Michael Mifsud

Minn Wikipedija, l-enċiklopedija l-ħielsa
Aqbeż lejn: navigazzjoni, fittex
Michael Mifsud
Mifsud, Michael.jpg
Informazzjoni personali
Isem sħiħ Michael Mifsud
Twelid 17 ta' April 1981 (1981-04-17) (31 sena)
Pietà
Nazzjonalità Bandiera ta' Malta Malta
Tul 1.65 m
Rwol Attakkant
Informazzjoni fuq il-klabb
Klabb kurrenti Valletta
Numru 9
Klabbs professjonali*
Snin Klabb Preż Gwls
1997–2001 Sliema Wanderers 80 (60)
2001–2003 Kaiserslautern 21 (2)
2003–2004 Sliema Wanderers 12 (8)
2004–2007 Lillestrøm 48 (17)
2007–2009 Coventry City 86 (16)
2009 → Barnsley (self) 15 (2)
2010 Valletta 7 (7)
2011 Qormi 5 (7)
2011– Valletta 2 (2)
Tim nazzjonali
2000– Malta 87 (30)
* Il-preżenzi u l-gowls fil-karriera professjonali huma validi biss għall-kampjonat domestiku.
Aġġornament: 16:09, 19 Settembru 2011 (UTC)

Michael Mifsud (Pietà, 17 ta' April 1981) huwa plejer tal-futbol Malti li jilgħab bħala attakkant ma' Valletta. Ikkunsidrat bħala wieħed mill-aqwa plejers prodotti minn Malta, Mifsud qatta' diversi snin jilgħab barra minn pajjiżu u rnexxielu jirbaħ l-unur tal-iSportiv Malti tas-Sena fl-2001 u l-2003.[1]

Werrej

[editja] Karriera

[editja] Bidu tal-karriera

Prodott ta' Sliema Wanderers, hu ddebutta mat-tim tal-kbar fl-istaġun 1997–98, meta lagħab tmien darbiet u skorja darba. Fl-istaġun segwenti hu beda bħala plejer regolari mal-ewwel tim fejn skorja tmien gowls fi 22 apparenza. Żewġ staġuni ta' suċċess segwew wara, b'21 gowl f'26 apparenza fl-istaġun 1999–00 u 30 gowl f'25 apparenza fl-istaġun ta' wara.

Minħabba l-forma tajba li kien fiha, Josip Ilić ta lil Michael Milfsud l-ewwel opportunità fit-tim nazzjonali u għamel l-ewwel dehra nhar l-10 ta' Frar 2000, kontra l-Albanija fil-Grawnd Nazzjonali ta' Ta' Qali. Kien f'dan l-istant li Kaiserslautern raw il-potenzjal ta' dan il-plejer u xtrawh fis-sajf tas-sena 2001.[1] Hu kien skorer regolari mat-tim B u għamel xi apparenzi bħala sostitut mal-ewwel tim fil-Bundesliga, fejn skorja 2 gowls.[1]

Ix-xewqa biex ikun impenjat aktar mal-ewwel tim ratu jirritorna Malta fl-2004, fejn Sliema Wanderers reġgħu akkwistaw is-servizzi ta' dan il-plejer u dan għenhom jiksbu l-kampjonat Malti. Fl-istess sajf hu kien miksub mit-tim Norveġiż ta' Lillestrøm fejn f'punt tal-istaġun hu ġie vvutat bħala l-aqwa plejer barrani tal-kampjonat. Hu kien l-aqwa skorer fl-istaġun tal-2006 fejn irnexxielu jiskorja 11-il gowl f'19-il apparenza.

Fil-5 ta' Novembru 2006, fl-aħħar ġurnata tal-kampjonat Norveġiż, hu ddikjara li jixtieq jittrasferixxi għal wieħed mill-aqwa kampjonati Ewropej. Fis-sajf tas-sena ta' qabel, Lillestrøm ma aċċettawx offera għal Mifsud mit-tim ta' Coventry City minkejja li kienu jafu li l-attakkant seta' jitlaq b'xejn f'Jannar 2007 hekk kif il-kuntratt kien sal-aħħar ta' Diċembru.

