Park Ji-Sung

Minn Wikipedija, l-enċiklopedija l-ħielsa

Aqbeż lejn: navigazzjoni, fittex
Park Ji-Sung
Informazzjoni personali
Isem sħiħ Park Ji-Sung
Twelid 25 ta' Frar 1981 (1981-02-25) (età 28)
Seoul
Pajjiż  Korea t'Isfel
Tul 1.75 m
Rwol Midfilder
Informazzjoni fuq il-klabb
Klabb kurrenti Manchester United
Numru 13
Klabbs ġovanili
1997–2000 Myongji University
Klabbs professjonali
Snin Klabb Preż (Gwl)*
2000–2003
2003–2005
2005–		 Kyoto Purple Sanga
PSV
Manchester United		 76 (11)
64 (13)
85 0(9)   
Tim nazzjonali
2001– Korea t'Isfel 81 0(11)

Aġġornament: 12:15, 25 Ġunju 2009 (UTC)
* Preżenzi (Gowls)

Park Ji-Sung (bil-Korean: 박지성; Seoul, 25 ta' Frar 1981) hu plejer tal-futbol mill-Korea t'Isfel li jilgħab mal-klabb tal-futbol Ingliż Manchester United, kif ukoll mat-tim nazzjonali tal-Korea t'Isfel. Hu hu l-ewwel plejer Ażjatiku li skorja fl-istorja tal-UEFA Champions League, u sar ukoll l-ewwel plejer Ażjatiku li rebaħha fil-21 ta' Mejju 2008, ma' Manchester United. Hu kien ukoll parti mit-tim nazzjonali Korean li wasal sas-semifinali tat-Tazza tad-Dinja 2002, fejn skorja darba kontra l-Portugall.

Werrej

[editja] Bidu tal-karriera

Park twieled fl-akkwati ta' Geheung. Meta kien għadu fl-iskola sekondarja, Park ma ġiex aċċettat minn diversi klabbs professjonali minħabba l-istatura tiegħu. Park spiċċa jilgħab ma' Myongji University. Matul il-karriera fil-kulleġġ, Kyoto Purple Sanga tal-Ġappun offrewlu kuntratt u hu aċċetta.

[editja] Karriera professjonali

[editja] Kyoto Purple Sanga

Park iffirma mal-klabb Ġappuniż li kienu għadhom kemm ġew relegati għall-J2. Fl-2001 il-klabb rebaħ il-promozzjoni għall-ewwel diviżjons, u fis-sena ta' wara, Park mexxa lit-tim fil-finali tat-Tazza tal-Imperatur, fejn skorja l-gowl tal-pari permezz ta' daqqa ta' ras u assista lil Kurobe għall-gowl tar-rebħa tal-finali.[1]. It-tim irnexxielu jirbaħ 2-1 biex saru ċ-ċampjins tat-Tazza tal-Imperatur għall-ewwel darba fl-istorja ta' Sanga. Hu ħall lil Sanga wara t-Tazza tad-Dinja.

[editja] PSV Eindhoven

Wara t-Tazza tad-Dinja, Guus Hiddink ġie inkarigat bħala l-kowċ il-ġdid tat-tim Olandiż ta' PSV Eindhoven. Fl-2003, Park u sieħbu Sud-Korean Lee Young-Pyo ittrasferixxew lejn PSV Eindhoven, fejn reġgħu ġew taħt id il-kowċ preċedenti tas-selezzjoni nazzjonali. Waqt li Lee mal-ewwel integra mat-tim titolari, Park bata daqxejn minħabba li kien imweġġa konsekuttivament.[2]

Madanakollu, lejn tmiem l-istaġun 2003–04, Park beda jadatta ruħu għall-ambjent ġewwa l-Olanda. Fl-istaġun 2004–05, it-tluq ta' Arjen Robben lejn Chelsea ta lil Park aktar opportunitajiet li jibda mal-ewwel ħdax u mal-ewwel wera x'kien jiswa. Flimkien ma' Johann Vogel, l-Olandiżi Mark van Bommel, Philip Cocu u DaMarcus Beasley, Park ifforma s-sinsla ta' nofs il-grawnd ta' PSV Eindhoven grazzi għall-veloċità tiegħu u l-abilità fil-passaġġi. Hekk kif irnexxielu jkun parti fundamentali wara l-gowls skurjati f'dak l-istaġun minn PSV, l-aktar mument importanti fil-karriera ta' Park ma' dan it-tim Olandiż kien meta skorja l-ewwel gowl kontra t-tim Taljan ta' AC Milan fis-semifinali taċ-Champions League. PSV minkejja li rebħu l-leg ġewwa darhom bl-iskor ta' 3–1, it-telfa barra minn darhom bl-iskor ta' 2–0 wasslet lill-Milan fil-finali taċ-Champions League.[3]

[editja] Manchester United

Fix-xhur tat-tmien tal-istaġun 2004–05, Park għażel li jingħaqad ma' Sir Alex Ferguson ta' Manchester United, li kien impressjonat bl-istil ta' logħob ta' Park. Park iffirma għat-tim tal-Premiership Ingliż għal £5 miljun, suġġett għat-test mediku u l-permess tax-xogħol.

