Aqbeż għall-kontentut

George Steiner

Minn Wikipedija, l-enċiklopedija l-ħielsa
George Steiner
ġudikant tal-Booker Prize

Ħajja
Isem propju Francis George Nathaniel Steiner
Twelid Neuilly-sur-Seine, 23 April 1928
Nazzjonalità Franza
Stati Uniti tal-Amerka
L-ewwel lingwa Franċiż
Mewt Cambridge, 3 Frar 2020
Familja
Konjuga/i Zara Steiner (en) Translate  (1955 -
Ulied
uri
Edukazzjoni
Alma mater Balliol College (en) Translate
Lycée Janson de Sailly (mul) Translate
Università ta' Chicago
Università ta' Harvard
Lycée français de New York (en) Translate
Livell tal-edukazzjoni dottorat
Studenti dottorali Aminadav Dykman (en) Translate
Lingwi Ġermaniż
Franċiż
Ingliż
Okkupazzjoni
Okkupazzjoni filosofu
rumanzier
traduttur
għalliem fl-università
kritiku letterarju
ġurnalist
kittieb
saġġist
Impjegaturi Princeton University (en) Translate
Università ta' Harvard
Università ta' Ġinevra
Williams College (en) Translate
The Economist (mul) Translate  (1952 -  1956)
Xogħlijiet importanti After Babel (en) Translate
Premjijiet
List
Sħubija British Academy (en) Translate
Akkademja Amerikana tal-Arti u tax-Xjenzi
Akkademja Bavarjana tal-Belle Arti
Soċjetà Rjali tal-Letteratura

Francis George Steiner,[1] FBA (23 t’April, 1929 – 3 ta’ Frar, 2020)[2][3] kien kritiku letterarju, esejist, filosofu, rumanzier u edukatur Franko-Amerikan. Kiteb estensivament dwar ir-relazzjoni bejn il-lingwa, il-letteratura u s-soċjetà, kif ukoll fuq l-impatt tal-Olokawstu.[4] Artiklu tal-2001 f’The Guardian iddeskriva lil Steiner bħala “poliglotta u studjuż kbir”.[5]

L-ammiraturi tiegħu jiddeskrivuh bħala “wieħed mill-aqwa mħuħ fid-dinja letterarja tal-lum”.[2] Il-kittieba Ingliża A. S. Byatt iddeskrivietu bħala “raġel tar-Rinaxximent li ġie tard wisq ...metafiżiċista Ewropej b’instint għall-ideat mexxejja ta’ żmienna”.[5] Harriet Harvey Wood, li kienet eks-direttriċi letterarja tal-British Council, iddeskrivietu bħala “lettur manjifiku – profetiku u traġiku li kien jiġi b’nofs paġna ta’ noti mħażżin, u qatt ma jirreferi għalihom”.[5]

Steiner kien Professur tal-Ingliż u l-Letteratura Komparattiva fl-Università ta’ Ġinevra (1974–94), Professur tal-Letteratura Komparattiva u Fellow fl-Università t’Oxford (1994–95), Professur tal-Poeżija fl-Università ta’ Harvard (2001–02) u Fellow Straordinarju f’Churchill College, Cambridge.[1]

Ħajja bikrija

[immodifika | immodifika s-sors]

Frances George Steiner twieled fit-23 t’April tal-1929 f’Pariġi, minn ġenituri Lhud Vjenniżi, Else (née Franzos) u Frederick Georg Steiner. Kellu oħtu ikbar minnu, Ruth Lilian, li twieldet fi Vjenna fl-1922.[1] Else Steiner kienet grande dame minn Vjenna[6] u Frederick Steiner kien avukat mal-bank ċentrali tal-Awstrija (Oesterreichische Nationalbank)[6] u kien jaħdem bħala bankier tal-investimenti f’Pariġi.