Hu ma aċċettax li jiffirma kuntratt ġdid ma' Lillestrøm u ttrassferixxa għal ma' Coventry City. Minbarra Coventry, timijiet mill-Premier League bħal Watford u Sheffield United, kif ukoll Leeds United, tim miċ-Championship, irrappurtaw interess fil-plejer.

[editja] Coventry City

Fl-10 ta' Jannar 2007, Mifsud iffirma kuntratt ta' sentejn u nofs mat-tim ta' Coventry City fil-Football League Championship fl-Ingilterra.[2]

L-ewwel gowl bil-flokk ikħal wasal kontra Plymouth Argyle,[3] waqt li t-tieni wieħed wasal fit-telfa ta' 4–1 kontra Barnsley bl-iskor ta' 4-1. In-numru ta' gowls kompla tiela', u l-gowl tiegħu kontra Sheffield United kien ġie ivvutat bħala l-gowl tal-istaġun ta' Coventry.

Fit-tielet rawnd tal-Carling Cup, fis-26 ta' Settembru 2007 hu skorja żewġ gowls biex ta lil Coventry rebħa b'sorpriża ta' 2–0 kontra ċ-ċampjins kurrenti tal-Premier League Manchester United.[4][5] Il-gazzetta Taljana La Gazzetta dello Sport laqmitu bħala Il Messi Di Malta wara l-partita.[6]

Wara dan is-suċċess, Mifsud kompla jimpresjona. Hu kien strumentali fil-pari ta' Coventry kontra Charlton Athletic fid-29 ta' Settembru, fejn skorja t-tielet gowl f'żewġ logħbiet. Fit-2 ta' Ottubru, Coventry assiguraw rebħa ta' 3–1 fil-kampjonat kontra Blackpool, fejn it-tieni gowl wasal minn Mifsud.

Fit-12 ta' Novembru, Mifsud ġie mkeċċi wara 11-il minuta fid-derbi ta' Midlands kontra West Bromwich Albion, wara li ta daqqa ta' minkeb f'wiċċ Carl Hoefkens. Wara, Mifsud apoloġizza għal dak li għamel.[7][8] Ir-ritorn tiegħu mat-tim wasal wara skwalifika ta' tliet logħbiet kontra West Brom, fejn kien ritorna mill-aqwa minħabba li skorja darbtejn biex tella' n-numru ta' gowls fl-istaġun għal 15.

Fil-5 ta' Jannar 2008, Mifsud skorja doppjetta fl-FA Cup kontra tim ieħor tal-Premier League, din id-darba Blackburn Rovers ġewwa Ewood Park, biex ikkonferma ruħu bħala wieħed mill-aqwa attakkanti tal-klabb u forsi wkoll bħala l-iktar pedina importanti.[9] Għal din il-prestazzjoni, hu kien ġie nominat għall-plejer tat-tielet rawnd u sussegwentament hu rċieva l-aktar voti f'dan l-unur. Fis-26 ta' Jannar, Mifsud skorja t-tieni gowl ta' Coventry fir-rebħa tar-raba' rawnd tal-FA Cup kontra Millwall.

Minkejja bidu ta' staġun mill-aqwa, it-tieni nofs tal-istaġun kien wieħed deludenti għal Mifsud hekk kif naqas li jżomm mal-forma li kellu mal-ewwel nofs tal-istaġun. Hu skorja gowl f'Jannar 2008 u ma reġax sab ix-xibka sal-aħħar logħba tal-istaġun. Fl-4 ta' Mejju 2008, Mifsud skorja l-unika gowl ta' Coventry fit-telfa barra minn darhom kontra Charlton Athletic, fejn it-tim evita r-relegazzjoni b'punt wieħed biss dak l-istaġun.