Park sar l-ewwel plejer Ażjatiku li kien kaptan ta' Manchester United meta Ryan Giggs għadda l-faxxa lil Park hekk kif sostitwit fil-partita ġewwa darhom kontra Lille OSC. L-ewel gowl tiegħu għal Manchester United wasal fl-20 ta' Diċembru 2005, matul ir-rebħa bl-iskor ta' 3–1 fuq Birmingham City fil-kwarti tal-finali tal-League Cup. L-ewwel gowl fil-Premier League wasal kontra Arsenal, fir-rebħa li t-tim ta' United għamel kontra l-Gunners bl-iskor ta' 2–0 nhar id-9 ta' April.[4]

F'April 2007, Park intbagħat l-Amerika għal kirurġija minħabba uġigħ kontinwu f'irkopptu, fejn b'hekk temmlu l-istaġun. Minkejja li kien barra għal ħafna mill-istaġun, hu xorta lagħab biżżejjed partiti biex isir l-ewwel plejer Korean li rebaħ il-Premier League.

Fl-1 ta' Marzu 2008, Park skorja l-ewwel gowl fil-Premiership tal-istaġun 2007–08 kontra Fulham, wara li kien għadu kif irritorna minn diversi xhur barra mil-logħob. In-nuqqas ta' ħin ta' logħob ikkawżat kontroversja kbira fil-Korea,[5] imma rnexxielu jisraq l-applawżi permezz ta' prestazzjoni eċċellenti ikkaratterizzata minn assist għal Wayne Rooney fil-partita tal-kwarti tal-finali taċ-Champions League kontra AS Roma. Bil-progress ta' United għas-semifinali taċ-Champions League, Park sar l-ewwel plejer Ażjatiku li ħa sahem fis-semifinali taċ-Champions League tliet darbiet differenti. Fid-29 ta' April 2008, Manchester United avvanzaw għall-finali taċ-Champions League wara li għelbu lil Barcelona, fejn Park ġie ivvutat bħala l-Plejer tal-Partita. Fil-21 ta' Mejju, kienet sorpriża għal ħafna li Park ġie eskluż kompletament mill-iskwadra li kienet se taffaċċja lil Chelsea fil-finali tal-UEFA Champions League 2008. Kienu ħafnu li ħasbu li l-prestazzjonijiet ta' Park kontra Roma u Barcelona kienu tawh post garantit mal-ewwel ħdax fil-finali. B'din l-esklużjoni, Park naqas li jsir l-ewwel plejer mill-Asja li lagħab fil-finali taċ-Champions League. Wara, il-kowċ ta' Manchester United stqarr li d-deċiżjoni li jħalli lill-ġwejnħa Sud-Koreana barra mill-iskwadra ta' tmintax-il plejer għall-finali, kienet waħda mill-itqal deċiżjonijiet li hu qatt ħa matul il-karriera bħala kowċ.

Kmieni fl-istaġun 2008–09 tal-Premier League, fil-partita barra minn darhom kontra Chelsea, Park skorja l-uniku gowl għal United fil-pari finali ta' 1–1 nhar il-21 ta' Settembru 2008, f'partita fejn kiseb l-unur tal-Plejer tal-Partita.[6] Il-100 apparenza għal Manchester United waslet fit-13 ta' Diċembru 2008 meta beda l-partita f'White Hart Lane kontra Tottenham Hotspur.[7]

[editja] Internazzjonali

Park beda l-karriera internazzjonali bħala ċentrali difensiv ta' dsatax-il sena. Park għamel l-ewwel apparenza fil-fażi ta' kwalifikazzjoni reġjonali għall-Olimpjadi ta' Sydney tas-sena 2000. Taħt Huh Jung-Moo, il-kowċ tal-Korea t'Isfel, hu ma rnexxielhux juri l-potenzjal bħala plejer regulari tal-futur għat-tim nazzjonali Sud-Korean. Madanakollu, taħt il-kowċ il-ġdid Guus Hiddink, il-pożizzjoni ta' Park ġiet mibdula għal dik ta' ġwejnħa. Minn dakinhar 'il quddiem, Park sar plejer versatili kapaċi li jilgħab f'diversi pożizzjonijiet ċentrali.

