Ninu Cremona

Ninu Cremona (Rabat, 27 ta' Mejju 1880 – 4 ta' Jannar 1972) kien lingwista magħruf Malti u awtur.

Tfulija

Ninu Cremona, magħruf bħala Is-Sur Nin, twieled nhar is-27 ta' Mejju 1880 bin Feliċ u Margaret Pace imwielda fir-Rabat, Għawdex. Missieru miet meta Ninu kellu tliet snin u sentejn wara mar jgħix ma' zijuh f'Tuneż u ħa l-edukazzjoni tiegħu fi iskola tal-Christian Brothers u wara f'St Charles College. Meta kellu 8 snin ġie lura Malta u mar is-Seminarju ta' Għawdex u tal-Furjana, fejn hemmhekk sar jaf lil Dun Karm.

Skrivan, Spettur tas-Sanità u Għalliem

Fl-1900, Cremona daħal skrivan mal-Gvern u fl-1904 sar Spettur tas-Sanità wara kors fl-Ashton School of Hygene fl-Università ta' Liverpool. Fl-1928 sar l-editur responsabbli mit-traduzzjonijiet u l-pubblikazzjonijiet kollha tal-Gvern. Cremona kien jgħallem il-Malti fil-klassijiet ta' filgħaxija u fl-1936 kien l-ewwel għalliem tal-Malti fil-Liċeo. Kien ukoll eżaminatur tal-Malti fl-Università.

Il-Ħidma tiegħu b'riżq l-Ilsien Malti

Cremona kien wieħed mill-Fundaturi tal-Għaqda tal-Kittieba tal-Malti, illum l-Akkademja tal-Malti. Kien Viċi-President tagħha u wieħed mill-edituri ta' Il-Malti, ir-rivista tal-Għaqda. L-ikbar sehem tiegħu b'riżq il-Malti kien fit-tfassil tal-ortografija Maltija – li fiha għenu Ġanni Vassallo, bil-ktieb Tagħrif fuq il-Kitba Maltija li ħarġu fl-1924.

Kotba

Dramm

• Il-Fidwa tal-Bdiewa, dramm mibni fuq l-istruttura klassika tal-Griegi.

Poeżiji

• Weraq mar-Riħ (1932)
• Rand u Rihan (1945)
• Mis-Siġra ta' Ħajti (1970)

Novelli

• Ktajjen Maqtugħa (1968)

Lingwistika

• X'inhu l-Malti Safi (1925)
• A Manual of Maltese Orthography and Grammar (1929)
• Tagħlim fuq il-Kitba Maltija (1935, 1938)
• A Historical Review of the Maltese Language (1945)

Riċerka

• Mikiel Anton Vassalli u Żminijietu (1937), bijografija li ġiet tradotta minn May Butcher, Vassalli and his times fl-1940.
• L'Antica Fondazione della Scuola di Lingua Araba in Malta (1955)
• La Marina Maltese dal Medio Evo all'Epoca Moderna (1964)

Folklor

• Maltese Funeral Customs (1922)
• Race, Language, and Myth (1922)
• Mourning and Funeral Customs in Malta (1923)
• Some Myths and Beliefs in Maltese Folklore (1923)
• Weather and Husbandry Lore in the Isles of Malta (1925)
• Is the Maid of Mosta a Myth? (1934)
• Folklore u Lsien Malti (1944).

Fl-1970, Cremona ippubblika ħafna mix-xogħlijiet tiegħu ta' proża f' Antoloġija ta' Proża Maltija.

Titli u Unuri

• Il-Midalja tad-Deheb Ġużè Muscat Azzopardi (1946)
• Dottorat Honoris Causa fil-Letteratura għall-ħidma kbira tiegħu fil-qasam letterarju, grammatikali u xjentifiku tal-Ilsien Malti, mill-Università Rjali ta' Malta (1960)