Fit-23 ta' Lulju 2008, Coventry City aċċettaw somma ta' Bristol City għas-servizzi tal-plejer Malti.[10] Fid-29 ta' Lulju, Bristol City ħabbru li wara n-negozjati li kienu saru, huma ma kinux se jkomplu bit-trasferiment ta' Mifsud wara intopp fil-ftehim bejn Mifsud u l-klabb il-ġdid.[11] Mifsud ma kellux bidu tal-istaġun feliċi minħabba li ma kienx fil-pjanijiet tal-kowċ Chris Coleman, però bil-mod il-mod reġa' ggwadanja postu mal-ewwel ħdax. Wara nixfa ta' gowls minn nofs Ottubru, Michael Mifsud sab ix-xibka għall-ewwel darba meta skorja l-gowl tar-rebħa kontra Blackpool.

[editja] Barnsley

Minkejja interess minn diversi klabbs għall-firma tal-plejer Malti,[12] Mifsud ġie msellef sal-aħħar tal-istaġun lit-tim ta' Barnsley, fejn b'hekk ingħaqad ma' sieħbu fit-tim nazzjonali Malti Daniel Bogdanovic.[13] Id-debutt tiegħu wasal kontra Sheffield Wednesday fejn ifforma għall-ewwel darba koppja tal-attakk mal-konnazzjonali Malti Bogdanovic, partita li Barnsley rebħu bl-iskor ta' 1–0. L-ewwel gowl tiegħu wasal fl-10 ta' Marzu 2009, fil-pari ta' 1–1 kontra Birmingham City.[14]

[editja] Valletta

Wara li ġie msellef ma' Barnsley għall-aħħar parti tal-istaġun 2008–09, fit-30 ta' Ġunju 2009 il-kuntratt ta' Mifsud ma' Coventry skada u sussegwentament ġie rilaxxat wara li ma baqax aktar fil-pjanijiet għall-futur tal-kowċ Chris Coleman.[15] Sheffield United u Leeds United urew interess fil-plejer, waqt li baqgħet miftuħa l-għażla li jerġa' jirritorna Malta, bil-tim ta' Valletta jkun it-tim interessat.[16][17] Però, Mifsud ċaħad ix-xniegħat li kienu qed jiċċirkolaw fuq il-possibilità li jerġa' lura għall-futbol Malti.[18] L-għajdut kompla sejjer lejn tmiem l-2009 u matul is-suq tat-trasferimenti ta' Jannar 2010, b'Notts County tal-eks-kowċ tat-tim nazzjonali Ingliż Sven Goran Erikkson u t-tim mill-Premier League Portsmouth juru interess fil-plejer, minkejja li ma seħħ xejn konkret.[19][20]

Minkejja interess qawwi fil-plejer, Mifsud għażel li jirritorna lura lejn pajjiżu u ngħaqad mal-klabb ta' Valletta sa tmiem tal-istaġun.[21] Hu iffirma kuntratt għal tliet xhur mal-klabb Belti.[22] Mal-klabb Belti, Mifsud irnexxielu jiskorja 7 gowls fil-kampjonat f'7 logħbiet. Mifsud ħalla l-marka tiegħu fit-tazez nazzjonali meta skorja gowl fil-finali tal-FA Trophy kontra Qormi, mirbuħa bl-iskor ta' 2–0,[23] waqt li skorja tripletta fil-finali tat-Tazza tal-100 Anniversarju tal-Kampjonat Nazzjonali kontra Floriana, bil-partita tintemm 3–1.[24] Fl-aħħar tal-istaġun ġie ikkonfermat li Mifsud kien mistenni li jkompli l-karriera tiegħu barra minn Malta.[25]