Ħames snin qabel it-twelid ta’ Steiner, missieru kien ċaqlaq lill-familtu mill-Awstrija għal Franza sabiex jaħrab mit-theddida tal-anti-semitiżmu. Hu kien jemmen li l-Lhud “kienu mistednin li jinsabu f’periklu jkunu fejn ikunu”[5] u b’hekk iddeċieda li jeduka lil uliedu b’diversi lingwi. Steiner trabba bi tlett lingwi materni: il-Germaniż, l-Ingliż, u l-Franċiż. Ommu kienet multilingwi u ta’ spiss kienet “tibda sentenza b’lingwa u tispiċċaha b’oħra”.[5]

Meta kellu sitt snin, missieru, li kien jemmen fl-importanza tal-edukazzjoni klassika, għallmu jaqra l-Iliad bil-Grieg antik.[5][7][8] Ommu, li kienet temmen bil-qawwa li wieħed m’għandux jitħassar lilu nnifsu,[5] għenet lil Steiner jegħleb diżabbiltà li twieled biha: id l-leminija dgħajfa. Minflok ħallietu jsir xellugi, hi insistiet li għandu juża idu l-leminija bħal kwalunkwe persuna li m’għandhiex din id-diżabbiltà.[5]

u kien jaħdem bħala bankier tal-investimenti f’Pariġi. Fl-1940, waqt it-Tieni Gwerra Dinjija, missier Steiner kien f’New York City fuq missjoni ekonomika għall-Gvern Franċiż, u kien ingħata permess sabiex familtu tiġi ħdejh, minħabba li l-Ġermaniżi kienu qed jippreparaw biex jinvadu Franza. Steiner, ommu, u oħtu Lilian, telqu bil-vapur minn Ġenova. Xahar wara li telqu, in-Nażisti okkupaw Pariġi, u mill-ħafna tfal Lhud fil-klassi tiegħu Steiner kien wieħed minn tnejn li baqgħu ħajjin wara l-gwerra.[5] Għal darb’oħra, l-għarfien ta’ missieru salva lil familtu, u dan wassal sabiex Steiner ħassu li salva, ħsieb li ħalla impatt profond fuq l-aħħar kitbiet tiegħu. “Ħajti kollha kienet dwar il-mewt, it-tifkir, u l-Olokawstu.”[5] Steiner sar japprezza li seta’ jħuf u kien jgħid li “s-siġar għandhom l-għeruq u jien għandi s-saqajn; u kien dan li salvali ħajti.”[5] Qatta’ l-bqija tas-snin skolastiċi tiegħu fil-Lycée Français de New York f'Manhattan, u sar ċittadin tal-Istati Uniti fl-1944.[3]

Wara l-iskola post-sekondarja, Steiner mar l-Università ta’ Chicago fejn studja l-letteratura, kif ukoll il-matematika u l-fiżika, u kiseb Baċellerat fl-1948. Kiseb ukoll Maġisteru mill-Università ta’ Harvard fl-1950. Wara, Steiner attenda Balliol College f’Oxford permezz ta’ Rhodes Scholarship.[3]

Karriera

[immodifika | immodifika s-sors]

Mill-1956 sal-1958, Steiner kien studjuż fl-Institute for Advanced Study fi Princeton, New Jersey. Kellu wkoll professorat Fulbright f’Innsbruck, l-Awstrija, mill-1958 sal-1959.[9] Fl-1959, inħatar bħala Gauss Lecturer fi Princeton, fejn għallem għal sentejn.[9] Imbagħad sar Founding Fellow ta’ Churchill College, Cambridge fl-1961. Inizjalment, Steiner ma kienx milqugħ mill-fakultà tal-Ingliż ta’ Cambridge. Xi wħud m’approvawx b’dan l-“entużjast” karismatiku “b’aċċent barrani”[5] u ddubitaw ir-relevanza tar-referenzi kontinwi li kien jagħmel għall-Olokawstu waqt il-lekċers tiegħu. Bryan Cheyette, professur tal-letteratura tas-seklu 20 fl-Università ta’ Southampton, qal li dak iż-żmien, "il-Gran Brittanja [...] kinitx taħseb li kellha relazzjoni mal-Olokawst; il-mitoloġija tagħha tal-gwerra kienet imsejsa fuq il-Blitz, Dunkirk, u l-Battalja tal-Gran Brittanja.”[5] Għalkemm Steiner kien jaqla’ paga ta’ professur, qatt ma ngħata l-pożizzjoni ta’ Professur Sħiħ f’Cambridge bid-dritt li jeżamina. Hu kellu l-għażla li jitlaq mill-Ingilterra u jikseb professorati fl-Istati Uniti, imma missieru oġġezzjona, għaliex Hitler kien qal li ħadd mhu se jifdal b’isimhom fl-Ewropa, u b’hekk ikun rebaħ. Steiner baqa’ l-Ingilterra għax qal li “lest jagħmel kollox sabiex ma jerġax jarax id-disprezz ta’ missieru.”[5] Steiner kien elett Extraordinary Fellow ta’ Churchill College fl-1969.[10]

