BirdLife Malta
BirdLife Malta huwa l-akbar moviment ambjentali f'Malta. L-għan iddikjarat tal-organizzazzjoni huwa li tikseb "il-protezzjoni tal-għasafar selvaġġi, l-ambjent naturali u l-bijodiversità".[1]
BirdLife Malta hija wkoll l-ewwel NGO ambjentali rreġistrata ta' Malta. Din twaqqfet f'Jannar tal-1962, u dak iż-żmien kienet magħrufa bħala MOS (Malta Ornithological Society). Beda aktar bħala grupp ta' studju, iżda malajr raw li l-għasafar selvaġġi kellhom bżonn kbir ta' protezzjoni. Illum Birdlife Malta taħdem biex tipproteġi l-popolazzjonijiet tal-għasafar f'Malta.
Malta hija stat gżira żgħir fil-Mediterran b'popolazzjoni densa ħafna, mingħajr l-ebda żoni tassew selvaġġi. L-akbar theddid għall-għasafar f'Malta huma l-qerda tal-ambjent naturali (eż. toroq ġodda, żvilupp ta' bini, lukandi, korsijiet tal-golf), tfixkil u persekuzzjoni diretta (kaċċa u nsib ). Malta ġiet deskritta f'The New Yorker bħala "l-aktar post ostili għall-għasafar selvaġġi fl-Ewropa".[2]
BirdLife Malta tuża diversi metodi biex tipproteġi l-għasafar. L-aktar metodi prominenti tagħha huma l-edukazzjoni, speċjalment permezz ta’ kampanji fl-iskejjel, pubblikazzjonijiet, il-midja u sezzjoni attiva ta’ membri żgħar; il-ġestjoni ta’ żewġ riżervi naturali ta’ artijiet mistagħdra, jiġifieri l-Għadira u Is-Simar; lobbying mal-awtoritajiet għal leġiżlazzjoni aħjar dwar il-protezzjoni tal-għasafar; assistenza lill-pulizija fl-infurzar aħjar tal-liġi; ir-rkupru u t-titjib tal-ambjent naturali degradat; u riċerka dwar l-għasafar u l-ħabitat tagħhom biex jiġu identifikati aktar żoni għall-protezzjoni.
BirdLife Malta toħroġ diversi newsletters u rivisti għall-membri tagħha, u tippubblika kotba dwar l-istorja naturali, bħal per ezempju Nature in Gozo (2007).[3]
BirdLife Malta hija organizzazzjoni kompletament volontarja u tiddependi fuq sottoskrizzjoni u donazzjonijiet. In-numru ta' membri msieħba huwa ta' madwar 3,000.
BirdLife Malta hija msieħba f'BirdLife International, netwerk globali ta’ organizzazzjonijiet ambjentali f’100 pajjiż u territorju.
Referenzi
[immodifika | immodifika s-sors]- ↑ "BirdLife Malta: About Us". BirdLife Malta. Arkivjat minn l-oriġinal fl-9 April 2009. Miġbur 1 April 2009.
- ↑ Jonathan Franzen, “Emptying the Skies,” The New Yorker, July 26, 2010, p. 48
- ↑ "BirdLife Launches Seminal Publication on Gozo's Wildlife". The Malta Independent. 15 Ottubru 2007.