Park skorja gowl memorabbli matul it-Tazza tad-Dinja 2002. Matul il-fażi tal-gruppi, il-Korea t'Isfel rebħu l-ewwel logħba kontra l-Polonja u kisbu pari kontra l-Istati Uniti. Biex jikkwalifikaw riedu jiksbu tal-anqas pari kontra l-favorita Portugall. Il-partita kienet tinsab 0–0 sas-70 minuta wara żewġ karti ħomor kontra l-Portugall, meta Park skorja l-gowl rebbieħ, hekk kif ikkontrolla l-ballun b'sidru u wara li għeleb lil Sérgio Conceição, xuttja b'saqajh ix-xellugija dak il-gowl li ta lill-Ażjatiċi t-tliet punti. Dan il-gowl wassal ukoll għall-eliminazzjoni tal-Portugall u l-avvanz għall-ewwel darba fl-istorja tal-futbol tal-Korea t'Isfel fil-fażi eliminatorja tat-turnew.[8]

Is-suċċess fit-Tazza tad-Dinja kompla fl-edizzjoni tal-2006. Hu skorja l-gowl tal-pari fit-tieni logħba ta' Grupp Ġ kontra l-finalisti eventwali tal-kompetizzjoni, Franza, u kien ivvutat bħala l-Plejer tal-Partita. Fiż-żewġ edizzjonijiet, hu lagħab f'kull logħba tal-Korea t'Isfel.

Nhar il-11 ta' Ottubru 2008, hu kien kaptan għall-ewwel darba tal-Korea t'Isfel f'logħba ta' ħbiberija kontra l-Użbekistan. Il-partita spiċċat 3–0 f'favur il-Korea.

[editja] Unuri

[editja] Klabb

Kyoto Purple Sanga

PSV Eindhoven

Manchester United

[editja] Individwali

[editja] Referenzi

  1. ↑ Park interview (Korean), Joins.com, 09-05-2008 (Aċċessata nhar il-09-05-2008).
  2. ↑ Park, 2006, pġ. 213; "Inqast li jkolli kundizzjoni tajba wara s-6 ġimgħat ta' uġigħ li kont qed insofri, ħassejt li sħabi bdew ma jafdawx fija iktar."
  3. ↑ PSV 3-1 AC Milan (agg: 3-3) (Ingliż). Aċċessata nhar il-17-11-2008.
  4. ↑ Man Utd v Arsenal (Ingliż). Aċċessata nhar il-18-11-2008.
  5. ↑ Park not on the list against Bolton (Korean), Sports Seoul, 20-03-2008 (Aċċessata nhar il-18-11-2008).
  6. ↑ Chelsea 1-1 Man Utd (Ingliż). BBC Sport (21-09-2008). Aċċessata nhar il-18-11-2008.
  7. ↑ Tottenham 0-0 Man Utd (Ingliż), BBC Sport, 13-12-2008.
  8. ↑ Portugal 0-1 South Korea (Ingliż). Aċċessata nhar il-22-12-2008.

[editja] Ħoloq esterni

Wikimedia Commons għandha fajls multimedjali relatati ma':
Fil-Wikikwota hemm kollezzjoni ta' kwotazzjonijiet relatati ma':
a • d • m
Manchester United FC – skwadra kurrenti

1 Van der Sar · 2 Neville (k) · 3 Evra · 4 Hargreaves · 5 Ferdinand · 6 Brown · 7 Owen · 8 Anderson · 9 Berbatov · 10 Rooney · 11 Giggs · 12 Foster · 13 Park · 14 Tošić · 15 Vidić · 16 Carrick · 17 Nani · 18 Scholes · 19 Welbeck · 20 Fábio · 21 Rafael · 22 O'Shea · 23 J. Evans · 24 Fletcher · 25 Simpson · 26 Manucho · 28 Gibson · 29 Kuszczak · 33 Hewson · 35 Cleverley · 36 Gray · 37 Cathcart · 38 Zieler · 39 Chester · 40 Amos · 41 Macheda · 43 Petrucci · 44 De Laet · 45 C. Evans · 46 Drinkwater · 47 James · — Brandy · — Heaton · — Valencia · Kowċ: Ferguson
Miġjub minn "http://mt.wikipedia.org/wiki/Park_Ji-Sung"
Għodda personali