[editja] Qormi

Wara diversi xhur ta' inattività u xniegħat fuq il-futur tiegħu, lejn l-aħħar ta' Jannar 2010 ħarġet l-aħbar li kienu qed isiru trattativi bejn Mifsud u t-tim ta' Floriana.[26] Madanakollu, il-president tal-klabb Furjaniż Johann Said esprima t-tħassib tiegħu fuq il-piż finanzjarju li jkopri din it-trattativa ta' Mifsud. Wara li naqas li jintloħoq kompromess bejn il-kumitat Furjaniż u Said, dan tal-aħħar irriżenja,[27] riżenja li aktar tard ġie irtirata.[28] Nhar l-4 ta' Frar, 2011, Mifsud iffirma kuntratt sal-aħħar tal-istaġun 2010–11 ma' Qormi.[29] Iddebutta ma' Qormi fir-rebħa ta' 4–1 fuq Birkirkara tal-5 ta' Frar, 2011, fejn issiġilla din ir-rebħa bi tliet gowls.[30]

[editja] Ritorn ma' Valletta

Fi tmiem il-kuntratt tiegħu ma' Qormi, kien hemm interess mill-klabb ta' Birkirkara, xniegħat li ġew miċħuda mill-istess plejer.[31] Fil-5 ta' Lulju, 2011, ġie uffiċjalment imħabbar li Michael Mifsud issieħeb għat-tieni darba mat-tim ta' Valletta fejn iffirma kuntratt ta' erba' snin b'opzjoni għal sena oħra.[32] It-tieni debutt mat-tim Belti wasal fit-12 ta' Lulju 2011, fit-telfa ta' 3–2 kontra Ekranas tal-Litwanja valida mit-tieni rawnd ta' kwalifikazzjoni għall-UEFA Champions League, fejn skorja gowl lejn tmiem l-ewwel taqsima. Nhar is-16 ta' Awwissu, skorja doppjetta fil-finali tas-Super Cup kontra Floriana fir-rebħa ta' 3–0 ta' Valletta.[33]

[editja] Internazzjonali

Mifsud ngħata l-ewwel sejħa għal mat-tim nazzjonali Malti u ddebutta kontra l-Albanija nhar l-10 ta' Frar tas-sena 2000. Hu hu pedina importanti tat-tim nazzjonali Malti u diġà qabeż il-50 apparenza mat-tim.

Michael Mifsud kien strumentali fir-rebħa ta' Malta kontra l-Ungerija — l-ewwel rebħa kompetittiva ġewwa darhom mill-1982 — meta għamel xogħol tajjeb u minn din l-azzjoni Andre Schembri issiġilla r-rebħa ta' 2–1. Fil-partita kontra t-Turkija fl-istess fażi ta' kwalifikazzjoni għall-Kampjonati Ewropej 2008, ta l-passaġġ lil Andre Schembri meta dan tal-aħħar skorja t-tieni gowl tal-Maltin kontra t-Torok biex ġab ir-riżultat temporanju ta' 2–1. Il-partita spiċċat pari ta' 2–2. Michael Mifsud kellu ċans jikseb il-gowl tar-rebħa, imma x-xutt tiegħu spiċċa barra.

Il-Malti fil-fażi preliminarja tal-Kampjonati Ewropej skorja total ta' tliet gowls u kompla sejjer bil-gowls hekk kif fis-26 ta' Marzu 2008, Michael Mifsud skorja għal ħames darbiet f'logħba ta' ħbiberija li Malta lagħbet kontra l-Liechtenstein u li spiċċat 7–1 favur il-Maltin - l-ikbar rebħa li Malta qatt għamlet.[34] Wara dan ir-riżultat, hu sar l-ewwel plejer Malti li skorja aktar minn tliet gowls f'partita waħda għat-tim nazzjonali. Wara assenza mill-gowls għal għaxar partiti mat-tim nazzjonali, minn mindu skorja gowl f'logħba ta' ħbiberija kontra l-Awstrija, Mifsud reġa' sab ix-xibka din id-darba b'doppjetta f'logħba ta' ħbiberija oħra kontra l-Ġeorġja (li spiċċat f'rebħa għall-Maltin bl-iskor ta' 2–0).[35] B'permezz ta' gowl fit-telfa ta' 4–1 kontra l-Bulgarija fit-18 ta' Novembru, 2009, Mifsud ugwalja r-rekord ta' gowls mat-tim nazzjonali li kien f'idejn Carmel Busuttil bi 23 gowl.[36] Fil-logħba ta' ħbiberija li jmiss, dik kontra l-Finlandja tat-3 ta' Marzu 2010, Mifsud skorja l-gowl tal-ftuħ tal-konfront (barra li falla penalty wkoll qabel il-gowl) biex b'hekk kiser ir-rekord tal-aqwa skorer fl-istorja mat-tim nazzjonali Maltija.[37]