Wara diversi snin jaħdem bħala kittieb freelance u lettur okkażjonali, Steiner aċċetta l-pożizzjoni ta’ Professur tal-Ingliż u l-Letteratura Komparattiva fl-Università ta’ Ġinevra fl-1974, u żamm din il-pożizzjoni għal 20 sena, fejn kien jgħallem b’erba’ lingwi. Hu kien jemmen fil-prinċipju ta’ Goethe li l-“ebda monoglott ma jaf verament ilsienu stess.” [5] Sar professur emeritus fl-Università ta’ Ġinevra meta rtira fl-1994, kif ukoll Fellow Onorarju ta’ Balliol College, Oxford, fl-1995. Kellu wkoll l-pożizzjonijiet tal-ewwel Professur Lord Weidenfeld tal-Letteratura Ewropea Komparattiva u Fellow ta’ St Anne’s College, Oxford, mill-1994 sal-1995,[11] u Norton Professor of Poetry fl-Università ta’ Harvard mill-2001 sal-2002.[12]

Steiner ġie deskritt bħala “kritiku u esejist intelliġenti u intelletwali.”[2] Beda jippublika waqt li kien qed jagħmel l-ewwel lawrja fl-Università ta’ Chicago u aktar tard sar kontributur regolari ta’ reċensjonijiet u artikli għal bosta ġurnali u gazzetti, inkluż The Times Literary Supplement u The Guardian. Kiteb ukoll għal The New Yorker għal aktar minn 30 sena, li matulhom jikkontribwixxa aktar minn mitejn reċensjoni.[13]

Filwaqt li kien ġeneralment serju ħafna, Steiner kien ukoll iħobb jiċċajta b’mod xott u ironiku: meta darba kien mistoqsi jekk qatt kienx qara xi ħaġa trivjali bħala tifel, hu wieġeb Moby-Dick.[5]

Fehmiet

[immodifika | immodifika s-sors]

Steiner kien meqjus bħala studjuż kbir u sikwit jiġi kkreditat li adatta l-irwol tal-kritiku billi esplora l-arti u ħsiebijiet mingħajr ma jintrabtu ma’ fruntieri nazzjonali jew dixxiplini akkademiċi. Kien jemmen fil-ġeneralizzazzjoni aktar mill-ispeċjalizzazzjoni u insista li biex tkun litterat għandu jkollok għarfien kemm tal-arti, kif ukoll tax-xjenza. Steiner kien jemmen li n-nazzjonaliżmu hu kunċett wisq vjolenti sabiex jissodisfa l-prerogattiv morali tal-Ġudajiżmu, fuq dan il-punt kien stqarr li “hemm affarijiet li ma nistgħux nagħmlu minħabba dak li aħna.”[5]

Fost l-opinjonijiet mhux tradizzjonali ta’ Steiner, fl-awtobiografija tiegħu titolata Errata (1997), Steiner stqarr il-pożizzjoni simpatetika tiegħu lejn l-użu tal-briedel oriġinat waqt li kien student fl-Università ta’ Chicago. Steiner qal li “l-verġinità tiegħi offendiet lil-Alfie (l-istudent li kien jgħix miegħu waqt l-università). Hu ħaseb li kienet qżiżata u xi ħaġa kważi korrotta f’tifel ta’ dsatax... Hu xamm il-biża’ fija bi stmerrija u ħadni Cicero, Illinois, belt b’reputazjoni ħażina, imma isimha kienet serrħitli moħħi xi ftit. Hemmhek organizza, b’awtorità każwali, introduzzjoni metikoluża fil-ġentilezza tagħha. Kienet din il-ġentilezza, l-attenzjoni f’ċirkostanzi tant insensittivi, li għadha tberikni s’issa.”

