara li ntemmet ir-rivoluzzjoni kontra l-ħakma Franċiża ta' Malta.[1]
Sas-snin tletin tas-seklu dsatax, il-knisja parrokkjali tal-Mosta, li kienet inbniet fis-seklu 17 mill-perit Tommaso Dingli, kienet saret żgħira wisq biex tilqa' l-popolazzjoni tal-belt. Grognet ippropona li l-knisja tinbena mill-ġdid fuq disinn neoklassiku bbażat fuq il-Pantheon f'Ruma. Minkejja l-oppożizzjoni mill-Isqof Francesco Saverio Caruana, id-disinn ġie approvat u l-kostruzzjoni tal-knisja bdiet fit-30 ta' Mejju 1833. Grognet qatt ma kien irċieva taħriġ arkitettoniku formali, għalhekk matul il-kostruzzjoni rċieva servizzi ta' konsultazzjoni minn membru tal-familja Sammut.[2] Il-knisja ħadet 28 sena biex tinbena, u tlestiet fil-bidu tas-snin sittin tas-seklu dsatax. Id-disinn tal-knisja ġie mfaħħar kemm waqt il-kostruzzjoni[3] kif ukoll wara t-tlestija tagħha, u hija meqjusa bħala l-kapolavur ta' Grognet.[1]
Grognet kien ukoll antikwarju, u kellu għarfien profond tal-klassiċi. Wara li ġew skoperti siti preistoriċi bħal Ġgantija u Ħaġar Qim fi żmien ħajtu, huwa beda jemmen li Malta kienet il-post tal-belt mitika Atlantis. Huwa ppubblika kumpendju qasir li jiddettalja it-teorija tiegħu.[1]
Grognet iżżewweġ lis-Sinjura Orsetta della Grazie Paleologo fl-1834.[1] Huwa għex l-aktar fil-kapitali Valletta, iżda waqt li kien qed jissorvelja l-kostruzzjoni tar-rotunda huwa għex f'dar fil-Mosta li kienet tan-nutar Francesco Chetcuti. Din id-dar illum tissejjaħ Villa Grognet, u d-disinn tagħha huwa attribwit lil Grognet.[4][5]
Malli tlestiet ir-rotunda, Grognet irċieva pensjoni annwali ta’ £100 mingħand il-Gvernatur Le Marchant, iżda miet ftit xhur wara fl-1862. Huwa ġie midfun fil-kappella tal-Verġni taċ-Ċintura fir-rotunda tal-Mosta, waħda mit-tmien kappelli żgħar li jistgħu jinsabu fil-knisja.[1]
Triq residenzjali fil-Mosta u park residenzjali fiż-żona tal-Blata l-Għolja tal-Mosta huwa msemmijin għalih.
Referenzi
[immodifika | immodifika s-sors]- 1 2 3 4 5 Schiavone, Michael J. (2009). Dictionary of Maltese Biographies Vol. 2 G–Z. Pietà: Pubblikazzjonijiet Indipendenza. pp. 989–990. ISBN 9789993291329.
- ↑ "200-year-old History in an old musty archive". The Malta Independent. 11 March 2012. Arkivjat minn l-oriġinal fl-4 March 2016.
- ↑ MacGill, Thomas (1839). A hand book, or guide, for strangers visiting Malta. Malta: Luigi Tonna. pp. 124–126.
- ↑ "Villa Grognet". Times of Malta. 7 April 2012. Arkivjat minn l-oriġinal fl-4 March 2016.
- ↑ Cilia Debono, Emanuel (13 April 2012). "Scheduling of Villa Grognet". Times of Malta. Arkivjat minn l-oriġinal fl-1 April 2016.