[editja] Unuri

[editja] Klabb

Malta Sliema Wanderers

Malta Valletta

[editja] Individwali

  • Unur Speċjali fil-Malta Football Awards 2006–07[38]
  • Unur Speċjali fil-Malta Football Awards 2009–10[39]

[editja] Referenzi

  1. ^ a b c (Ingliż) Michael Mifsud is MaltaToday’s Sportsman of the Year. Malta Today, 30-12-2001. Aċċess tal-URL: 27-01-2008.
  2. ^ (Ingliż) Sky Blues snap up Malta striker. BBC, 10-01-2007. Aċċess tal-URL: 27-01-2008.
  3. ^ (Ingliż) Plymouth 3-2 Coventry. BBC, 22-01-2007. Aċċess tal-URL: 27-01-2008.
  4. ^ Jon Culley. (Ingliż) Manchester United 0 Coventry City 2: Ferguson 'flabbergasted' as gamble on youth backfires. Belfast Telegraph, 27-09-2007. Aċċess tal-URL: 13-09-2008.
  5. ^ (Ingliż) Dowie full of praise for Mifsud. BBC, 28-09-2007. Aċċess tal-URL: 27-01-2008.
  6. ^ Alessandro Ruta. (Taljan) Mifsud, "Il Messi Di Malta" Che Ha Steso Il Manchester. Aċċess tal-URL: 07-10-2007.
  7. ^ (Ingliż) Dowie has no sympathy for Mifsud. BBC, 12-11-2007. Aċċess tal-URL: 27-01-2008.
  8. ^ (Ingliż) Mifsud apologises after red card. BBC, 13-11-2007. Aċċess tal-URL: 27-01-2008.
  9. ^ (Ingliż) Blackburn 1-4 Coventry. BBC, 05-01-2008
  10. ^ Muscat Chris. Michael Mifsud ma' Bristol City. MaltaRightNow.com, 23-07-2008. Aċċess tal-URL: 13-09-2008.
  11. ^ Intopp fit-trasferiment ta’ Michael Mifsud. L-Orizzont, 26-07-2008. Aċċess tal-URL: 13-09-2008.
  12. ^ Derby C. u Wolves interessati li jiffirmaw lil Michael Mifsud. L-Orizzont. Aċċess tal-URL: 24-01-2009.
  13. ^ (Ingliż) Barnsley snap up Mifsud on loan. BBC, 02-02-2009. Aċċess tal-URL: 04-02-2009.
  14. ^ (Ingliż) Barnsley 1-1 Birmingham. BBC Sport, 11-03-2009. Aċċess tal-URL: 18-03-2009.
  15. ^ (Ingliż) "NEWS: Sky Blues trio released", ccfc.co.uk, 30-06-2009.
  16. ^ (Ingliż) Malta has special place in Blades World. Times of Malta, 05-07-2009. Aċċess tal-URL: 13-07-2009.
  17. ^ (Ingliż) Local football: Michael Mifsud could return to local football. Independent.com.mt
  18. ^ Kevin Azzopardi. (Ingliż) Mifsud considering offers from foreign clubs. Times of Malta, 14-08-2009. Aċċess tal-URL: 18-05-2009.
  19. ^ (Ingliż) Sven's Notts County taking Michael Ball and Michael Mifsud. Mirror Football, 13-09-2009
  20. ^ Manuel Gauci. Michael Mifsud qed jitħarreġ ma' Portsmouth. MaltaRightNow.com, 24-02-2010
  21. ^ Antoine Busuttil. (Ingliż) Michael Mifsud opts to join Valletta. MaltaFootball.com, 09-03-2010