Ċentrali għall-ħsibijiet ta’ Steiner, hu qal, “nibqa mistagħġeb, minkejja li tista’ tinstema banali għal ħaddieħor, li l-kliem jista’ jintuża kemm biex tħobb, tibni, taħfer, imma anke biex tittortura, tibgħod, tħarbat, u teqred.”[13]

Steiner irċieva kritika u sapport[14] [15] għall-opinjoni tiegħu li r-razziżmu huwa inerenti f’kulħadd u li t-tolleranza hi superfiċjali. Ġie ddokumentat jgħid li: “Huwa vera faċli npoġġu hawn u ngħidu li ‘r-razziżmu orribli’. Imma staqsuni l-istess ħaġa jekk familja mill-Ġamajka b’sitt itfal tiġi toqgħod ħdejja u joqogħdu jdoqqu l-mużika reggae u rock ġurnata sħiħa. Jew jekk aġent tal-propjetà jiġi għandi u jgħidli li dari spiċċat bla valur minħabba li familja Ġamajkana ġiet tgħix ħdejja. Staqsuni mbagħad!”[14]

Xogħlijiet

[immodifika | immodifika s-sors]

Il-karriera letterarja ta’ Steiner kienet mifruxa fuq nofs seklu. Hu ppublika esejs oriġinali u kotba li jiddiskutu l-anomaliji tal-kultura kontemporanja tal-Punent, kwistjonijiet tal-lingwa u d-“degradazzjoni” tagħha wara l-Olokawstu.[5][16] L-ispeċjalizzazzjoni tiegħu kienet primarjament fil-letteratura komparattiva u xogħlu bħala kritiku kien jiffoka fuq kwistjonijiet kulturali u filosofiċi, partikolarment dawk li għandhom x’jaqsmu mat-traduzzjoni u n-natura tal-lingwa u l-letteratura.[17]

L-ewwel ktieb ta’ Steiner li ġie ppublikat kien Tolstoy or Dostoevsky: An Essay in Contrast (1960), li huwa studju ta’ ideat u ideoloġiji differenti tal-kittieba Russi Leo Tolstoy u Fyodor Dostoevsky. Il-ktieb The Death of Tragedy (1961) oriġina mit-teżi dottorali tiegħu li għamel fl-Università t’Oxford, u fih eżamina letteratura mill-Greċja Antika sa letteratura ta’ nofs is-seklu 20. L-aktar ktieb magħruf tiegħu, After Babel (1975), kien kontribut bikri u influwenti għall-istudji tat-traduzzjoni. Il-ktieb ġie addattat għat-televiżjoni bit-titlu The Tongues of Men (1977)[18] u kien ukoll l-ispirazzjoni wara l-ħolqien ta’ grupp avant-rock Ingliż, News from Babel, fl-1983.

Ix-xogħlijiet ta’ letteratura fittizja ta’ Steiner jinkludu erba’ ġabriet ta’ stejjer qosra: Anno Domini: Three Stories (1964), Proofs and Three Parables (1992), The Deeps of the Sea (1996), u A cinq heures de l’après-midi (2008). In-novella kontroversjali[19] tiegħu, The Portage to San Cristobal of AH (1981)tirrakonta storja fejn grupp ta’ Lhud li jaqbdu in-Nażisti jsibu lil Adolf Hitler (li huwa l-“A.H.” tat-titlu tan-novella) ħaj fil-foresta tropikali tal-Amażonja tletin sena wara tmiem tat-Tieni Gwerra Dinjija.In-novella tesplora ideat dwar l-oriġini tal-anti-semitiżmu li l-ewwel ġew żviluppati minn Steiner fix-xogħol importanti tiegħu ntitolat In Bluebeard's Castle (1971). Steiner issuġġerixxa li bin-Nażiżmu, l-Ewropa kienet qed tpattiha lil-Lhud talli vvintaw il-kuxjenza.[5] Cheyette jikkunsidra l-letteratura fittizja ta’ Steiner bħala “spazju esploratorju fejn jista’ jaħseb kontra tiegħu nnifsu” għaliex “hemm kuntrast bejn l-umiltà u l-aċċessibiltà max-xogħol kritiku ortodoss tiegħu.” Kunċett ċentrali fil-letteratura tiegħu huwa sens “ta’ għira terribbli u mażokista li m’intix hemm — li tlift l-appuntament li kellek mal-infern.”[5]

No Passion Spent (1996) hija ġabra ta’ esejs fuq suġġetti li jvarjaw minn Kierkegaard, Omeru tradott, kitbiet Bibliċi, sat-teorija tal-ħolm ta’ Freud. Errata: An Examined Life (1997) huwa ktieb semi-awtobijografiku.[2] Grammars of Creation (2001), ibbażat fuq il-Gifford Lectures li ta Steiner fl-1990 fl-Università ta’ Glasgow, jesplora diversi suġġetti, mill-kosmoloġija sal-poeżija.[20] L-aħħar ktieb ta’ Steiner, A Long Saturday: Conversations, miktub flimkien ma Laure Adler, ġie ppublikat bil-Franċiż fl-2014, u bl-Ingliż fl-2017.

Ħajja personali u mewt

[immodifika | immodifika s-sors]

Wara li l-manuskritt ibbażat fuq it-teżi tad-dottorat tiegħu f’Oxford, The Death of Tragedy li aktar tard ġie ppubblikat minn Faber and Faber, ġie irrifjutat, Steiner waqaf mill-istudji tiegħu għal ftit żmien sabiex jgħallem l-Ingliż f’Williams College u jaħdem bħala l-kittieb pinċipali ta’ rivista ta’ kull ġimgħa bbażata f’Londra, The Economist, bejn l-1952 u l-1956. Kien propju matul dan iż-żmien li ltaqa’ ma’ Zara Shakow, minn New York ta’ dixxendenza Litwana.[5] Hi studjat Harvard ukoll u ltaqgħu Londra wara suġġertiment tal-eks-professuri tagħhom. “Il-professuri kellhom mħatra...li konna nispiċċaw niżżewġu jekk niltaqgħu flimkien.”[21] Huma żżewġu fl-1955, sena wara li rċieva id-Dottorat mill-Università t’Oxford.[5] Kellhom tifel, David Steiner (li serva bħala Kummissarju tal-Istat ta’ New York mill-2009 sal-2011) u tifla, Deborah Steiner (Professura tal-Klassiċi fl-Università ta’ Columbia). Hu għex l-aħħar f’Cambridge, l-Ingilterra.[1] Steiner miet f’daru fit-3 ta’ Frar, 2020, ta’ 90 sena, u Zara Steiner mietet kawża tal-pulmonite għaxart ijiem warajh.

Premji u unuri

[immodifika | immodifika s-sors]

George Steiner irċieva diversi unuri, inkluż:

  • Rhodes Scholarship (1950)[3]
  • Guggenheim Fellowship (1970/1971)[10]
  • Chevalier de la Légion d'Honneur mill-Gvern Franċiż (1984)[20]
  • Il-Morton Dauwen Zabel Prize minn The American Academy of Arts and Letters (1989)
  • Il-King Albert Medal mill-Belgian Academy Council of Applied Sciences[20]
  • Fellow Onorarju ta’ Balliol College, Oxford (1995)[22]
  • It-Truman Capote Lifetime Achievement Award mingħand l-Università ta’ Stanford (1998)[16]
  • Il-Prince of Asturias Award għall-Kommunikazzjoni u l-Umanitajiet (2001)[23]
  • Fellowship tal-British Academy (1998)[2]
  • Fellow Onorarju tar-Royal Academy of Arts[22]
  • Gradi tad-Dottorat Onorarju tal-Letteratura mingħand:
    • L-Università t’East Anglia (1976)
    • L-Università ta’ Leuven (1980)
    • Mount Holyoke College (1983)
    • L-Università ta’ Bristol (1989)
    • L-Università ta’ Glasgow (1990)
    • L-Università ta’ Liège (1990)
    • L-Università t’Ulster (1993)
    • L-Università ta’ Durham (1995)
    • L-Università ta’ Salamanca (2002)
    • Queen Mary University ta' Londra (2006)
    • Alma Mater Studiorum – Università di Bologna (2006)
    • Honoris Causa —Faculty of Letters — L-Università ta’ Liżbona (2009)

Rebaħ ukoll numru ta’ premji għal-letteratura fittizja u l-poeżija, li jinkludu:

  • Remembrance Award (1974) għal Language and Silence: Essays 1958–1966.
  • PEN/Macmillam Silver Pen Award (1992) għal Proofs and Three Parables.[2]
  • PEN/Macmillan Prize (1993) għal Proofs and Three Parables.[2]
  • JQ Wingate Prize for Non-Fiction (ko-rebbieħ ma Louise Kehoe u Silvia Rodgers) (1997) għal No Passion Spent.