  22. ^ Antoine Busuttil. (Ingliż) Valletta FC present Michael Mifsud. MaltaFootball.com, 10-03-2010
  23. ^ Paul Cachia. (Ingliż) First-half goals enough for City. Times of Malta, 24-05-2010
  24. ^ (Ingliż) National League 100 Anniversary Cup. Vallettafc.net
  25. ^ (Ingliż) Zerafa confirmed Valletta coach - Mifsud to resume career abroad. Times of Malta, 05-06-2010
  26. ^ (Ingliż) Floriana lead chase for Michael Mifsud. Times of Malta, 28-01-2011. Aċċess tal-URL: 05-02-2011.
  27. ^ Valhmor Camilleri. (Ingliż) Botched transfer splits Greens as Said resigns. Times of Malta, 02-02-2011. Aċċess tal-URL: 05-02-2011.
  28. ^ Jesmond Moore. (Ingliż) Waqt rally minn Floriana FC: Said jirtira r-riżenja tiegħu. L-Orizzont. Aċċess tal-URL: 05-02-2011.
  29. ^ Jesmond Moore. (Ingliż) Michael Mifsud jiffirma ma’ Qormi. L-Orizzont, 04-02-2011. Aċċess tal-URL: 05-02-2011.
  30. ^ Antoine Busuttil. (Ingliż) Michael Mifsud hat-trick hero for Qormi — Citizens held in 1-1 draw. MaltaFootball.com, 05-02-2011. Aċċess tal-URL: 05-02-2011.
  31. ^ Kevin Azzopardi. (Ingliż) Mifsud dismisses rumours, eyes move abroad. Times of Malta, 14-06-2011. Aċċess tal-URL: 06-07-2011.
  32. ^ (Ingliż) Michael Mifsud: Valletta FC agree Terms. Vallettafc.net, 05-07-2011. Aċċess tal-URL: 06-07-2011.
  33. ^ Antoine Busuttil. (Ingliż) Michael Mifsud hands Valletta the Super Cup. MaltaFootball.com, 16-08-2011. Aċċess tal-URL: 25-08-2011.
  34. ^ (Ingliż) Malta and Mifsud reach a record score. MaltaRightNow.com, 27-03-2008. Aċċess tal-URL: 13-09-2008.
  35. ^ (Ingliż) Malta 2-0 Georgia. MFA.com.mt, 12-08-2009
  36. ^ (Ingliż) Malta 1-4 Bulgarija. MFA.com.mt, 18-10-2009
  37. ^ (Ingliż) Malta 1-2 Finlandja. MFA.com.mt, 03-03-2010
  38. ^ The Melita Digital Malta Football Awards 2006/07 - The Winners
  39. ^ Melita Malta Football Awards 2009/10 - Winners

[editja] Ħoloq esterni

a • d • m
Valletta FC – skwadra kurrenti

1 Cini · 2 Caruana · 3 Azzopardi · 4 Borg · 5 Dos Santos · 6 Fenech · 7 G. Agius · 8 E. Agius · 9 Mifsud · 10 Briffa · 11 Barbosa · 17 Scicluna · 18 Pace · 19 Denni · 20 Falzon · 21 Effiong · 24 Hogg · 99 Scerri · –– Zongo · –– Towns · Kowċ: Zerafa
Miġjub minn "http://mt.wikipedia.org/w/index.php?title=Michael_Mifsud&oldid=168812"
Għodda personali
Spazji tal-isem

Varjanti
Azzjonijiet
Navigazzjoni
Komunità
Għodda
F'lingwi oħrajn