Referenzi

[immodifika | immodifika s-sors]
  1. ^ a b ċ d "The Papers of George Steiner". Archivesearch. Miġbur October 6, 2021. [Steiner] has not used the name Francis since his undergraduate days.
  2. ^ a b ċ d e f ġ Hahn, Daniel. "George Steiner". Contemporary Writers in the UK. Arkivjat minn l-oriġinal fl-October 1, 2007. Miġbur March 26, 2008.
  3. ^ a b ċ d Lehmann-Haupt, Christopher; Grimes, William (February 3, 2020). "George Steiner, Prodigious Literary Critic, Dies at 90". The New York Times. Miġbur February 4, 2020.
  4. ^ Cheyette, Bryan. "Between Repulsion and Attraction: George Steiner's Post-Holocaust Fiction". Jewish Social Studies. Arkivjat minn l-oriġinal fl-February 18, 2020. Miġbur March 26, 2008.
  5. ^ a b ċ d e f ġ g għ h ħ i ie j k l m n o p q r Jaggi, Maya (March 17, 2001). "George and his dragons". The Guardian. London. Miġbur March 27, 2008.
  6. ^ a b Steiner, George. "Büchner lives on". The Times Literary Supplement, December 13, 2006. London. Arkivjat minn l-oriġinal fl-December 16, 2019. Miġbur March 27, 2008.
  7. ^ Baker, Kenneth (April 12, 1998). "Steiner's Memoir a Sketchy Mix of Reminiscence and Complaint". San Francisco Chronicle. Miġbur July 26, 2012.
  8. ^ "Errata: An Examined Life". University of Chicago Magazine. Miġbur March 27, 2008.
  9. ^ a b Żball fl-użu tar-referenzi: Użu invalidu ta' <ref>; l-ebda test ma ġie provdut għar-referenza bl-isem ODNB.
  10. ^ a b Homberger, Eric (February 5, 2020). "George Steiner obituary". The Guardian. Miġbur February 6, 2020.
  11. ^ "The Weidenfeld Chair in Comparative European Literature". St Anne's College, Oxford. Arkivjat minn l-oriġinal fl-December 30, 2013. Miġbur December 28, 2013.
  12. ^ "George Steiner named Norton Professor". The Harvard Gazette. March 15, 2001. Miġbur February 6, 2020.
  13. ^ a b "Grammars of Creation" (PDF). National Adult Literacy Database. Arkivjat minn l-oriġinal (PDF) fl-April 13, 2007. Miġbur March 26, 2008.
  14. ^ a b Simpson, Aislinn; Salter, Jessica (August 11, 2008). "Cambridge academic says he would not tolerate Jamaican neighbours". The Daily Telegraph. London.
  15. ^ Johns, Lindsay (September 3, 2008). "Out of touch, but not a racist". The Guardian. London.
  16. ^ a b "Literary Critic George Steiner wins Truman Capote Award". Stanford Online Report. Arkivjat minn l-oriġinal fl-August 22, 2007. Miġbur March 26, 2008.
  17. ^ Steiner, George (2013). After Babel: Aspects of Language and Translation. Open Road Media. ISBN 978-1-4804-1185-2. OCLC 892798474.
  18. ^ Maia, Rita Bueno; Pinto, Marta Pacheco; Pinto, Sara Ramos (April 1, 2015). How Peripheral is the Periphery? Translating Portugal Back and Forth: Essays in Honour of João Ferreira Duarte. Cambridge Scholars Publishing. pp. 244–245. ISBN 978-1-4438-8304-7.
  19. ^ Rosenbaum, Ron (March 17, 2002). "Mirroring Evil? No, Mirroring Art Theory". The New York Observer. Miġbur February 28, 2008.
  20. ^ a b ċ "The Gifford Lectures: George Steiner". www.giffordlectures.org. August 18, 2014. Miġbur February 4, 2020.
  21. ^ Cowley, Jason (September 22, 1997). "A traveller in the realm of the mind". The Times. Arkivjat minn l-oriġinal fl-August 11, 2007. Miġbur March 27, 2008.
  22. ^ a b "Professor George Steiner, 23 April 1929 – 3 February 2020". Churchill College Cambridge. February 4, 2020. Arkivjat minn l-oriġinal fl-4 February 2020. Miġbur February 6, 2020.
  23. ^ "George Steiner". Prince of Asturias Awards. Arkivjat minn l-oriġinal fl-October 11, 2007. Miġbur April 8, 2008.

Sorsi

[immodifika | immodifika s-sors]
  • Averil Condren, Papers of George Steiner, Churchill Archives Centre, 2001
  • The Harvard Gazette (27.09.2001)
[immodifika | immodifika s-sors]
Miksub minn "https://mt.wikipedia.org/w/index.php?title=George_Steiner&oldid=322694"